2 Timuthi 2 - Ngudradreadrekadhane Ka Sisiu 魯凱語聖經

Garagarange ka kwapingi ki Kirisitu

¹ Lalakeli, kusu sakaiya ku baai ki Yesu Kirisitu ku migemi si sapukwane.

² Yakaisu cucubungu ki takaalra ka wadredredreele ka umawmase patwalai nakwane tarumara ku sabulrwane, la mialria patarumara baai ki kasalrusu ka lri dulru bulru ki palrapalra ka umawmase.

³ Luka amaniane kudra garagarange ka kwapingi ki Yesu Kirisitu, lri kivalasu siamece ku akwalriane.

⁴ Ku tangea ka umawmase lu mukwapingi nau kikiragai ki tabebelenge lwiya, kai lri maka upungu iniane ku twalai latadre ki takwapingane ku laawngane.

⁵ Ku walailailai lu kikalrumalrumale lailai lu kai paluludu ku nitukakudhanane kai lri maka malra ku pakalreva.

⁶ Ku kiasamula kaungu ku tarakawaungu lri aswala kisupilri ku nikitalekane.

⁷ Kidremedreema ku taiyaiyaneli ku vaga, asi lwiyane ku Tamatama lri tara pathingale muswane patuelre ku lamanemane.

⁸ Pulringava ki Yesu Kirisitu, amani ku mwabaibalrithi ki Davidi, ku Twaumase patwalai ki wapacai pasielane papanianiake iniane, amani kai ku pelaelaelali ka hukuingi.

⁹ Ngwaladhaku ku tapelaelane kai ki hukuingi si kipadradresenge ku akwalriane, pakela ki kiakerenge, mia ki pasalriu. Ai ku vaga ki Twaumase kai lri kikerenge.

¹⁰ Lakamani, ngwaladhaku ki pilri ki Twaumase ku umawmase si kiadili kilakikai, pakai ku adulrwane lini malra kudra twalai ki Yesu Kirisitu kela ka sapalribulane si palralrawthu ka lrigu.

¹¹ Ala kai lebe kai vaga matiasudralru: Alaiyasi tupapalrangata iniane pacai, lri dulruta tupapalra iniane panianiake.

¹² Alaiyasi patulrepengeta kiadili, lri dulruta tupapalra iniane magagemegeme ku puku. Alaiyasi kaita thingale iniane, lri kai thingale mitane.

¹³ Alaiyasi la pulibalibaketa, lrika sakamiya ka patengatengane ka asudralrwalrwane, asi lwiyane kai lri maka ngibabaebalre.

Kiadrengedrengere ka tarakawaungu

¹⁴ Kusu pakipapawlringava ki laumawmase, ikai cucubungu ki Twaumase pudriadringaadha pakipapawlringau liniane: Madha kidrikidrikisi ikai ki vaga, kwini kadrwa ku akaesadhane, lri pangilisiane ki kialalra ka laumawmase sikakathane.

¹⁵ Kisamula icucubungu ki Twaumase si kamani ku wadulru ngilribate ki akikituthiathingalane, ka kadrwa ku pwalane ka tarakawaungu, si la pawlecege swacenge pelaela ku hukuingi ki Twaumase.

¹⁶ Kidaila ki matialrase ka kadrwa ku paluludane ka lavaga, asi lwiyane kikai la miyaiya kai ku amakawrivarivane lri arake ki umawmase pakidaili ki Twaumase;

¹⁷ kudra makawrivarivariva lini mia ki pu ka dula ka pakaburaburau ki beate. Kilakikai yakai ku Hemenau si Pilitu;

¹⁸ kai lalasu kiadailinga ki patengane ka sabulrwane, si la kawriva ku ngwakai ki siaela panianiake ngialribatenga iya, ngwalai kikai la velevelenga ki salrwane ki palrapalra.

¹⁹ Ai, ku cegecege ki Twaumase ka makeecenge ka karwalai kai lri avelevelane; ikai belenge ki karwalai ka lrenege wapacase, “Ku Tamatama wathingale ki umawmaseini.” La pacase, “Kudra ngiatatu Tamatama ka umawmase amia, lri tara ciilri ki ngialisiane.”

²⁰ Ikai sanaka maesaesaesai ku tacekecekelane lri tara ka makalra ku lawbubulu, kaika yakaai ku niara kingiane, niara gingiane sikakathane ku lawbubulu, mialri ikai ku niara angatwane, niara daeane ka lawbubulu, yakai ku tinukucingalrane arakai, yakai ku kaika tinukucingalrane arakai.

²¹ Kai umawmase alaiyasi ngibabula, la kidaili ki ngialisiane patuelre, lri dulru kitukucingalre ki Tamatama, asi lwiyane ngiapapatarumaranga baai ki Twaumase, si kiarakai ki Twaumase, pia sanaka mathaariri ku awngane.

²² Madha kangimiyaiyaiya ki yacengecenge siwpungane ki awngane, tupapalra kudra la mabula ku kidremedreme, si kitubi ki Tamatama ku akiparalubane ka umawmase, karededele kisilape ku dringelresane, ku salrwane ku sakialibake, si rathudane.

²³ Cilria kwidra ngiakulrungu ka kadrwa ku thingalane ka amadrikidrikisane ka vaga, wathingalesu, ki kikai amadrikidrikisane ka vaga wadawlu ki rivwane si kakathane.

²⁴ Ku sasiakawlu ki Tamatama madha rivurivu, lri ara sulrapelane ki palrapalra, si kisamula bulru pawlecege,

²⁵ la kasulrapele pakipapawlringau ki ecebaneini ku umawmase. Ku Twaumase alau lri baai liniane ku angitatupelane, si la thingale ku pacengecenge ka sabulrwane.

²⁶ Lukamiyaiya kai, adravane kipwalra ki Akema, si kivutha pasalaladha iniane, kwi lalasu lri dulru pulringau, si twalai ki araini katwase mubere.