2 Samuile 19 - Ngudradreadrekadhane Ka Sisiu 魯凱語聖經

Pangiabulru papugathimi ki Davidi ku Yuabe

¹ Yakai ku umawmase ku peaelaela ki Yuabe, ku talialalai ka Davidi ngwalai ki Abesalrume si adiridirivane tubitubi iya,

² la kirimu kwini sakavaivai kwidra lakwapingi ki Davidi ku naika akiraragadhane kaperaperau ku taakaciane lini, la akabalrithi maru matiathalithinga tubitubi, asi lwiyane kialalra ku lakwapingini ala ka watubitubi ku talialalai ngwalai ku tapacadhane ki lalakeini.

³ Kwini lalasu la kababiitingi siwlri mucekele, mia ki kiapamalebe ku takikaruburane ka kwapingi masasinwane kainganai siwlriwlri.

⁴ Ku talialalai la ngikakabungu ku awlruini, si akwadrau tubi iya kai, “Au, lalakeli! Lalakeli! Lalakeli ka Abesalrume!”

⁵ Ku Yuabe la mudaane ki daane ki talialalai, si kawriva iniane, “Kaikameane pakiarubwanengasu ki kwapingisu kwini ki palribulu ki niakesu si lalalakesu lalabaibaisu si la mikakisu.

⁶ Malrasesu kwini ki kialibake muswane, la kiliibakesu kwini ki malrase muswane; kaisu twamanemanelriinga ku tadrelanesu ki lakwapingisu. Lu drelaku, anaiyasi kaikameane la panianianiakeana ku Abesalrume, la makitu pacai nai makanaelre, la naika kiaragaisu kamaani.

⁷ Kikai asasane lu mulatadra si thalralrai ki lakwapingisu! Lri papiaku ki nagane ki Tamatama kiketekete, lwiyasi la kaisu pia kwini, pakela lukamialrealre, lri kakadrwa ku natangeeanga ku asurwana ikaikai muswane; kwini ala amaninga ku matiwkukuludrunga ku akipadradresenganesu ku matikurwane ku tapanianianiakanesu.”

⁸ Ku talialalai la ngidrakale, si mulatadre katwase mwa nene ikai ithili ki lrawlrawdru ki cekele. Kwini lakwapingini sa kilalra ala ka yakai kwini la makitu isarubu mucucubungu iniane. Sakamani kwidra, ku swa Iseraylri la makitu mubere mubalriu.

Siaulri mu Yerusalrime ku Davidi

⁹ La kalrithavulu ku lavaga ikai kidruanga salraelre ki kuni lini, iya kai, “Ku talialalai ka Davidi napalribulu mitane pakidaili ki badha; palribulu mitane pakidaili ki swa Pelisitine. Ai kaiasasane, ngwalai ku akibaladhane ki Abesalrume la katwase mubere kidaili ki kadaenganeta.

¹⁰ La cegecegeta ki Abesalrume tutalialalai, ai kikai wapacainga ikai ki takikaruburuburane. Lakamani kwidra, ata kai karacange mwa malramalra pasiwlri ki talialalai ka Davidi?”

¹¹ Ku talialalai ka Davidi siakawlu ki Zaduke si barakalai ka Abiathare mwa kivaga ki laciwru ki swa Yuda, “Ku swa Iseraylri makitwa mapelaelaela ku pasiwlri ki talialalai mwa ki daaneini ka talialalai, anu asuru si kisubilrili liniane?

¹² Kunumi laretesaneli, ka labetakaneli, anu mukalava sakabilrilanenga ala kainganai dawlu ki talialalai siwlria iya?”

¹³ Ku Davidi la mialri sikawlu liniane mwa kawriva ki Amasa iya kai, “Kusu amanilringasu ku betakaneli; twalainga kaikameane, lri kamaningasu ku tamatama ki kwapingi, ngitalingikaiyane ki Yuabe. Lwiyasi kainaku pangimia kikai, ku Twaumase ani papacainga nakwane!”

¹⁴ Ku Davidi la pangiesainga kikiragai ki kidremedreme ki swa Yuda makanaelre, kwini lalasu la padaruru ku vaga baai ki Davidi, kitubi iniane si lakiacapilini ku amakitu siwlriane makanaelre.

