2 Timuthi 1 - Ngudradreadrekadhane Ka Sisiu 魯凱語聖經

¹ Kunaku ka Pawru, pangwakaiyaku ku takidremedremane ki Twaumase si asasiakawlu ki Yesu Kirisitu, kela pelaelaela ku pangukai ki Yesu Kirisitu palraingi ka bavane ka niake.

² Watigamiaku si baai muswane ka kinilibakane ka lalakeli ka Timuthi: Ku migemi, kalithane, sulivatane ki Tamaita ka Twaumase si Tamatamata ka Yesu Kirisitu, ani baai muswane!

Kiaseasene si pasapukwane

³ Kiaseasenaku ki Twaumase, ka amani kwidra thadalraneli ki cucungulaneli arakai ku alrivilrivi ka kidremedreme sukubu ki Twaumase. Kainaku wareteretege ikai ki inulri ngulringau muswane,

⁴ sana ngulringavaku ku lresesu salri katwasaku, apiakikawrivaku muswane, sana kikawrivaku muswane, lri kiraragadhaku turamuru.

⁵ Pwalringavaku kwini bulane ki salrwanesu, amani kwidra salrwane patuelre ki kaingusu ka Luise si tinasu ka Yuniki, masalrwaku kudra salrwane lini maiyalri ikai ki takidremedremanesu.

⁶ Lakamani, lri pakipapawlringavaku muswane: Kudra baai ki Twaumase muswane ku migemi sa subulrubulrwaku muswane, malra pakadrareange mia ki apwi kai pakaedredrepe.

⁷ Asi lwiyane, ku baai mitane ki Twaumase ku Ri kai lri pakakiwcu mitane, ku Riini lri pasuete mitane ku puku, ku sakialibake, si ku angiraruthukane.

⁸ Lakamani, kusu madha talrumalrumale ku apasikaiyanesu ki Tamatamata pelaela, matiainu la madha iyaiya kai tangwaladhaneli ki Tamatama si kiemenge. Kusu singikaiya ku baai ki Twaumase ku puku, si pasikai ki hukuingi siamece kivala ku akwalriane.

⁹ Ku tapalribulane mitane ki Twaumase, la dawlu mitane si aumawmaseta iniane, kaika amani sa ikai ku manemane ku takathariraneta ku tangivelevelane, twalai ki kidremedremeini si migemini. Sakaiyana ikai sanaka maneemane pangwakainga ki Yesu Kirisitu baai mitane kikai migemi,

¹⁰ kikainga la ngwalainga ku taulebeane ki Yesu Kirisitu ka Takipalribulribulaneta si utaluvaivainga. Ku Kirisitu pamalebenga ku puku ki apacadhane, la pangukai ki hukuingi padrelane ku kai lri kalisinga ka niake.

¹¹ Ngwalai kikai ki hukuingi, ku Twaumase siakawlu nakwane kamani ku taradindindu, ka nisikawlane si ka tarabulrubulru.

¹² Ngwalai kai, ala kamani ku kipakwalrili kilakikai. Ai, swaeteana kai salrwaneli, asi lwiyane wathingalaku ku kasalruli luka aneane, si la kasalru iniane ka lri dulru pangimia ku sudralruini nakwane, pakela ku akelane ngusela ki Tamatama kudra vai.

¹³ Kakecenga pangimia ku baaili muswane kudra kiatulrepenge ka vaga, anikamani ku takelretanesu tukakudhanane, la pangimia ku takielreaneta ki Yesu Kirisitu si malrata ku salrwane si sakialibake.

¹⁴ Kudra yakai ki kidremedremeta ka Siri ku baai sudralru muswane ku patengane ka sabulrwane, tara pangimia.

¹⁵ Wathingalesu, ikai ki swa Asia ka laumawmase kiadailinga nakwane makanaelre, paelre ki Pigelu si Heremugeni.

¹⁶ Ku Tamatama ani kakalithi ki wacekecekele ki Unisihuru; asi lwiyane sangwakaalrale pasapukwane nakwane, si pakiragai nakwane. Kai ngwalai ku takiemenganeli si tainu,

¹⁷ sakela Ruma kiapasilape nakwane mwa kidruanga, sakabilrilinga la kidringai nakwane.

¹⁸ Ani kelrete ku Twaumase iniane lu kelanga ku vai ku akelane ngusela ki Tamatama, ani tarumara ku satukurwanane! Ku tapasikaikaiyane nakwane kakaalra turamuru sa ikaiyaku Ipisu, wathingalesu pudriadriingai.