2 Samuile 8 - Ngudradreadrekadhane Ka Sisiu 魯凱語聖經

Tapamalebeane sa kikaruburu kai Davidi

¹ Sakabilrilanenga, ku Davidi la peelanga kikaruburu ki swa Pelisitine, la pamalebe liniane, si palikainga kai swa Pelisitine ku tarathudane ikai kikai ki kadaengane kai.

² Kwini lasu la pamaleebenga ki swa Muabe. Kwini lasu ngisalrita ikai daedae la iya liniane, la arakai ku calrisi lekete ku elrengane lini, luka sangwa pusale ki calrisi ku elrengane, la pwa papacai, kudra ki sangwa vavale ki calrisi, la pwa paudripi. Kwini swa Muabe ka umawmase, la pasalaladhanga ki Davidi, si papianga iniane tupadulru.

³ Ku Davidi la pamaleebenga ki Hadadizere ka lalake ki Rihube ka talialalai ki swa Zuba. Sa tara dradrakerakerale talikai Yuparati ku Hadadizere ku kwapingi pasana sawlriwlri kwini natarathurathudaneini,

⁴ ku Davidi la ravase ku ta 1,700 ku tarangurigirigi ka kwapingini, ta 20,000 ku la pangwa dadadavace ka kwapingi. Twalai kwini ki niravasane ka larigi, ku Davidi la pasuru ku lrika amakakelreetane arakai pabilibili ki idai ku palridingi ki kwapingi, la malra retege kwini ki uvace ki drapale kwini ki drumanenga.

⁵ Kudra yakai Damasekuse ku swa Siria sa sikawlu ku kwapingi palribulu ki talialalai ka Hadadizere, ku Davidi la mwa kikaruburu liniane, la papacai ku ta 22,000 ku umawmase.

⁶ Sakabilrilinga ku Davidi ala pikainga ku kwapingi ikai ki kadaengane lini; kwini lalasu la makitu pasalaladhanga ki Davidi, si tupadulru iniane. Ku Tamatama la paralubu ki Davidi lakakadrwa ku makakiaececebe, lu mwinunga kidruanga pamaleebe.

⁷ Ku Davidi la malra ravase ku kingi ka alathare ki lakwapingi ki Hadadizere, iluku mu Yerusalrime,

⁸ la patwalai ki taidrusa ka rathurathudu ki Hadadizere ka cekele ka Bita si Birutai ribici ngukalra ku lriwlu.

⁹ Ku talialalai ki swa Hamathe ka Tui la kilalra ku Davidi pamalebenga nguelre ku lakwapingi ki Hadadizere,

¹⁰ la sikawlu ki lalakeini ka Yurame mwa sukubu ki talialalai ka Davidi, kiraragai ku tapamalebeaneini (Asi lwiyane kikai Tui si Hadadizere tamakakaruburubuurane). Ku Yurame la mailuku ku kingi, gingi, lriwlu tusaceacebe baai ki Davidi,

^11-12 ku Davidi; la malra kikai nikiacebane si pakaredele kudra twalai ki drumane ka kuni ka la niravaravasane ka kingi ka gingi, kikai amani ku twalai ki rathudungaini ka swa Idume, Muabe, Amune, Pelisitine, Amaleke, si kudra drumane ku niravasane twalai ki talialalai ki swa Zuba ka Hadadizere si pakanaelre patarumara ki Tamatama, tusasukusukubane.

¹³ Ku Davidi la pikai valrwalru ka Timu papacai ku ta 18,000 ka swa Idume, sa kainganainga siwlri, la malalingilingi aru kimatikai ku naganeini.

¹⁴ Kwini lasu la tutakwapingane pikainga kavai Idume; ku swakai kwini ku laumawmase la makitu pasalaladhanga iniane. Ku Tamatama la pakakadrwanga ku makakiaececebe ki Davidi, pamalebelebe lumwinunga kidruanga.

¹⁵ Ku Davidi warathudu palraelrenga Iseraylri, la arakai ku aparamaramavane marasikaikai ki mapapangale.

¹⁶ Ku Yuabe ka lalake ki Ziruia la atamatama ki kwapingi; ku Yehusapate ka lalake ki Ahilude ataramarasikai ki lrikisi;

¹⁷ kai Zaduke ka lalake ki Ahitube si Ahimileke ka lalake ki Abiathare la abarakalai; ku Seraia la atara marasikaikai ki apacasane ki talialalai;

¹⁸ ku Binaia ka lalake ki Yehuiada atamatama ki tarapalakelakebe ki Davidi; ku lalalake ki Davidi la makitu abarakalai.