2 Samuile 24 - Ngudradreadrekadhane Ka Sisiu 魯凱語聖經

Waasipi ku Davidi ku tatathane ki laumawmase

¹ Ku swa Iseraylri la pelanga pakagirimucu ki Tamatama, lakamani ku Twaumase kalrithethe ku lrika apakawpungane ki Davidi liniane. Ku Tamatama la iya kai ki Davidi, “Lu katwasa asipi ku tatathane ku umawmase ki swa Iseraylri si swa Yuda.”

² Ku talialalai ka Davidi la drekase ki tamatama ki kwapingi ka Yuabe iya kai, “Iluka ki lakwapingisu, la katwase salraelre ki lazuku ki swa Iseraylri, twalai tali dradha kavai Dange kela kavai tali lrawdru Bereseba asipi ki mapapangale. La nau thingale ku tatathane ki mapapangale.”

³ Ai ku Yuabe twabalre, “Talialalai, ku Tamatama ka Twaumasesu ani padrima ku makaakalra kai ki tatathane kaiasasane ki umawmase ka ta idadhane. Anatumane la dulrusu drele ku takaungane ki Twaumase. Ai, talialalai asu kirimu pia kikai?”

⁴ Ai ku talialalai makeecenge ku lrika apasalaladhane kai drekaseini ki Yuabe si lakwapingini, kwini lalasu la katwase ki talialalai, mwa asipi ki mapapangale ki swa Iseraylri.

⁵ Kwini lalasu la talubalre kadravane Yuredange, ikai talikai lrawdru cekele ka Arure kwini vaalru kavai Gade tutakwapingane, ala twalai kwini papia tali dradha kela kavai Yazere,

⁶ ala mwa ka Gileade si Kadise talikai Hite, ala mwa kavai Dange, ala twalai Dange papia tali sapakalriwgu kela ka Sidune,

⁷ ala papia tali lrawdru, kela kavai nialradrane ka cekele kavai Tayre, si mwa palraelre ki lacekele ki swa Hivi si swa Kanange, ku bibiilrilinga ala mwa kavai tali lrawdru Yuda kavai Bereseba.

⁸ Kwini lalasu alraelrenga ki kuni, maka bangate ka dramare si mapusale ku vai, ala siwlri mwa Yerusalrime.

⁹ Ku Yuabe la mwa pelaela ki talialalai, ku swa Iseraylri ku wailuku ku sakikaruburane ku adreme ka sawvalai paelreelrenga ta 800,000; ku sawvalai ki swa Yuda paelreelrenga ta 500,000.

¹⁰ Sa maka asipinga ki mapapangale ku Davidi, kai masulivate ku kidremedremeini, la iya kai ki Tamatama, “Kikai tapianeli kikai pasalrivaku turamuru. Kiatubiaku muswane pacepaili! Kai tapianeli ngiakulrungu turamuru.”

^11-12 Ku Tamatama amia kai ki yuginsia ka Gade ka yuginsia ki Davidi, “Lu mwa pelaela ki Davidi, lri baadhaku ku taitulrwane papilri iniane, lu pilri ku manemane, lri piyaku ku manemane.” Sakakaiyane ki mialrealre, sa ngidrakalenga ku Davidi,

¹³ ku Gade la mwa kawriva iniane, si pelaela iniane ku taiyane ki Tamatama, la kivaga ki Davidi, “Saininu ku apilrianesu? Ikai ki kunisu itara tulru ka caili ku kalasilravane? Ku yakaisu cucubungu ki badhasu mubebebere taratulru ka dramare? Ku yakai ki kunisu makatulrulu ku swalrubu? Ala kidremedreema, ala pelaela nakwane ku apangimiane tubalre ki Tamatama.”

¹⁴ Ku Davidi amia kai, “Anau pakakuciingale. Kainaku palraingi kipathavungu ki umawmase; madadalamaku luka Tamatama ku pathavungu nakwane, asi lwiyane ku Tamatama swaete ku kalithane.”

¹⁵ Ku Tamatama la pulebe ku swalrubu mwa ki swa Iseraylri, twalai kwini ki mialrealre pakela ki takelretane ka vai, twalai tali dradha Dange kela tali lrawdru Bereseba la ta 70,000 ku swa Iseraylri ku wapacai.

¹⁶ Ku sasiakawlu belenge salri amudu kavai Yerusalrime yai, ku Tamatama la akabalrithi ku kidremedreme kudra naapathavungane ki swa Iseraylri, la kawriva kwini ki marasiakaikai ku amudane papacai ka sasiakawlu belenge, “Pisadraanga, makakelretenga!” Sakamani kwidra, ku sasiakawlu belenge yakai ki tavelavelatane ki mugi ki tai Arauna ka swa Yebuse.

¹⁷ Ku Davidi sadrele kwini ki marasiakaikai ku amudane papacai ka sasiakawlu belenge, la kawriva ki Tamatama iya kai, “Amaniaku ka pasalriu, ala amaniaku kudra paiya pasalriu. Kikai lamatiakuru kai mapapangale manemane ku pia lini? Naika pathavungusu nakwane si wacekecekeleli!”

¹⁸ Kwini ki vai, ku Gade matwase kikawriva ki Davidi, si iya kai iniane, “Lu mwa kavai tavelavelatane ki mugi ki Arauna, ikai kavai pasikai ki Tamatama cegecege ku vaeva ku tapatarumaramarane.”

¹⁹ Ku Davidi la singikai ki Gade ku takipangukaiyane ki Tamatama drekase ku vaga si katwase.

²⁰ Ku Arauna la paswalrau drele, la drele ki talialalai si kiacapilini papiapia iniane kainganai, la katwase arwacucubungu guruthungane icucubungu ki Davidi,

²¹ la kivaga iniane, “Talialalai manemane ku kelasu kai?” La iya kai ku Davidi, “Lri langadhaku kai tavelavelatane ki mugisu, pasikai ki Tamatama cegecege ku vaeva ku tapatarumaramarane, si kitubi paidrengere ki swalrubu.”

²² Ku Arauna la iya kai, “Malra talialalai malra ku kadaalamesu si patarumara ki Tamatama. Yakai kai lwange kaikatumane malra tu Lama ka lrisi, la ikai kai tikungu si savelavelatane kaikatumane arakai pwangatu.”

²³ Ku Arauna la malra kikai patuelre baai ki talialalai, si iya kai, “Ku Tamatama ka Twaumasesu ani kiragai ku patarumarasu.”

²⁴ Ai ku talialalai amia kai, “Ini, lri singikaiyaku ku takathaane ku paisu langai muswane; kainaku lri papia ki Tamatama ka Twaumaseli patarumara ku nivuthane malra ku sapatarumarane ku waudriwdripi.” Ku Davidi la arakai ku malrimale ka gingi malra langai kwini tavelavelatane ki mugi si lwange,

²⁵ ala pasikai ki Tamatama cegecege ku vaeva ku tapatarumaramarane, la patarumara ku Lama ka lrisi si Sulivatane ka lrisi. Ku Tamatama la kilalra ku inulri kitubi ki talialalai, ku swalrubu la idrengere ikai ki swa Iseraylri kai aruswadrawnga.