¹⁵ Sa siwlriwlri ikadadalranane, ku Davidi la kela kavai kadravane Yuredange, la madredresenge ki swa Yuda; kwini lalasu la mwa ka Gilegale kidredresenge iniane talubalre drakerale.

¹⁶ Sakamani kwini, ku Simi ka lalake ki Gira ka swa Biniyamingi kavai Bahurime la mialri kisaswarau mwa kadravane Yuredange kidredresenge ki talialalai ka Davidi.

¹⁷ Kwini lasu la iluku ku takudrulu ku zuku ki Biniyamingi karededele kela. La ikaiyana ku Ziba ka sasiakawlu ki tai Saule mialri mailuku ku ta 15 ka lalakeini si tamapusale ka sasiakawluini karededele kela. Kwini lalasu aswalala ki talialalai daruru ka kadravane Yuredange.

¹⁸ Kwini lalasu la talubalre mwa sateatedre ki wacekecekele ki talialalai patalubalre, si singikai ku takidremedremane ki talialalai pia ku la awngane. Sa lri talubalre ku talialalai, ku Simi la guruthungane icucubungu iniane,

Pacepe ku Davidi ki Simi

¹⁹ si iya kai, “Talialalai, kiatubiaku muswane pacepaili kudra pasalrivaneli sa katwasesu Yerusalrime ku tabaebalreaneli. Kiatubiaku madha ngwalai kikai si tupasalrivane nakwane, la ulravanga kwini tangimiane.

²⁰ Talialalai, wathingalaku yakai ku pasalrivaneli, lakamani kaikameane, ikai ki tali dradha ka zuku amaniaku ku aswalalanga kela kidredresenge muswane ka talialalai.”

²¹ Ku Abisai ka lalake ki Ziruia la kawriva, “Nai papacai madu ki Simi, asi lwiyane kwini lasu maelaela si pusu ki padelreme cegecege ki Tamatama ka talialalai.”

²² Ai, ku Davidi la kawriva ki Abisai si takaini ka Yuabe, “Lalake ki Ziruia, aneane ku kiatubi ku akawrivane numi? Wasiasiasilape numi ku apakwalriane numi nakwane? Kikai asasane talialaladhaku ki swa Iseraylri; kaikameane, kadrwa ku natangeanga ku swa Iseraylri ku lri kipapacai.”

²³ Ku talialalai la kawriva ki Simi, “Kasalrwaili kadrwa ku lri papacai muswane la iya.”

Mathalrai ku Davidi ki Mipibusithe

²⁴ Ku Mipibusithe ka agane ki Saule la mialri kela mulrawdru kidredresenge ki talialalai. Twalai ku takatwasane ki talialalai Yerusalrime pakela kikai tapamalebeane si siwlringa kainganai, kai lasu kadrwana ku tatawdrapalaneini, kai kia kungisingisiana, la kaiyana sinau ku nalaimainga.

²⁵ Ku Mipibusithe sa twalai Yerusalrime kela kidrele ki talialalai, ku talialalai la kivaga iniane, “Mipibusithe, asu kai tupalra nakwane katwase?”

²⁶ Ku Mipibusithe la tubalre, “Talialalai, wathingalesu ala ka mapiapiladhaku; nawacunaku ki sasiakawluli ka Ziba padulrua ku ruba iya, lanau ngukai ki ruba tupapalra ki talialalai, ai kwini lasu walrilrigili nakwane.

²⁷ Kwini lasu la papia ki talialalai cacapange ku vaga tulisi nakwane; ai kusu ka talialalai miasu ki sasiakawlu ki Twaumase belenge, lakamani kwidra ngisasingikaiya ku kidremedremesu pangimia!

²⁸ Lakamani ku wacekecekele ki ama naika kiapapacai makanaelre, ai kialibakesu, la maka dulrwaku kibalrulu muswane, yainuana ku pukuli ala kilibakanaili iya muswane ka talialalai.”

²⁹ Ku talialalai la kawriva, “Asu matikaiyana kikai? Malrithethenga naku, lri dulrusu mavala ki Ziba kisupilri ku tacekecekelane ki Saule” la iya.

