2 Samuile 22 - Ngudradreadrekadhane Ka Sisiu 魯凱語聖經

Putariri ka senai ki Davidi

¹ Ku Tamatama sa palribulu ki Davidi kidaili ki alrima ki Saule si drumane ka badha, ku Davidi la papia ki Tamatama senai ku vaeva ku senai:

² Ku Tamatama amani ku palakebe nakwane ka alrisapesape ka kepale;

³ ku Twaumaseli amani ku paidringi ka takibaladhane, amani ku palakebe ka alathareli, si takilakebane, amani ku takipalribulribulaneli, palribulu nakwane kidaili ki akilrumadhane.

⁴ Papiaku ki nai kidrengedrengere ka Tamatama kitubi, la palribulu nakwane kidaili ki badha.

⁵ Ku bikabiki ki apacadhane ngiathalringulu nakwane; ku saamudane ka lriau kiadresenge nakwane;

⁶ ku sakerekerengane ki swadriadringi walripalripi nakwane; ku lravathe ki tadralredralrekane mwakalavalava nakwane.

⁷ Yakaiyaku ki akwalriane kitubi ki Tamatama; kiatubiaku ku aparalubane ki Twaumaseli. Ku Twaumase yakai ki daaneini kilalra ku lingauli; ku takitubianeli wamwa ki calringaini.

⁸ Sakamani kwidra, kai kadaengane walingilingi; ku karwalai belenge la manugiligili, asi lwiyane malisi ku Twaumase.

⁹ Twaebebelre ku ngungwaneini, ku ngudwi wakelrabe ku apwi adravane ka lrangele kwadalai.

¹⁰ Ku Twaumase mwaelebe belenge, si ngikakamani mulebe; yakai ku makuceege ku ememe itailebe ki drapaleini.

¹¹ Ngwakai ki Kirubime ngipalai; adrelane ibelenge ki sapakepake ka valrigi.

¹² Arakai ku dradrimitane ngisasekete; ku makuceege ka ememe mailuku ku acilai thalringulu iniane;

¹³ twalai ki cucubunguini ku ledra ki lrangele ka apwi kelrabe.

¹⁴ Twalai belenge padreredrere ku Tamatama; alalingau ku Abebeelengenga.

¹⁵ Walraili pasivagavagai ki badhaini; palrikace si pathirakupu liniane.

¹⁶ Sana kaelaela ku Tamatama ki badha, ikai ki lisianeini giringi liniane, athingalane ku cakena ki laveke, ku balace ki kadaengane la adrelane.

¹⁷ Ku Tamatama twalai belenge tale ruthuku nakwane, patwalai ki maadrau ka acilai bilibili nakwane.

¹⁸ Palribulu nakwane kidaili ki alrima ki magarange ka badha, si kidailinga ki magirimucu nakwane, asi lwiyane yadrepele ka sapupukuane nakwane.

¹⁹ Sa kipadradresengaku ku matikurwane, kwini lalasu wakela lrumai nakwane, ai ku Tamatama palakebe nakwane.

²⁰ Wasangiluku nakwane kidaili ki tamatiukuludrane; palribulu nakwane, asi lwiyane madalame nakwane.

²¹ Ngwalai ki dringelresaneli la pangibilri ku Tamatama nakwane, ngwalai ki takivuthaneli si subulrubulru nakwane.

²² Paluludaku ku kadadalranane ki Tamatama; kadrwana ku tabaebalreaneli ki Twaumase.

²³ Paluludaku patuelre ku hulriceini; kainaku kiadailiana ki drekaseini.

²⁴ Ku Twaumase wathingale ala ka kadrwa ku tapasalrivaneli; kiadailaku ki ngialisiane.

²⁵ Lakamani ku singikaini ki dringelresaneli pangibilri nakwane, asi lwiyane wathingale ka kiavuthaku kitupasalrivane.

²⁶ Tamatama, arakaisu ku patengatengane marasikai ki patengatengane ka umawmase; arakaisu ku kiatulrepenge marasikai ki kiatulrepenge ka umawmase.

