2 Timuthi 3 - Ngudradreadrekadhane Ka Sisiu 魯凱語聖經

Satwalrepenge kai kawmasane

¹ Kusu thingala, ku satwalrepenge kai kawmasane yakai ku la akwalriane.

² Lukamaninga kwidra, ku umawmase lri ngikakalikaalithinga, kararau ku paisu, ngitatwadradrau, ngikalrilrigu, tulilisi, baebalre ki marudrawdrange, karimuru ku pakaesai iniane, kaika mabula,

³ kadrwa ku kilibakane ki wacekecekele, kai mwalralra ku lisiane, pasasarau ku kaika patengane ka vaga, kai maka ngiararuthuku, malilisi, kai madalame ki mathariri.

⁴ Kai lalasu kialangai ki sinsi si talragi, ngialralraingi ku kaika pinalraingane ku kakudhane, ngiatatwabelenge ngitatwadrau, madadalame kisupilri ki akiragadhane ka silrialribate ki akilibakane ki Twaumase.

⁵ Kai lalasu siapalimemelre ku ebele ki takisuswane, ai kai tarwamara ku patengatengane ka takisuswane. Kikai miyaiya kai ku umawmase, mubera liniane.

⁶ Kai lalasu madalame mudaane ki sanaka daane ki umawmase, si lrilrigili ki twaramuru ku kidremedreme, si kudra la kiadrepete ki pasalrivane, ki kiaililukunga ki gathimi ki pasalrivane ka lalabaibai.

⁷ Kilakikai labaibai adravane nau kibulru iyaiya, kai maka wadulru thingale ki patengane ka sabulrwane.

⁸ Mararaamau sakanadruma ki Yani si Yamebere ku tabaebalreane lini ki Musi, kaiasasane kikai laumawmase mialri baebalre ki patengane ka sabulrwane. Kudra kidremedreme lini ngialisiane, ikai ki salrwane kai maka wadulrunga kikilrialringau,

⁹ si kai lri maka dulrunga kathariri, asi lwiyane kai kulrungane ki lalasu mwataluvaivainga icucubungu ki laumawmase, mararaamau ki Yani si Yamebere.

Bibiilrilinga ku tapelaelane

¹⁰ Ai, kusu tarwamarangasu kai sabulrwaneli si kudra tapangimianeli panianiake, si twalralrawnga nakwane kai tangivelevelane, salrwane, pacepane, sakialibake, sakiadiadili,

¹¹ la kivalasu siamece kai kihakegaili si sakwalrialrili. Sa ikaiyaku Anetiuke, Ikuniume, si Lusetera ku takipadradresenganeli, si ku kiadilane ki hakegai, wathingalesu patuelre, ai, ku Tamatama palribulu nakwane pakidaili kikai patuelre.

¹² Sanaka pasingiakidremedreme tupapalra ki Yesu Kirisitu, si usakene paluludu ki Twaumase ku tapanianianiakane, lri kipadradresenge ku akihakegadhane makanaelre.

¹³ Ku manganga si tara draedraedrangelre ku umawmase ku angimiane lini lukavaivai lri aru ngilisiane, kudra lu draedrangelre ki palrapalra, mialri kidraedrangelre.

¹⁴ Ai, kusu pangimia ku tarumarangasu si ku salrwanesu ki patengane ka sabulrwane. Wathingalesu ka aneane ku sinsisu.

¹⁵ La thingalesu ka twalaisu ki vavalake thingale ki Sisiu, amani kwidra wadulru baai muswane ku lrigilane, warake muswane pangukai ki salrwanesu ki Yesu Kirisitu si tarumara ku akipalribulane ka hungu.

¹⁶ Patuelre kai Sisiu kiapapukidremedreme ki Ri ki Twaumase si pacase, papia ki abulrwane ki patengane ka sabulrwane, kaelaela ki pasalriu, pawlecege ki pamama, pelaela ku walecege ka kadalranane ki taikawmasanane, yakai ku apakaesadhane patuelre.

¹⁷ Pakai ku akitulrepengane padulru kudra ki lri kaungu pasikai ki Twaumase ka umawmase, si dulru pia ku makaelaela ku mathariri ku awngane.