2 Samuile 23 - Ngudradreadrekadhane Ka Sisiu 魯凱語聖經

Bibiilrilinga ku vaga ki Davidi

¹ Ku lalake ki Yesi ka Davidi amani ku tukuciingalre ki Twaumase arakai; ku Twaumase ki Yakubu padelreme cegecege iniane tutalialalai. Ku Davidi la pasikai ki swa Iseraylri tusenai ku tathaaithariri ku senai. Kikai lebe kai senai kai yai amani ku bibiilrilinga ka vagaini:

² Pangwakai nakwane kawriva ku Ri ki Tamatama; ka mathariri ka vaga yakai ki bibianeli.

³ Kawariva ku Twaumase ki swa Iseraylri, kawariva nakwane ku tarapalakebe ki swa Iseraylri; kwidra arakai ku dringelresane rathudu ki mapapangale, arakai ku musakenane ki Twaumase magagemegeme ku puku ka talialalai,

⁴ mia ki ledra ki lrau ki vai, mia ki vai paledra ki ngwalralrivadhane ka mialrealre, sa maka udalenga ku laubulu la cebecebenga.

⁵ Ku Twaumase lri tungimiyaiya kikai marasikai ki lamwabaibalrithili, asi lwiyane ku Twaumase kiaketekete nakwane ku palralrawthu ka sakiketeketane, kaika asuburanenga tamakaketeketane. Ku Twaumase lri tara pangimia ku sidramadramali, ku akipalribulaneli.

⁶ Ku kai mwasakene ka umawmase mia ki kiacilri ka cecenekane ka angatu, kadrwa ku naaneanenga kulri maka arakai ku alrima ecenge iniane,

⁷ nau ecenge luiya lri tara arakaai ku adreme ka ukudru si adreme ka idiri; atara arakaiyane madu ku apwi lama utu.

Latamagarange ka kwapingi ki Davidi

⁸ Ku tamagarange ka lakwapingi ki Davidi ku nagane lini: ku aswalaalanga amani ku Yusebe Basebethe ka swa Takemungu; kwini lasu amani kudra tamatama ki “Magagarangenga ka tatulru” niyane. Kwini lasu ki ningusivavalane kikaruburu arakai ku idiri culrulu ki ta 800 ku umawmase.

⁹ Kwini mwasakadrusa ki “Magagarangenga ka tatulru” amani ku Ilriazare ka lalake ki Dudu ka swakai ki zuku ki Ahu. Yakai saka nisanguvalane, kwini lasu twapalra ki Davidi mwa kidresenge kikaruburu ki lri kikaruburu ki Davidi ka swa Pelisitine. Ku swa Iseraylri la siwlringa,

¹⁰ ai kwini lasu acegecege ikai kwini makakaruburu ki swa Pelisitine, pakela ku matukululu ku alrimaini, kai maka lruka ku yakai ki alrimaini ku dramu. Kikwini ki vai, ku Tamatama la paakaci ki swa Iseraylri. Sa maka makarurubulunga, ku swa Iseraylri la siwlri mwa Ilrizare, la malra patuelre ku lasakikaruburuburane ki kwapingi ka laimai patwalai ki lawapacai ka kwapingi ki badha.

¹¹ Kwini mwasakatulru ki “Magagarangenga ki tatulru” amani ku Samahe ka lalake ki Age ka swa Harare. Sa isarubu ku swa Pelisitine ikai ki lalepelepane ki Lrihi, ku swa Iseraylri makitua mubere,

¹² ai ku Samahe la acegecege ikai ki umawma kidresenge liniane, la papacai ku takaalra ki swa Pelisitine. Kikwini ki vai, ku Tamatama paakaci ki swa Iseraylri.

¹³ Sa kitaletaleke yai, kwini ki “Ta matulrulu ka tamagarange” la ikai ku tatulru ku mwa lrawdru mwa ki taikaiyane ki Davidi kavai Adulame ka barungulu. Sakamani kwidra, la ikai ku lakwapingi ki swa Pelisitine twatakwapingane ikai valrwalru Ripaime.

¹⁴ Ku Davidi la ikai kudra ki nialradrane lregelrege belenge; la ikai ku la swa Pelisitine ku wamalra ka Bithelrihime.

