2 Samuile 6 - Ngudradreadrekadhane Ka Sisiu 魯凱語聖經

Wasalri ku Langiane pwa ka Yerusalrime

¹ Ku Davidi la peelanga sarubu kwidra tagagagarangenga ki lakwapingi ki swa Iseraylri, ta 30,000,

² sangiluku liniane mwa kavai Baala Yuda, ku pia kwini tapatwalai kavai si malra salri pasiwlri kwini Langiane ki Twaumase; kikai Langiane, nipunaganane kudra ki nagane ki wanene ikai belenge kwidra ki Kirubime ki abebeelengenga ki sanaka kwapingi ka Tamatama.

³ Kwini lalasu la malra kwini Langiane pubelenge ki bavane ka palridingi, twalai lregelrege ki daane ki tai Abinadabe bulri pulatadre, la kamani kwini tadrusa ka lalake ki Uza si Ahiu ku mailuku;

⁴ ku Ahiu la sacucubungu.

⁵ Ku Davidi si swa Iseraylri makanaelre la makitu kidrepelenga ki senai lini drengedrengere ki Tamatama. Kwini lalasu la velevele ku makaelaela ku sapasenasenadhane, arakai ku lebere, pakulralru, patungutungu, kilrikilringi si bangebange.

⁶ Kwini lalasu sa kela ki tavelavelatane ki mugi ki tai Nakungu, kwini tarabilibilibili ki palridingi ka lwange la kutengelre si mukadrukaadrulunga, ku Uza la sege ku alrimaini paruthuku ki Langiane ki Twaumase.

⁷ Ku Tamatama ka Twaumase la kaelaela tupasalriu ki Uza ku tapianeini kwini, si papacai iniane. Kwini lasu la makakaai pacai ithili ki Langiane ki Twaumase,

⁸ lakamani, kwini kadaengane ku kipasi Pereze Uza iya, pakeela kaikameane. Ku Davidi la ngwalai ku takaelaelane ki Tamatama si pathavungu ki Uza, ku kidremedremeini la kai kiragai.

⁹ Sakavaivai kwini, ku Davidi la mukuludru ki Tamatama, si iya kai, “Kaiasasane lai maka lremeaku malra kwini Langiane ki Tamatama salri pwa kai? La iya.”

¹⁰ Lakamani ku kidremedremeini ku wasalri ku Langiane pwa kavai Yerusalrime, la katwase ngukai ki talidrumane ka kadalranane iluku pwa ki tai Ubide Idume ka swakai cekele kavai Gathe.

¹¹ Kwini Langiane ki Tamatama la taratulru ka dramare ku taikaiyane ki daane ki Ubide Idume; ku Tamatama la subulrubulru ki Ubide Idume si wacekecekeleini makanaelre.

¹² Ku talialalai ka Davidi sa kilalra ku Tamatama ala ka ngwalai ki Langiane si subulrubulru ki tai Ubide Idume liniane ka wacekecekele si sanaka talikaini patuelre, la arakai ku pangiatulrisisi ku peravane tuadrau malra kwini ki Langiane ki Tamatama, salri patwalai ki tai Ubide Idume tarumara pwanga ka Yerusalrime.

¹³ Kwini wasalri ku Langiane ki Tamatama la takuneneemeleana ku tapudrapalane dadavace, ku Davidi idrengerana la iya liniane. Ku Davidi la patarumarana ki Tamatama ku sawvalai ka lwange si tikiyane ka maricuru ka lwange tusapatarumarane.

¹⁴ Ku Davidi la salikavaeva sitebethe ku tinu Ipudeane ka lalasare ka kaimadhane, la dradralrai, drengedrengere ki Tamatama.

¹⁵ Ku Davidi si swa Iseraylri makanaelre, la ngirapapa kirararagai si maililuku kwini Langiane ki Tamatama pwa ka Yerusalrime.

¹⁶ Ku Langiane ki Tamatama sa mudadaane ki cekele ki Davidi, ku ababai ka lalake ki Saule ka Mikale la pangu lribange drele, la drele ki talialalai ka Davidi ku wadralradralai, la sidreekase iniane.

¹⁷ Kwini lalasu wasalri kwini Langiane ki Tamatama si pwa ki padulrunga ki Davidi ka lrika taikaikaiyane ka balrawbau adringi. Ku Davidi ala patarumara ku Lama ka lrisi si Sulivatane ka lrisi baai ki Tamatama;

¹⁸ sa maka patarumaranga, ku Davidi la pangukai ku nagane ki Tamatama ka abebeelengenga ki sanaka kwapingi subulrubulru ki mapapangale,

¹⁹ si pavavala liniane ku akaneane; sanaka yakaai kwini ka swa Iseraylri, anika lasawvalai ka labaibai, wamalra makanaelre sa vavaeva ku pange, si ku akame ka butulu si la nimealane ka budu. Kwini laumawmase la makitu katwase mubalriu mutavanane.

²⁰ Sa mubalriwnga, ku Davidi la lri subulrubulrunga ki wacekecekeleini. Ku Mikale la kainganai kidredresenge iniane, si iya kai, “Kaikameane kai talialalai ki swa Iseraylri salringavane turamuru! Maru amaninga kwidra nganganga ka wavilralrakane icucubungu ki sasiakawlu ki lakiacapicapilini ka lalabaibai!”

²¹ Ku Davidi la kawriva, “Ku dralraili wadrengedrengeraku ki Tamatama. Amani ku Twaumase ka twatalialalai nakwane, ka lriwbalrithi ki tamasu si la wacekecekeleini, kudra lrika amaniaku ka tarasangililuku ki sakacekeleini ka swa Iseraylri. Lakamani kwidra lri pacungulaku dralrai drengedrengere iniane,

²² si ka parauramuraku ngilisiane lu drelesu. Lu drelesu nakwane miakau kainaku ka sapatumatumane, ai kavai lakawkawlu ka lalabaibai lu kidremedreme nakwane maparamurusu la iyalringa nakwane!”

²³ Ku lalake ki Saule ka Mikale, la kai tulalake ku taikawmasananeini.