2 Samuile 9 - Ngudradreadrekadhane Ka Sisiu 魯凱語聖經

Davidi si Mipibusithe

¹ Yakai saka minakavalane, ku Davidi la kivaga, “Yakaiyana ku panianianiakeana ku lawacekecekele ki Saule? Lwiyasi la ikai, lri ngwaladhaku ki Yunathange si pakathariri sirapale iniane.”

² Yakai ku sia Ziba ku sasiakawlu ki tai Saule; la ikai ku wadawlu iniane mwa kidrele ki Davidi. Ku talialalai la kivaga iniane, “Amanisu ku sia Ziba?” Ku Ziba la tubalre, “Unu, ala sikawlaili.”

³ La kivagana ku talialalai, “Ikai ki tai Saule la ikaiyana ku panianianiakeana? Lri singikaiyaku ku tapuvaganengali ki Twaumase arakai ku thalradhane sirapale iniane.” Ku Ziba la kawriva, “Yakaiyana ku tangea ku lalake ki Yunathange; mapilai paecebe ku drapaleini.”

⁴ La kivaga ku talialalai, “Kwini lasu la ikai inu?” Ku Ziba la kawriva, “Yakai ki tai Makire ka lalake ki Amiele ka swakai Ludibare” la iya.

⁵ Ku talialalai ka Davidi la sikawlu ku umawmase malramalra iniane.

⁶ Sa kela ku Mipibusithe ka lalake ki Yunathange ka agane ki Saule, la musakene si pidruru ikai cucubungu ki Davidi. Ku Davidi la dawlu iniane, “Mipibusithe!” Kwini lasu la tubalre, “Unu, ala sikawlaili.”

⁷ Ku Davidi la kawriva, “Madha mukulukuludru, lri ngwaladhaku ki tamasu ka Yunathange si pudriadriingai sirapale muswane. Lri malraku kudra kadaengane ki tumusu ka Saule si sawlri baai muswane; wakelakeela madu la kilringulu nakwane.”

⁸ Ku Mipibusithe la pelaana guruthungane sukusukubu ki Davidi, la kawriva, “Kunaku makadrwadruana naku ki wapacainga ka tawpungu, la maalranasu ka talialalai sirapale nakwane!” La iya.

⁹ Ku talialalai la dawlu ki sasiakawlu ki Saule ka Ziba, kawriva iniane, “Lri malraku patuelre sanaka lawbubulu ki Saule si latacekecekelane ki wacekecekeleini baai ki agane ki tawkisu ka Mipibusithe.

¹⁰ Kusu si lalalakesu, lasasiakawlusu, lri makitu tuumawma pasikaikai ki wacekecekele ki tawkisu ka Saule, la malra kwini kitaletaleke tusalapwane liniane, kai Mipibusithe la lri kamani ku tara kilringulringulu kitasubadhabadha nakwane.” (Ta 15 ku lalalake ki Ziba ka lasawvalalai, tamapusale ku sasiakawluini.)

¹¹ La tubalre ku Ziba, “Lri tara singikaiyaku ku tapadrekadrekasanesu ka mabelenge si nguvavaeva pangimia patuelre.” Ku Mipibusithe laka taikaiyane ki talialalai kilringulringulu, mia ki lalake ki talialalai.

¹² Yakai ku lalake ki Mipibusithe sia Mika. Kwini tai Ziba makanaelre la makitu asasiakawlunga ki Mipibusithe.

¹³ Kwini mapiapilai ka Mipibusithe la ikai Yerusalrime, ka takilringulringulane ki talialalai.