2 Samuile 7 - Ngudradreadrekadhane Ka Sisiu 魯凱語聖經

Wasatedre ku vaga ku Yunathange baai ki Davidi

¹ Ku Davidi yakai ki daane ki talialalai. Ku Tamatama pakasulivaliivate ki tarathudaneini, la kai kimucekele ki labadha.

² Ku talialalai la kawriva ki yuginsia ka Nathange, “Drela, kikai siadaanaku kai niarakaiyane ku cedare ka angatu tudaane ka daane ki talialalai, ku Langiane ki Twaumase la ikailringa ki niara balrawbavane!” La iya.

³ Ku Nathange la kawriva, “Ku nau pia kwini iyaiyasu ngisasingikaiya! Asi lwiyane ku Tamatama watapalra muswane” La iya.

⁴ Ai, kwini sakamaungu ku Tamatama la kawriva ki Nathange,

⁵ “Lu mwa si pelaela ki sasiakawluli ka Davidi, amiaku kai ka Tamatama kawriva, ‘Kaisu kamani kwidra lri pasikai nakwane tudaane ka umawmase.

⁶ Twalai kudra tapalribulaneli ki swa Iseraylri kidaili ki swa Izipiti pakelanga kaikameane, kadrwana ku taikaiyaneli ki kadaanane; taikaiyanaku ki niara balrawbavane, mwinunga ki druanga.

⁷ Kwidra tataelreaneli ki swa Iseraylri acaicaicali ka lavai, ani kadrwa ku pasikai numi nakwane si tudaane ku taluvale ku niarakaiyane ku cedare ka angatu tudaane, kadrwana ku takirimwaneli iya kwini kivaga kwini ki dawluli ka lapagwagwagu ki mapapangaleli ka lakiacapili.’

⁸ “Lakamani kwidra, pelaela ki sasiakawluli ka Davidi, kunaku ka Tamatama ka abebeelengenga ki sanaka kwapingi amia kai, ‘Pagwagwagusu ki kiu ikai ubulane, la dawlaku muswane kainganai, tutalialalai muswane ki mapapangaleli ka swa Iseraylri.

⁹ Adravane darurusu inukidruanga, tatapalraneli muswane; si papamalebeaku ki sanaka badhasu. Lri malraku muswane pakiramau ki lasaniange ikai kawmasane ka umawmase.

^10-11 Pasiakainga naku ki mapapangaleli ki swa Iseraylri pilri ku taingeane ku lrika taikaiyane, la malra liniane pasutelrai pikainga kwini, la lri kai kidredredrepetenga. Twalai kwini ku taikaiyane lini kai ki kadaengane, kwini lalasu kai maretege ku akikelane ku lri kikaruburu liniane; ai kudra miyaiya kikai kai lri tupelanga ikai. Lri pakasulivaliivataku muswane, kai lri kikelanga ku kiakaruburu ku sanaka baadha, la lri patapangalaku ku ngwabalribalrithi muswane.

¹² Lu pacaingasu si kidralreke taelre ki lacucungulanesu, lri cegecegaku ku tangea ku lalakesu tutalialalai, si lalri sapukwane ku cekeleini.

¹³ Kwini lasu ala amani kudra lri pasikai nakwane tudaane ka umawmase; lri parwakaiyaku marasikai ki zidaini palralrawthu.

¹⁴ Lri atamaku iniane; lri ka lalakeli iniane. Lwiyasi la pasalriu kwini lasu, lri pathavungaku iniane, mia ki tama lu pathavungu ki lalakeini.

¹⁵ Ai, kainaku lri malra sawlri ku sakialialibakeli iniane, pangimia ku tasawlrianeli ku sakialibakeli ki Saule; mwalra cilri iniane, si cegecegenga muswane tutalialalai.

¹⁶ Lrika palralrawthusu ikai ku lamwabaibalrithi; ku cekele lri kapapedrenge acegecege; ku takatalialaladhanesu lri pacungulu ikai palralrawthanenga.’ ”.

¹⁷ Ku Nathange la malra kikai sacunane ki Twaumase singibila si pelaelanga ki Davidi.

Inulri ki Davidi kiaseasene ki Twaumase

¹⁸ Ku talialalai ka Davidi la mudaanenga ki Alrivilrivi ka balrawbau, ikai cucubungu ki Tamatama, nene si inulri iya kai, “Abebeelengenga ka Tamatama, kikai pasikaisu nakwane patuelrenga, kadrwa ku naika asudalepaneli, kai lawacekecekeleli mialri kai lri sudalepe.

¹⁹ Ai, abebeelengenga ka Tamatama, ku baaisu nakwane makaakalra turamuru, si puvagasu lukabibilrili ku akilibakanesu ki lagaganeli. Abebeelengenga ka Tamatama, laibekace kikai ka dredrele ki laumawmase?

²⁰ Manemaneana ku akawrivaneli? Wathingalesu ki sasiakawlusu.

²¹ Lu piasu kikai singikaisu kudra ki takidremedremanesu; pangiamiasu kikai maadrau turamuru kai awngane, pakai ku abulrwane nakwane.

²² Abebeelengenga ka Tamatama, saniangelringaasu turamuru! Kadrwa ku lri maka dulru kiramau muswane. Wathingalenga naai, kathanesu, kadrwa ku drumane ku Twaumase.

²³ Kai kawmasane la kakadrwa ku kuni ku miyaiya ki swa Iseraylri; palribulusu ki swa Iseraylri kidaili ki akituduriane, la malrasu liniane tumapapangalesu. Pasiakaisu liniane pangimia kikai maadrau ka matiasamali turamuru ka awngane, la malrasu kai naganesu pakimapelaelanga ki kiacaebe belenge. Patwalaisu Izipiti mukerenge ki mapapangalesu, adravane mwa kidruanga, la makitu malrasu mwalra pakatwase ki saka maelane ka zuku si latwaumase lini.

²⁴ La malrasu ki swa Iseraylri kapalralrawthunga ka mapapangalesu, ala kusu ka Tamatama, laka Twaumasesu liniane.

²⁵ “Tamatama ka Twaumase, kiatubiaku tara pangimia ku tapuvaganengasu ku ngwakai nakwane si lamwabaibalrithili; kiatubiaku kapalralrawtha pangimia kudra sanaka taiyanesu ku vaga.

²⁶ Ku naganesu anika palralrawthu ki musakesakene; ku mapapangale anika palralrawthu drengedrengere muswane, ‘Tamatama ka abebeelengenga ki sanaka kwapingi, ka Twaumase ki swa Iseraylri!’ Ka palralrawtha pakapapedrenge ki takatalialaladhaneli.

²⁷ Tamatama ka abebeelengenga ki sanaka kwapingi, ka Twaumase ki swa Iseraylri, pagaranganaku icucubungu muswane iya kikai inulri; asi lwiyane wamalrasu kilakikai patuelre papia nakwane ka sasiakawlusu si cunu, pelaela nakwane, lri patalialalaisu ki lamwabaibalrithili.

²⁸ “Abebeelengenga ka Tamatama, kathanesu ku Twaumase. Lrika palralrawthusu pasusu kudra tapuvaganengasu; pasiakaisu nakwane pangimia kikai palrealrebane ka palraingingasu.

²⁹ Kaiasasane kiatubiaku muswane ku akiraragadhanesu baai ku akaesadhane ki lamwabaibalrithili, lani pacungulu kisupisupilri ku sakialibakesu. Abebeelengenga ka Tamatama, kikai pwavagangasu; asu ka palralrawthu marasikaikai ki lamwabaibalrithili.”