2 Samuile 3 - Ngudradreadrekadhane Ka Sisiu 魯凱語聖經

¹ Ku palakelakebe ki tai Saule ka lakwapingi si kwapingi ki Davidi maulai makakaruburu. Ku Davidi lukakaiya lukakaiya arwa sapukupukuane, ai ku tai Saule lukakaiya lukakaiya arwa turamuraamuru.

Lalalake ki Davidi

² Ku Davidi sa ikai Hiburungu twalalake ku taeneme ku lasawvalalai. Lu singikaiyane ku tamasakaikaiyane lini kitulalake, kwini lalasu ngimiyaiya kikai ku tamasakaikaiyane: Amenungu ka tulalake ki Ahinuame ka swa Yezerile,

³ Kilriabe ka tulalake ki Abigaile ka nataelrelre ki Nabale ka swa Karemile; Abesalrume ka tulalake ki Maka ka lalake ki Talamai ka talialalai ki Gisure;

⁴ Aduniya ka tulalake ki Hagithe; Sepatia ka tulalake ki Abitale;

⁵ Itherime ka tulalake ki Igela. Kikai taeneme ka lalalake ki Davidi ka lasawvalalai makitwa kitulalake ikai Hiburungu.

Mwatalu ki Davidi ku Abinere

⁶ Ku kwapingi ki Davidi si kwidra tara lakelakebe ki tai Saule ka laumawmase la kai karetege ku amakaruruburane; ikai ki lakwapingi ki Saule, ku Abinere ka tamatama ki kwapingi la aru sapukupukuane.

⁷ La ikai ku tangea ku labaibai ki Saule ka sia Rizepa, ka lalake ki Aiya. La ikai ku minakavalane, ku Isibusite ka lalake ki Saule la kivaga ki Abinere, “Asu mwa tadrusa ki taelrelre ki ama apece?”

⁸ Kikai la pakagirimucu ki Abinere turamuru; kwini lasu la kawriva, “Lu kidremedremesu lri pwaku kilangai ki Saule? Kiapawtengasu pasiakaikai ki swa Yuda kaungu amiasu nakwane? Twalai singikapathagili twakucingacingalraku ki tamasu ka Saule si labetakaneini, latalragini; la mialriaku palribulu muswane, kai kipawkadrulu ki Davidi. Kaikameane, la ngwalaisu kwini ki tangeangea ka ababai si kaelaela nakwane.

^9-10 Ku Tamatama napwavaga palraingi ki Davidi ku apatwaladhane ki alrima ki lamwabaibalrithi ki Saule malra ku sarathudane ki kuni ku puku, si tutalialalai ki Davidi ki swa Iseraylri si swa Yuda, twalai tali dradha ki Dange padaruru kavai salrawlrawdrunga ka Bereseba. Kaiasasane, lwiyasi la kainaku pakisamula si ngimia kikai, ku Twaumase anipapacai nakwane!”

¹¹ Ku Isibusite la mukuludru turamuru ki Abinere, kai kawariva akuvale.

¹² Ku Abinere la sikawlu mwa ki Davidi, kawriva, “Aneane ku nau rathudu amiamia kai ki kuni? Lwiyasi la makakiketeketesu nakwane, nau paralubu muswane rathudu paelrelre ki swa Iseraylri.”

¹³ Ku Davidi la kawriva, “Mathariri, nau kiketekete muswane; ai yakai ku vaeva ku akitubianeli, Lu kelasu kidrele nakwane, mailuka ki lalake ki Saule ka Mikale ka ababai kela kai.”

¹⁴ Ku Davidi la sikawlu mwa kidrele ki Isibusite, iya kai, “Ta sawlriaili kwini ki taelrelreli ka Mikale! Kwini alisu amani ku arakaili ku idai ku lrangici ki sawvaladhane ki swa Pelisitine tusakibalrithane.”

¹⁵ Ku Isibusite la sikawlu ku umawmase mwa ki Paletile ka lalake ki Laisi ka taelrelre ki Mikale patwalai kwini malra ki Mikale iluku.

¹⁶ Ku Paletile la kabibilrili ki Mikale dadadavace takutubitubi, kabibilrili daruru ka Bahurime. Ku Abinere la kawriva iniane, “Lu siwlria mubalriu!” Ku Paletile la katwase siwlri mubalriu.

¹⁷ Ku Abinere la mwa kavai ki laciwru ki swa Iseraylri, la kawriva liniane, “Kikai maulainga turamuru, ku tasidramane numi ani atalialalai iya ki Davidi,

¹⁸ kaiasasane, wakelanga kikai vai numi. Kunumi la tara pulringava ku Tamatama naamia kai, ‘Lri arakaiyaku ki sasiakawluli ka Davidi palribulu ki mapapangaleli ka swa Iseraylri kidaili ki alrima ki swa Pelisitine si sanaka labadha lini.’ ”

¹⁹ Ku Abinere la mialri kawariva ki zuku ki swa Biniyamingi ku thadalrane ku vaga, ala katwase mwa ka Hiburungu, la malra pelaela ki Davidi kudra palraingi ki swa Biniyamingi si swa Iseraylri.

²⁰ Ku Abinere sa iluku ku tamapusale ku umawmase mwa Hiburungu kidrele ki Davidi, ku Davidi la pangiakaneane liniane.