³⁰ Ku Mipibusithe la kawriva, “Malra patuelre kwi latacekecekelane ki Saule baai ki Ziba. Sana mudringadringaisu siwlri ka talialalai, kadrwanga ku murikaili sanaka maneemanenga” la iya.

Mathalrai ku Davidi ki Barezilai

³¹ Ku Barezilai ka swa Gileade la mialri twalai Rugilrime mulrawdru, lri sateatedre ki talialalai talubalre.

³² Kwini lasu taramavalrulunga ku caili ka tarudrawdrange. Kwini lasu samanemanane turamuru; sa ikai Mahanaime ku talialalai, kwini lasu nawababaai ku taleke ki talialalai.

³³ Ku talialalai la kawriva iniane, “Ila tupalraili talubalre, mwa ka Yerusalrime, lri tara sirapalaku muswane.”

³⁴ Ai ku Barezilai amia kai, “Kiau lu lri tara thainunga naku panianiake, manemane si tupalrana naku ki talialalai mwa ka Yerusalrime?

³⁵ Kaiasasane kai tara mavalrulunga naku, kadrwanga ku lri maka pakarengerengeana nakwane. Lu kaneaku lu ungulaku kainaku wathingalenga ku tasangumanemanane; la kainaku maka kilalranga ku lingau ki tarasenasenai ka sawvalai ki labaibai. Lri kamaanilringa naku ku lrika amece rapalesu sikakathane.

³⁶ Kainaku swadalepenga tarumara ku mia kai ku madradrau ku pakalreva; nau mwa deethe tupapalra ki talialalai dadavace, lribate kadravane Yuredange sikathane,

³⁷ la pawbalrivaili, la nau pacai ikai ki cekeleli, si kidralreke ithili ki takidralrekane ki marudrawdrangeli. Kikai lalakeli ka Kimehame; malra iluku iniane, si singikai ku nau pangimia iyasu si marasikai iniane.”

³⁸ Ku talialalai la tubalre, “Lri tara ilukaku iniane, si pangimia ku tamurikaiyanesu nakwane marasikai iniane; lu ikai ku akitubianesu, lri tara palraingaku” la iya.

³⁹ Ku Davidi si lapapalraini makanaelre la talubalre kadravane Yuredange. Ku talialalai la uma kipusau ki Barezilai, si subulrubulru iniane, ku Barezilai ala katwase siwlri mubalriu.

Makakarivu ngwalai ki talialalai ku swa Yuda si swa Iseraylri.

⁴⁰ Sa maka talubalrenga ku talialalai, ku swa Yuda makanaelre ku mapapangale si pararamau ku swa Iseraylri wakela kidredresenge iniane. Sa kelanga Gilegale ku talialalai; ku Kimehame la tupalra ki talialalai.

⁴¹ Sakabilrilinga, la makanaelre ku swa Iseraylri makitu mwa kidrele ki talialalai, la kawriva ki talialalai, “Talialalai, ani kirimu kai retesane nai ka swa Yuda yakai ku kindri nai kibubuli sateatedre ki talialalai, si wacekecekele ki talialalai, si lakwapingini talubalre kavai kadravane Yuredange iya?”

⁴² Ku swa Yuda la tubalre, “Ku dulru nai pia kikai ngwalai ku tamaretetesane nai ki talialalai. Anungithaanga kalisiana? Ka yakaai ku baaini ki talialalai naiane ku taleke, la kakadrwa ku napakalreevanga naiane ku namanemaneemanenga.”

⁴³ Ku swa Iseraylri la kawriva, “Adravane ka maretetesana numi ki talialalai, ku tamangangimiane nai ku sakialibake nai ki talialalai ka Davidi silrialriibateana ku taimangealane ki sakialibake numiane iniane. Anu kirimu tudrekase naiane? Madha karimurimuru, amani nai ku aswalaalanga madrekadrekase ku wadawlu pasiwlri ki talialalai!” Kwini maecebe la makakarivuana, ai ku takidremedremane ki swa Yuda makelraelratheana ka makawlukulukulu ki swa Iseraylri.