2 Samuile 5 - Ngudradreadrekadhane Ka Sisiu 魯凱語聖經

Atalialalai ki swa Iseraylri si swa Yuda ku Davidi

¹ Ku zuku ki swa Iseraylri makitwa mwa ka Hiburungu kidrele ki Davidi, kawriva iniane, “Kunai retesanesu sakacekelesu.

² Kunadruma, saka talialalaiyana naiane ku Saule, wailukungasu naiane ka swa Iseraylri mwa ki takikaruburuburane. Ku Tamatama napwavaganga muswane, lrika tarapagwagusu ki mapapangaleini, atara rathurathudu liniane.”

³ Ku laciwru ki swa Iseraylri makanaelre wamwa Hiburungu kidrele ki Davidi ka talialalai. Ku Davidi la ikai cucubungu ki Tamatama kiketekete liniane, kwini lalasu la pulawlau cegecege iniane tutalialalai ki swa Iseraylri.

⁴ Ku Davidi sa atalialalai taramatulrulunga ku cailini, ku takatalialaladhaneini taramasupatele ka caili.

⁵ Kwini lasu yakai Hiburungu rathurathudu ki swa Yuda tarapitu ka caili si eneme ka dramare, ikai Yerusalrime rathurathudu ki swa Iseraylri si swa Yuda palraelre, la tara 33 ka caili.

⁶ Ku talialalai ka Davidi si lakwapingini padulrudulru ku wamwa Yerusalrime kikaruburu. Kwini swakai Yebuse ku laumawmase lu kidremedreme kai lri dulru malra kikai ki cekele la iya, la kawriva ki Davidi, “Lrika palralrawthusu kai maka mudaane kai ki cekele, adravane ka mamukici ka madrialre lri pamalebe si pasiwlri muswane!”

⁷ Ai ku Davidi la maalralringa kwini kepale kavai Ziyungu; amani kwini sakabilrilanenga kudra thingalenga ki laumawmase ka cekele ki Davidi.

⁸ Ki kwini ki vai, ku Davidi la kawriva ki lakwapingini, “Aneane ku mia nakwane kagirimucu kalratake ki swa Yebuse, tapamalebe liniane, lri tara ngukakai kikai ki ngukai ki talutane pangukai ki acilai katwase mwa mudradha, mwa kikaruburu kwini ki madrialre si mamukici!” Lakamani ku ikai ku vaga ku amia kikai, “Ku madrialre si mamukici kai lri maka mudaane ki daane ki Tamatama” iya.

⁹ Sa maka malranga kwini ki kepale, ku Davidi la mucekelenga, si sunagane pasi “Cekele ki Davidi” iya. Ku Davidi la ikai ki kepale thalringulu alradre, twalai ki tali talrawane ki lregelrege kwini ki kadaengane patagase alradre.

¹⁰ Ku Davidi lukakaiya lukakaiya arwa sapukupukuane, asi lwiyane ku Tamatama ka abebeelengenga ki sanaka kwapingi ka Twaumase watapalra iniane.

¹¹ Ku talialalai ka Hirame ki swa Tayre la sikawlu ku taingeane ku tarathathathakai kela kavai ki Davidi, baai ki Davidi ku cedare ka angatu, si iluku ku daikusange ki angatu si daikusange ki lrenege pasikai iniane tudaane ku daane ki talialalai.

¹² Ku Davidi la thingale ku Tamatama ka pakapapedrengenga iniane atalialalai ki swa Iseraylri, ala ka lri ngwalai ki mapapangaleini si pangiradhekane ki kunini.

¹³ Sa katwasenga Hiburungu si mwanga Yerusalrime ku Davidi, la pilringa ku takaalra ku labaibaini, la tulalake ku takaalra ku lalalake.

¹⁴ Kudra kiatulalake ikai Yerusalrime amani kai Samwa, Subabe, Nathange, Sulumungu,

¹⁵ Ibehare, Ilrisua, Nipege, Yapia,

¹⁶ Ilrisama, Ilriada si Ilripelete.

Pamalebe ki swa Pelisitine

¹⁷ Ku swa Pelisitine sa kilalra, ku Davidi ala ka kia tutalialalainga ki swa Iseraylri, la sarubu ki kwapingi si katwase, silape ki Davidi. La thingale ku Davidi, la katwase mulrawdru mwa ki kepale.

¹⁸ Ku swa Pelisitine la kela ka valrwalru Ripaime, si malranga talikai kwini.

¹⁹ Ku Davidi la kivaga ki Tamatama, “Lri maka mwaku kikaruburu ki swa Pelisitine? Lri paralubusu nakwane si pamalebe liniane?” La iya. Ku Tamatama la tubalre, “Lu mwa, lri tara paraalubaku si pamalebesu ki swa Pelisitine!” La iya.

²⁰ Ku Davidi la mwa kavai Baale Perezime, la ikai kwini pamalebe ki swa Pelisitine. Kwini lasu la kawriva, “Ku Tamatama pasarau ki labadhali, mia ki nielengane ka baiyu bulruthuku ki saelengane ka raedre.” La kamani kwini kipasi Baale Perezime iya.

²¹ Ku swa Pelisitine sa mubebere la cilri surunga ku samiamiange ikai kwini, ku Davidi si lakwapingini la malra iluku ki lakikwini samiamiange lini.

²² Kai tarathainu, ku swa Pelisitine la siwlringa mwa kavai valrwalru ka Ripaime, la malra kwini talikai kwini.

²³ Ku Davidi la peelanga kivaga ki Tamatama; ku Tamatama la tubalre, “Madha twalalai kikai mwa kikaruburu liniane, lragava si ngulralrilrikudru liniane, ngutatalikaiya ki mawtaliwliwdru kavai si kikaruburu liniane.

²⁴ Sana kilalrasu ku lingau ki sasirikane ki tapudrapalane ikai angatungatu, la makakaiya mwa kikaruburu, asi lwiyane aswalangaku icucubungu muswane mwa kikaruburu ki kwapingi ki swa Pelisitine”.

²⁵ Ku Davidi la singikai ku tadrekasane ki Tamatama pangimia. Kwini lasu la malra ki swa Pelisitine pasiwlri, twalai kavai Geba saladha padaruru kavai Gizere.