²¹ Ku Abinere la kawriva ki Davidi, “Kaiasasane, lri dawlaku makanaelre ki swa Iseraylri kela tupapalra si tutalialalai muswane, lani kiketekete muswane, lani ngimia kwini kidremedremedremesu, rathudu palraelre.” Ku Davidi la pakakecenge ku apalakebaneini ki Abinere, ala sateatedre iniane pukadadalranane.

Papacai ki Abinere ki Yuabe

²² La kai tarathainu, ku Yuabe si lakiacapicapili ki Davidi la mwa kikaruburu ki badha si siwlringa, la mailuku ku makaalra ku niravasane. Ai kwini, kai yakainga Hiburungu ku Abinere, asi lwiyane ku Davidi palakebenga ku akasulivalivataneini, la pakatwase iniane.

²³ Ku Yuabe si lakwapingini sa siwlringa mwa Hiburungu, la ikai ku peaelaela iniane wakela ku Abinere kidrele ki talialalai ka Davidi, si ku Davidi la palakebe iniane ku akasulivalivaatane, si pakatwasenga iniane.

²⁴ Ku Yuabe la mwa kidrele ki talialalai ka Davidi, iya kai, “Manemane ku piasu? Wakela kidrele muswane ku Abinere, asu pakatwase iniane?

²⁵ Wathingalesu, ku kela kikai ki Abinere ka lalake ki Nere, pakai ku alrilrigilane muswane, kela lrilriu ku tangukaiyanesu mudaane mulatadre si kudra lapiapiasu.”

²⁶ Ku Yuabe sa katwasenga ki Davidi, la sikawlu ki sasiakawlu mwa saladha ki Abinere, la patwalai ki tamwalrwalrwane ka dralremedreme kavai Sira malra iluku ki Abinere; ai kai wathingathingale ku Davidi kikai.

²⁷ Ku Abinere sa siwlri mwa Hiburungu, ku Yuabe la malra iniane bilibili puthili ki taelelebane ki cekele, ngikaiyaiyane miakau lri tetenge iniane, la pikai kwini culrulu ki barangeini. La mia kikai, ku Abinere laka kialrigili si kipapacai, asi lwiyane ku Abinere napapacai ki agi ki Yuabe ka Asahele.

²⁸ Sa kilalranga ku Davidi kikai, la kawriva, “Wathingale ku Tamatama kikai takipapacadhane ki Abinere ka kadrwa ku capilaneli si kai mapapangaleli.

²⁹ Kudra sacugane ani makakai ki Yuabe si mwabalribalrithi ka la wacekecekeleini! Ku laumawmase lini ani kai karetege ku akipucaemanane ki siaeraerai si maraibiu, si ku kathane ku paababadhanane ku adulrwane lini kaungu, ku kiara lrabu, ku kiara silravane pacai.”

³⁰ La ngimia kikai, ku Yuabe si takataka ka agini ka Abisai, ku papacai lini ki Abinere, wabilri kudra tapapacadhaneini ki agi lini ka Asahele ikai ki takikaruburuburane ka Gibiungu.

Wadralreke ki Abinere

³¹ Ku Davidi la drekase ki Yuabe si lakwapingini makitu thuriace ku laimai, si sisakalremeane ku kaimadhane, pasikai ki Abinere si tubi. Saka tasukubane ki tasateatedrane, ku talialalai ka Davidi la ilrilrikudru ki varukuru tupapalra katwase.

³² Ku Abinere la kidralreke ikai Hiburungu. Ku talialalai la tubi ikai ki takidralrekaneini; ku mapapangale makanaelre la mialri tubi turamuru.

³³ Ku talialalai ka Davidi la tusenai ku satubiane ki Abinere: Kai Abinere, ata kai pasudalepe kai tapacadhaneini?

³⁴ Ku maecebe ku alrimasu kai kiakerenge; ku maecebe ku drapalesu kai kiaerece. Ai ku tapacadhanesu mia ki kiapapacai ki sadre! Ku mapapangale, la pasikaiyana ki Abinere tubi.

³⁵ Twaraakete ku laumawmase makanaelre, makitu kanea iya ki Davidi, ai ku Davidi kiathupu, “Lwiyasi la kaneaku sakaiyana lriwgu ka vai, ku Twaumase ani papacai nakwane la iya!”.

³⁶ Wathingale makanaelre kikai, la kiraragai ku tapangimiane kikai ki talialalai. Ku patengatengane, sanaka tapangimiane ki talialalai kwini lalasu makitwa kiraragai.

³⁷ Ikai kai ki vai, kudra twapapalra ki Davidi si swa Iseraylri makanaelre, wathingale ala ka kai kiapaelre kai talialalai kikai tapapacadhane ki Abinere.

³⁸ Ku talialalai la kawriva ki lakiacapilini, “Laibekace kai numi thingale kikaikameane ala ka wapacai ku tangea ka saniange ka tamatama ki kwapingi ki swa Iseraylri?

³⁹ Kaikameane, adravanaku ka tutalialalai ki Twaumase, mialriaku kakadrwa ku puku. Kikai tadrusa ka lalake ki Ziruia mabebetethe turamuru, kainaku maka wathingale ku apangitumananeli liniane. Ani ka Tamatamanga ka singiakai ku pasalrivane lini si pathavungu liniane!”