²⁷ Ku mabula, arakaisu ku mabula marasikai iniane; ku ngialisiane, la tubadhasu drele iniane.

²⁸ Palribulusu ki matiakukuru ka umawmase, twabadhasu drele si paaru alebe ki ngiakalrilrigu ka umawmase.

²⁹ Tamatama, amanisu ku ledrali; ku Twaumaseli pasiakai nakwane pakatwase ki dradrimitane.

³⁰ Wabaaisu nakwane ku sakikaruburane ki badha ku puku, si dulru kabebetethe ki sangipapalakebane lini.

³¹ Kikai Twaumase, ku takaunganeini kiatulrepenge turamuru! Ku vagaini matiasudralru turamuru! Ku Twaumase mia ki alathare palakebe ki sanaka satalu iniane ku umawmase.

³² Kathane ka Tamatama, kadrwa ku drumane ku Twaumase; kathane ku Twaumase ka alrisapesape palakebe mitane.

³³ Kikai Twaumase amani ku makecenge ka takipalakebane; pakasulivalivate ki kadalrananeli.

³⁴ Ku Twaumase pangiamia nakwane ki thadi ku tapudrapalane kapapedrenge, la dulrwaku acegecege kapapedrenge ikai ki abelenge ki lregelrege.

³⁵ Pakiacakwane nakwane kikaruburu, la dulrwaku bilakace ku makececengenga ku bu.

³⁶ Tamatama, ku amanisu ku alathareli ka palribulu nakwane; palakebesu nakwane si pangiradhekane.

³⁷ Pangwadrausu ku kadalrananeli, kadrwana ku tamwadrekananeli.

³⁸ Wasaladhaku ki badha, si amudu liniane; lu kainaku pamalebe liniane, kainaku lri siwlri.

³⁹ Patwabakebakaku liniane, la kai maka ngidrakalenga; kwini lalasu makitua tubakebake icucubungu nakwane.

⁴⁰ Wabaaisu ku pukuli kikaruburu; la maka paruthukusu nakwane ki badha.

⁴¹ Pamwaberesu ki badhali; pakamudusu ki magirimucu nakwane.

⁴² Kwi lalasu kiatubi ku akipalribulane, ai kadrwa ku umawmase ku wadulru palribulu liniane; kwi lalasu papia ki Tamatama kitubi, ai kai kiatubalre.

⁴³ Kwi lalasu papia ki Twaumase kitubi, ai kai kiatubalre. Wadradredreaku liniane, mia ki wadredre ki dae kadalranane cekele.

⁴⁴ Patwalaisu ki wabaebalre ka laumawmase palribulu nakwane, la cegecege nakwane tutamatama ki lakuni; adravane ka maelane ka zuku la mialri pasalaladhanga nakwane.

⁴⁵ Kwi lalasu sa kilalra nakwane pasalalaadha; ku maelane ka zuku makitua guruthungane icucubungu nakwane.

⁴⁶ Kwi lalasu amalremenga, mwakuludru manwageregere mulatadre ki tasalikaiyane kikaruburu.

⁴⁷ Ku Tamatama palralrawthu panianianiake! Drengedrengera ki palakebe nakwane! Ku Twaumase amani ku palribulu nakwane, pelaela pasalraelre ku takasanianganeini!

⁴⁸ Paakaci nakwane ki badha; sanaka zuku la kusange nakwane.

⁴⁹ La palribulu nakwane kidaili ki badha. Tamatama, paakacisu nakwane ki badha; palakebesu nakwane kidaili ki ngiakarakacane ka umawmase.

⁵⁰ Lakamani kikai, lri ikaiyaku ki lakuni drengedrengere muswane; lri senadhaku drengedrengere muswane.

⁵¹ Ku Twaumase tapaakaciane ki cegecegeini ka talialalai; ku Twaumase papia ki pilrini ka Davidi si lamwabaibalrithi putaluvaivai ku kai maelaela ka sakialibake.