2 Samuile 4 - Ngudradreadrekadhane Ka Sisiu 魯凱語聖經

Kiapapacai ku Isibusite

¹ Ku Isibusite ka lalake ki Saule sa kilalra ku Abinere yakai ka Hiburungu kipapacai, la mukuludru turamuru; ku swa Iseraylri la makitu mukuludru turamuru makanaelre.

² Ku Isibusite yakai ku tadrusa ku tamatama ki kwapingi amani ku Baana si Rikabe; kwini lalasu lalake ki Rimungu ka swa Biruthe ka zuku ki Biniyamingi. (Kwini Biruthe taluvale ka swakai ki Biniyamingi.

³ Kudra nayakai Biruthe ku laumawmase matwasenga mubere mwa kavai Gitaime; kwini lalasu twalai kwini la ikaainga kavai Gitaime.)

⁴ Ku drumane ku mwabaibalrithi ki Saule, amani ku Mipibusithe ka lalake ki Yunathange. Sa kipapacai ku Saule si Yunathange, kwini lasu tara lrialrimana ka caili. Sa kela ku twalai Yezerile pelaela wapacai iya liniane, kudra tarapathuthuthu iniane la malra kebere si katwase mubere; ikai kwini sa kisaswararau, kwini tara pathuthuthu iniane la kai dradrele si la pawcilri iniane mucakena, la twalainga kwini, kwini lasu la kadrialre ku drapale.

⁵ Ku Rikabe si Baana la mwa ki taikaikaiyane ki Isibusite, sa kela kwini yacengecenge ku vai ka mwalringedele kadralrangedrange, ku Isibusite laka waapece.

⁶ Kudra wakadrekadrenge ku ababai la kabalrebalre ki tatapusane ki mugi, la kirimu ngikatatudru. Ku Rikabe si Baana la katwase kibubuli mudaane.

⁷ Kwini lalasu sa mudaanenga, la mwa ki tapeapecane ki Isibusite, ku Isibusite la apece si sakaereke turamuru, kwini lalasu la pwa papacai iniane, la malra vathale ku awlruini, la makavale ki awngane ikadadalranane, la ngukakai valrwalru Yuredange.

⁸ Kwini lalasu la iluku kwini awlru mwa Hiburungu kidrele ki Davidi ka talialalai, la kawriva iniane, “Kikai awlru ki badhasu ka Isibusite ka lalake ki Saule iya. Ku Saule kiadredreedreme ku papacai muswane ka talialalai, kaikameane ku Tamatama wabilringa ikai ki Saule si lamwabaibalrithi iniane.”

⁹ Ku Davidi la tubalre, “Lri papiaku kwidra ki palribulu nakwane pakidaili ki sanaka matiaukuludru ka palralrawthu ka Tamatama kiketekete.

¹⁰ Ikai Zikelage kudra wakela pelaela nakwane ku tapacadhane ki Saule, nau pakiragai iya nakwane. Wamalraku ruthuku, si papacai iniane. Kikai ala amani ku sapakalrevaneli kwini ki wakela pelaela ku tangimiamiane!

¹¹ Laikamanianenga numi ka madraadrau ku pasalrivane ku ngangane ka umawmase! Arakai numi ku tasakaerekane icengecenge kwini ki kadrwa ku pasalrivane ka umawmase, la pikai numi ki daaneini si malra papacai iniane. Kaiasasane lri ngwaladhaku kudra takibubuliane numi si papacai iniane si pangibilri numiane, patwalai kai kawmasane pakamudu numiane!”

¹² Ku Davidi la drekase kwini ki lakiacapilini malra ki Rikabe si Baana papacai, si retege kwini alrima si drapale lini, la malra kwini kinawmasane kelrai pithili ki taciladhane ka Hiburungu, la malra ku awlru ki Isibusite dralreke pikai Hiburungu, pikai ki takidralrekane ki Abinere.