¹⁵ Ku Davidi la kabarengere turamuru ki cekeleini la iya kai, “Apia ungulaku ku acilai ka dralremedreme thili ki lrawlrawdru ki cekele Bithelrihime!”

¹⁶ Kwini tatulru ka tamagarange ka kwapingi la mwa lribate ki takwapingane ki swa Pelisitine, patwalai kwini ki dralremedreme vau ku acilai, la iluku si baai ki Davidi. Ai ku Davidi kai waungulu, la maalralringa kwini acilai gugu, la tusapatarumarane si patarumara ki Tamatama.

¹⁷ La iya kai, “Tamatama, anaku maka lreme ungulu kikai acilai! Lu ungulaku maru waungulungaku ku erai kikai ki kiapacai si mwa malra kai acilai ka tamagarange ka kwapingi?” La iya si kai ungulu ku Davidi. Kikai yai amani ku tapiane kai ki tatulru ka tamagarange ka kwapingi.

¹⁸ Ku Abisai ka agi ki Yuabe amani ku tamatama ki “Tamatulrulu ka tamagarange ka kwapingi”. Kai lasu naarakai ku idiri culrulu papacai ki ta 300, lakamani ku athingalaneini ikai ki “Tamatulrulu ka tamagarange ka kwapingi”.

¹⁹ Kai lasu ikai ki “Tamatulrulu ka tamagarange ka kwapingi” malrilriigilinga turamuru, la atamatama liniane. Ai kaiyana ka paramia ku nagane ki “Magagarangenga ki tatulru”.

²⁰ Ku Binaia ka lalake ki Yehuiada ka swa Kabezele mialri ka kiamatikaikai ka tangeea ka tamagarange. Kai lasu makalra ku matiasamali ku tapianeini, paelre kudra tapapacadhaneini ku tadrusa ku sapukwane ku kwapingi ki swa Muabe. Kai lasu nayakai ki kalapasabuane mwadringi ki lrubange, papacai ku vaeva ku raiyungu.

²¹ Kai lasu la papaacainga ku sapukwane ka swa Izipiti; kwini lasu wamalra ku malragi ku idiri, kai Binaia la arakai ku ukudru kidresenge iniane; ku Binaia la ribici ku idiri. La arakai kwini idiri papacai iniane.

²² Kikai amani ku takagarangane ki Binaia; kai lasu amani ku tangea ki “Tamatulrulu ka tamagarange ka kwapingi” niyane,

²³ ka amani ku tangea ka mwakalrivili turamuru, ai kai walribate ki “Magagarangenga ki tatulru” ku takilrigwane. Ku Davidi la sikawlu iniane atamatama ki tarapalakebe ki Davidi.

^24-39 Kai ki “Tamatulrulu ka tamagarange ka kwapingi” ku drumane yakai ku: Asahele ka agi ki Yuabe Ilanane ka lalake ki Dudu ka swa Bithelrihime Sama si Ilika ka swa Harude Hilize ka swa Paleti Ira ka lalake ki Ikise ka swa Tikua Abiezere ka swa Anatute Mibunai ka swa Husa Zalemungu ka swa Ahu Maharai ka swa Nitupa Helebe ka lalake ki Baana ka swa Nitupa Itai ka lalake ki Ribai ka swa Gibia ka Biniyamingi ka zuku Binaia ka swa Pirathunge Hidai ka swa Gase valrwalru Abi Alubungu ka swa Araba Azemavete ka swa Bahurime Ilriaheba ka swa Salebungu Lalalake ki Yasenge Yunathange Sama ka swa Harare Ahiame ka lalake ki Sarare ka swa Harare Ilripelete ka lalake ki Ahasebai ka swa Maka Ilriame ka lalake ki Ahitupele ka swa Gilu Hezeru ka swa Karemile Parai ka swa Arabi Igale ka lalake ki Nathange ka swa Zuba Bani twalai Gade Zeleke ka swa Amune Naharai ka swa Biruthe (tara ililuku ku adreme ki Yuabe ka lalake ki Ziruia) Ira si Garebe ka swa Itheri Uria ka swa Hite. Patuelrenga ta 37 kudra tamagarange ka kwapingi niyane.