2 Samuile 21 - Ngudradreadrekadhane Ka Sisiu 魯凱語聖經

Kiapapacai ku lamwabaibalrithi ki Saule

¹ Saicengecenge ku Davidi ka amani ka warathurathudu nakiapadradresenge ku kiapakilringau ku kalasilravane, taratulrulringa ka caili. Ku Davidi la ngwalai kikai si kivaga ki Tamatama; ku Tamatama la iya kai, “Kikai ngwalai sa papacai kai Saule si wacekecekeleini ki umawmase ka pasalrivane, papacai ki laumawmase ki swa kai Gibiungu kai lasu.”

² (Kwini umawmase ki swa Gibiungu kaika swa Iseraylri ka umawmase; kwini lalasu amani kudra tabekele ka zuku ikai ki swa tali Amuri. Ku swa Iseraylri namakaketekete liniane, ku apalakebane liniane, ai ku kidremedreme ki Saule pasanu amwamudu kamani liniane, asi lwiyane kai lasu madadalame kamani ki swa Iseraylri si swa Yuda.)

³ Ku Davidi la dawlu ki swa Gibiungu, la iya kai liniane, “Manemane ku adulrwaneli pasikai numiane? Palraingaku pangisawlri kudra takipakwalriane numi, lanu maka subulrubulru ki mapapangale ki Tamatama.”

⁴ Kwini lalasu la kawriva, “Ku tamakakarivurivwane nai ki tai Saule kaika adulrwane arakai ku paisu si turathudane; la kai nai palraingi ku napapacainga ki swa Iseraylri.” Ku Davidi la kivaga, “Lukamiyaiya kwini, lu kidremedreme numi laka nai pasikaiyaku numiane tumane?”

⁵ Kwini lalasu la iya kai ki talialalai, “Kiabuli nau papacai iya naiane ku Saule, nau amudu iya naiane, kai palraingi naiane ikai ku tasakaiyane panianiake ikai ki swa Iseraylri.

⁶ Lakamani kwidra, ala patwaladha ki lamwabaibalrithi iniane baai naiane ku tapitu ku lasawvalalai; la nai ikai Gibiathe, icucubungu ki Tamatama malra liniane takeakelrai, ikai kwini ki tapilriane tutalialalai ki cekele ki Saule takeakelrai papacai liniane.” Ku talialalai la kawriva, “Lri dulrwaku malra liniane si baai numiane” la iya.

⁷ Ku Davidi ka talialalai la ngwalai kudra natamakaketeketaneini ki Yunathange, lakamani ku pasuruini ki lalake ki Yunathange ka Mipibusithe ka agane ki Saule,

⁸ la malralringa kwini ki lalake ki Rizepa ka pasikaini ki Saule tulalake ka Aremuni si Mipibusithe, ka lagagane ki Aiya baai liniane. Lamialri malra kwini ki talrima ka sawvalalai ka lalalake ki Mirabe si Aderiele baai liniane, kai Mirabe lalake ki Saule, kai Aderiele laka lalake ki Barezilai ka swa Mehula.

⁹ Ku Davidi wamalra liniane baai ki swa Gibiungu; ku swa Gibiungu la ikai lregelrege, ikai cucubungu ki Tamatama takeakelrai papacai liniane. Kikai tapitu marededele pacai. Kwini lalasu sa kipapacapacai yacengecenge ka ngialribalribate ki kalarigarigane, pathagili ka kalakimugiane.

¹⁰ Ku mikaki ki Saule ka Rizepa ka lalake ki Aiya, la ikai kwini adethe ki kinawmasane, la arakai ku kaimadhane ikai belenge ki alrisapesape ngipapasikai tutalakange tudaane, ikaikai kwini, twalai kudra sapathagili kimugi pakela ki taudalane ki kalaridrarane, lukavaiyane kai paisadra ki laadhadhame mwa ki kinawmasane kwini ki wapacai, lukamaungu la kai pangudadethe ki lawaudriwdripi.

¹¹ La ikai ku umawmase ku peaelaela ki Davidi kikai tapangimiane ki Rizepa ka labaibai ki Saule,

¹² ku Davidi la katwase mwa kavai Yabi ka tali Gileade malra kwini culrale ki Saule si lalakeini ka Yunathange. (Kai swa Pelisitine sa ikai Gilebua lregelrege papacai ki Saule ka vai, wamalra kwini kinawmasane ki lasu si Yunathange pakelrai pikai kalatadrane kavai Bithe Sane; ku swa Yabi la kupa kwini kinawmasane ki wapacai.)

¹³ Ku Davidi la iluku ku culrale ki Saule si Yunathange, si mialri siludu kwini ki tapitu ka kiapapacai kipakelrai ka umawmase.

¹⁴ Singikai ku taiyane ki talialalai, kwini lalasu la malra kwini culrale ki Saule si Yunathange dralreke pikai Zila ki swakai Biniyamingi, pikai ki takidralrekane ki Kise ka tama ki Saule. Twalainga kikai, ku Twaumase la kilalra ku inulri lini pasikai ki kuni lini.

Kiakaruburu ki tadradrau ka umawmase ki swa Pelisitine

¹⁵ La makakaruuburunga ku swa Iseraylri si swa Pelisitine; la iluku ki kwapingini ku Davidi mwa kikaruburu ki swa Pelisitine. Ku Davidi la kidulrunga turamuru.

¹⁶ La ikai ku tangea ku maadrau ka umawmase ka sia Isibinube; kwini lasu la iluku ku tulru si apararamau ka kunkingi ku telregane ka lriwlu ka idiri, la elrai ku bavane ku dramu, nau papacai iya ki Davidi.

¹⁷ Ai wakela ku Abisai ka lalake ki Ziruia paralubu ki Davidi kikaruburu kwini ki swa Pelisitine, la malra papacai iniane. Sakabilrilinga ku kwapingi ki Davidi la kitubi ki Davidi palraingi liniane, ku kai atupalranengaini liniane kikaruburu. Kwi lalasu amia kai, “Amanisu ku sidramadrama ki swa Iseraylri, kai nai lri maka pakakadrwa muswane.”

¹⁸ Sangilribatenga kikai, ku swa Iseraylri yakai Gubu makakaruuburunga ki swa Pelisitine. Ku swa Husa ka Sibikai ka umawmase papacai ki madradrau ka umawmase ka sia Sape.

¹⁹ Ikai ka Gubu, ku swa Iseraylri si swa Pelisitine la ikaainga ku tamakakaruburane, ku swa Bithelrihime ka Ilanane ka lalake ki Yaire papacai ki Gulriathe ka swa Gathe; ku idiri kai ki lasu mia ki barate ki satinutinunane ku bitulrwane.

²⁰ Sakabilrilinga ikai ka Gathe la ikaainga ku tamakakaruburane. Ikai kavai yakai ku maadrau ka umawmase madalame kikaruburu; kwini lasu ku alrima si drapaleini maecebe tara eneme ku galawgau, 24 ku galawgau.

²¹ Kwini lasu papia ki swa Iseraylri kipudawdawlu ku amakakaruburane ku Yunathange ka lalake ki Simia ka taka ki Davidi papacai iniane.

²² Kikai tasupate mwabaibalrithi ki madradrau ka umawmase ki swa Gathe makanaelre; kwini lalasu wapacai makanaelre ikai ki alrima ki Davidi si lakwapingini.