2 Samuile 2 - Ngudradreadrekadhane Ka Sisiu 魯凱語聖經

Atalialalai ki swa Yuda ku Davidi

¹ Sangilribatenga kikai, ku Davidi la kivaga ki Tamatama, “Lri maka mudradhaku mwa kudra taingeane ka cekele ki Yuda?” Ku Tamatama la kawriva, “Unu” la iya. La kivaga ku Davidi, “La kamani inu?” Ku Tamatama la kawriva, “Hiburungu.”

² Ku Davidi la katwase mudradha mwa ka Hiburungu. Kwini lasu la iluku ki tadrusa ka lataelrelreini ka Ahinuame ka swa Yezerile si Abigaile ka swa Karemile ka nalabaibai ki Nabale,

³ la iluku ki lakwapingini si lawacekecekeleini karedele mwa. Kwini lalasu la ikaikainga kwini ki ngithalringulu Hiburungu ka lacekele.

⁴ Ku swa Yuda la makitu kainganai mu Hiburungu, pulawlau cegecege ki Davidi si tutalialalai. Ku Davidi la kilalra ki swa Yabi ka swa tali Gileade ka wadralrekenga ki Saule,

⁵ la sikawlu ki sasiakawlu pamwa kwini, kawriva, “Ku Tamatama ani subulrubulru numiane, asi lwiyane kwini twakucingalre numi ki Saule ku kidremedreme numi, la malra numi dralreke iniane.

⁶ Ku Tamatama ani tara pangimia ku kidremedremeini numiane, palralrawthu kilibake numiane; la mialriaku lri ngwaladhaku ku tapangimiane numi kilibake numiane.

⁷ Kecengaana! Ku talialalai numi ka Saule wapacainga, ai kai swa Yuda kai mapapangale pwalawlawnga cegecege nakwane tutalialalai liniane.”

Atalialalai ki swa Iseraylri ku Isibusite

⁸ Ku Abinere ka lalake ki Nere ka tamatama ki kwapingi ki Saule wailuku ki Isibusite ka lalake ki Saule karedele mubere talubalre ka kadravane Yuredange, mwa kavai Mahanaime.

⁹ Ikai kavai, ku Abinere la cegecege ki Isibusite patalialalai, maerece Gileade, Asure, Yezerile, Iparaime, Biniyamingi, ai kudra tangimiamianelringa palraelre ki Iseraylri.

¹⁰ Ku Isibusite sa atalialalai ki swa Iseraylri tara masupatelenge ku cailini; kwini lasu ku tamaerecaneini ki swa Iseraylri taradrusa ka caili. Ai ku zuku ki Yuda makitwa tukucingacingalrenga ki Davidi;

¹¹ ku Davidi yakai Hiburungu atalialalai marasikai ki swa Yuda tarapitu ka caili si eneme ka dramare.

Tamakakaruburane ki tai Saule si tai Davidi

¹² Ku Abinere si sasiakawlu ki Isibusite ka lalake ki Saule twalai Mahanaime mwa kavai cekele Gibiungu.

¹³ Ku lalake ki Ziruia ka Yuabe si sasiakawlu ki Davidi wamwa thili ki baiyu ka Gibiungu, yatalikai kwini ku taingeane, la ibalrealreanane ku taingeane.

¹⁴ Ku Abinere la kawriva ki Yuabe, “Matumane lu tara pakainganai kau tapia ku langukathabarane paululucu liniane?” Ku Yuabe la tubalre, “Mathariri” iya.

¹⁵ Kwi lasu ka Isibusite si swa Biniyamingi ka zuku la pakainganai ku ta 12 si makakalrumale ki ta 12 ku twalai ki Davidi.

¹⁶ Kwini lalasu la makitu pwalra kwini awlru ki ecebane, la arakai kwini dramu si pwa culrulu ki vigwa ki paecebe lini. La ngimia kwini, si kwini ta 24 la tubakebake makanaelre, si pacai makanaelre. Lakamani kikwini Gibiungu kipasi “Kalatadrane ki dramu” iya.

