2 Timuthi 4 - Ngudradreadrekadhane Ka Sisiu 魯凱語聖經

¹ Ikai cucubungu ki Twaumase si Yesu Kirisitu kaamani kwidra lri saibange sanaka panianianiake ka umawmase si wapacainga ka umawmase, si sakai ku taadrelananeini si tamagagemegemaneini ku puku, maracangaku pakipapawlringau muswane:

² Ku adindwane, ku tangimiane adravane ka ngiaesai ku vai ka kai ngiaesai tara dinduua, si arakai ku madraadrawnga ku sakiadiadili pakipapawlringau, kaelaela, pasapukwane, la bulru.

³ Ku vai lri daruru, lu kamaninga kwini ku umawmase lri kai tarumara ku kiatulrepenge ku sabulrwane, lri pasalaladha ki gathimi ki apasalrivane, si mwakidruanga sisinsi, pakai ku angulwadhanane ku lraceacengane ki calringa lini.

⁴ Kai lalasu wacelrepe ku calringa lini kai kilalra ku vaga ki patengane ka sabulrwane, la papakilalra ku nidaedarepane twalai ki sidrumane ka vaga.

⁵ Ai, kusu adravane ka ngitwatwatumane ku taikaiyanesu tara dradreela, la kiadili ki akwalriane, si kaungu ku naika apiane ki taradindindu, ka patengane pangimia ku awngane ki sasiakawlu ki Twaumase.

⁶ Ngukai nakwane, ku angicacilrianeli ku vai wadarurunga, kikai asasane amaninga ku akatwasaneli kai kawmasane.

⁷ Kudra yakai ku pacugane kikalrumale ka alailadhane, kiakalrumalenga naku, ku alailadhane patulrepenge, walailaingaku, kudra apangimiane ku takisuswane, la pangimianga naku.

⁸ Twalainga kaikameane, yakai ku pakalreva ki dringelresane ka lrigu ka pagamucu mwakalavalava nakwane, ka amani kwidra singiakai ki dringelresane saibange ka Tamatama, ikai ki akelane ki Kirisitu ngusela ka vai, lri malra si baai nakwane ku lrigu ka pagamucu, kai lri patarumara nakwane sikakathane, lri mialri patarumara ki sanaka akuli si mukalavalava ka umawmase.

Cunuini patangeangea

⁹ Kusu kisamwamula kela nakwane kai.

¹⁰ Kai Dima akulinga kadalame ki kawmasane, si katwasenga nakwane mwa ka Tisaruniki. Ku Kerisekine la mwa ka Galatia, ku Titu la mwa ka Dalamatia,

¹¹ kathane kai Luka ka yakai nakwane. Katwasa silape ki Maruku, si ililuku iniane kainganai, asi lwiyane lri dulru paralubu ki awnganeli.

¹² Siakawlunga naku ki Tikiku mwa ka Ipisu.

¹³ Lu kelasu, ilukanga ku ebeleli sa ikaiyaku Terua wasuraku pikai ki daane ki Karepu, la pakarededela kudra lahungu, inilringa kudra la niaralrangicane ki kiu ka nibalrulane ka hungu pakarededela iluku.

¹⁴ Kai taradarepe ki lriwlu ka Alikesangeda makalra kai tulililisi nakwane; ku Tamatama lri singikai ku tapianeini bilri iniane.

¹⁵ La mialrisu dradreela iniane, asi lwiyane kai lasu wakececengane baebalre kai pelaelaelata kikai hukuingi.

¹⁶ Sa tau ngipapasikaiyaku kidrikisi kawrivariva, matwase nakwane makanaelre. Ku Twaumase ani kai drima ku pasalrivane pikai liniane!

¹⁷ Ku Tamatama yakai thili paraluralubu nakwane, si baai nakwane ku puku, ala dulrwaku pelaela kikai kiatulrepenge ka hukuingi ki sakamaelanane ka umawmase makanaelre, laka kiapalribulunga naku twalai ki ngudui ki raiyungu.

¹⁸ Ku Tamatama lri tara palribulu nakwane pakidaili ki ngialisiane patuelre, lai malra nakwane pakasulivate mwa ki kunini ka belenge. Ku lrigu anika palralrawlrawthu papia iniane! Amingi.

Bibiilrilinga ka satubarengerane

¹⁹ Atalingikaiyangaili mwadringadringai numi iya ki Pirisecila si Akuila, si wacekecekele ki Unisihuru.

²⁰ Ku Irasetuse yakainga Kurintu. Ku Terupimu la kacaeme, la pasuraku iniane pikai Militu.

²¹ Tara kidremedreema si kainganadha aswala ki kalakecelrane. Ku Yubuluse, ku Pudine, ku Linuse, ku ababai ka sinzia ka Kelawdia, si drumane ka laretesane aii amiamia muswane makanaelre.

²² Ku Tamatama ani ikai tapalra muswane! Ku Twaumase ani patarumara ku migemi numiane!