2 Tisaruniki 1 - Ngudradreadrekadhane Ka Sisiu 魯凱語聖經

¹ Kunaku ka Pawru, taelreaku ki Silra si Timuthi tigami si baai ki swa Tisaruniki ka kiwkai, ka swakai ki Tamaita ka Twaumase si Tamatama ka Yesu Kirisitu ka lasinzia.

² Ku Tamaita ka Twaumase si Tamatama ka Yesu Kirisitu ani baai numiane ku migemi, ku sulivatane.

Ku asaibangane ki Kirisitu lu kela ngusela

³ Laretesaneli, kunai naika tapasikaiyane nai numiane kiaseaseasene ki Twaumase. Kikai naika apiapiane nai, asi lwiyane kwi salrwane numi maadrau ku taadilane, ku tamakilibalibakane la mialri kaadrau ku taadilane.

⁴ Lakamani, ikai nai ki lakiwkai ki Twaumase walrigulrigu nai numiane. Ngialribate numi patuelre ku takihakegadhane, ku takipakwalriane, la kai kaela kwi salrwane numi, si sakiadiadili numi, amani kai ku dradradrarane nai.

⁵ Amani kai ku sapelaelane ku dringelresane ka sasaibangane ki Twaumase, ka apasudalepane numi kisupilri ku akaesadhane ki kuni ki Twaumase. Pasiakaikai numi kikai ki kuni si pacungucungulwana kiadili ki akwalriane.

⁶ Ku Twaumase lri pangimia kaungu ku dringelresaneini. Lri pakipadradresenge ku amatikurwane kwidra ki la twalilisi numiane,

⁷ si kudra kwalrialri ku umawmase lri pakarededele naiane mukerenge. Lu adrelanenga ikai ki apwi ku Tamatama ka Yesu si sapukwane ka lasasiakawluini belenge, ku Twaumase lri pangimianga pia kikai.

⁸ Lri pathavungu ki kai wathingale iniane, si kwidra la kai kialalra ku patharukai ki hukuingi ki Tamatamata ka Yesu kwini laumawmase.

⁹ Luka takelane ngusela ki Tamatama ku vai, kwini laumawmase lri kipathavungu, si lri kapalralrawthunga kamudu, lri kipatwalai cucubungu ki Tamatama si puku ka lriguini kipatukudhanga puthili.

¹⁰ Ikai kwini ki vai, ku Yesu lri twalai ki lasinzia malra ku lrigu, si lri kidrengedrengere liniane. Kunumi lai lri ikai numi liniane kiibu, asi lwiyane masalrunga numi ku pelaelaela nai ku hukuingi.

¹¹ Ngwalai kikai, tapasikaiyane nai numiane inulri, kitubi ki Twaumaseta ku kaika apakasalivalravane numi ku tadawlaneini. Ani arakai ku pukuini, paralubu numiane pangimia patuelre ku anangimiya nai iya numi papia ki mathariri, si pangimia ku kaungu numi arakai ku salrwane.

¹² Lukamiyaiya kai, ku nagane ki Tamatamata ka Yesu lri patwalai ki awngane numi malra ku lrigu, kunumi lri mia numi patwalai iniane malra ku lrigu, kikai yai ngwakai ki migemi ki Twaumaseta si Tamatama ka Yesu Kirisitu kainganai.