¹⁷ Sakabilrilanenga, kwini maecebe la arukipakilringau makaruruburu. Ku Abinere si swa Iseraylri la kipamalebe ki swa talikai ki Davidi.

¹⁸ Ku tatulru ku lalalake ki ababai ka Ziruia la makitu ikai kwini, kwini lalasu amani kwini Yuabe, Abisai si Asahele. Kwini Asahele lu lrabwale mia ki salawngane ku ridarane,

¹⁹ kwini lasu la lecege papia cucubungu mwa saladha ki Abinere.

²⁰ Ku Abinere sa paswalrikudru drele, la kawriva, “Asahele, amanisu?” Ku Asahele, “Unu” la iya.

²¹ Ku Abinere la kawriva, “Madha saladhaladha nakwane, lu mwa saladha ki drumane ka lakwapingi, si malra ribici ka lamanemane lini.” Ai ku Asahele la kainganaiana saladha iniane.

²² Ku Abinere la peelana kawriva iniane, “Madha saladha nakwane! Ani papacai amiasu nakwane muswane? Lu papacadhaku muswane, ku matiwsakenane ki taka ka Yuabe?”

²³ Ai ku Asahele la kai mubangalre ngibangulu siwlri. Lakamani, ku paswalrikudruini ki Abinere si pwa deredere ku idirini, la culrulu ki barange ki Asahele; ku idiri la lregese ngibwale ki drelrekeini, kwini lasu la tubakebake si pacai. Sanaka wadaruru kwini ki tatubakebakane ki Asahele makitwa idrengere isadra.

²⁴ Ai, ku Yuabe si Abisai la acegecege si mwa saladha ki Abinere. Sa lriwlriwgunga ku vai, kwini lalasu la darurunga kavai lregelrege Amema, kwini yakai tali talrawane ki swa Gia, ikai ki sapapia ubulane ka kadalranane ki swa Gibiungu.

²⁵ Ku zuku ki Biniyamingi la pela sarubu kwini ki tedraneana ku umawmase, si tupapalra ki Abinere, irubu ikai ki taingeane ka lrelrelrege.

²⁶ Ku Abinere la tawtau kawriva ki Yuabe, “Lrika palralrawthungata makakaruburu? Laibekace kaisu thingale, luka bilrilanenga ala ka lri arukipakilringawta makakabadha? Kunai sakacekelesu, lri pakelanasu lwigane ala palikai ku asaladhane naiane?”

²⁷ Ku Yuabe la kawriva, “Papiaku ki palralrawthu ka Twaumase kiketekete, anaiyasi la kaisu kawriva kwasane, kai kwapingili nai tara pacungulu saladha numiane, saladha pakela lukakaiyane ki mialrealre.”

²⁸ Ku Yuabe la ngirapa, paidrengere ki lakwapingi kai saladhanga ki swa Iseraylri, ala isadranga ku makaruruburane.

²⁹ Ku Abinere si lakwapingini la taleeare dadadavace, ngukakaai valrwalru Yuredange si talubalre kwini ki kadravane Yuredange, saka samakapusale la pakela ki mwalringedele ala siwlri mwa Mahanaime.

³⁰ Ku Yuabe sa isadranga ku asaladhane, la sarubu ki lakwapingini, la drele laka kathanenga ku Asahele, ta 19 ku kadrwana.

³¹ Ku swakai ki Davidi papacai ku ta 360 kudra iluku ki Abinere twalai ki zuku ki Biniyamingi.

³² Ku Yuabe si lakwapingini la malra kwini kinawmasane ki Asahele iluku mwa kavai Bithelrihime, dralreke piakai ki tadralredralrekane lini ka wacekecekele. Kwini lalasu ala katwaseana takamaungane pakaliare, sakaliarenga ala siwlri mwa ka Hiburungu.