2 Samuile 18 - Ngudradreadrekadhane Ka Sisiu 魯凱語聖經

Kiapamalebe kipapacai ku Abesalrume

¹ Ku Davidi la sarubu sanaka twapapalra iniane, la malra liniane apavavalane patakudrulu pataidai ku tairubwane ki kwapingi, kwini taingeane ka tairubwane ki kwapingi la pikaai ku taramarasikaikai liniane,

² ala malra liniane pautulru, la padrudrulru ki Yuabe, Abisai ka agi ki Yuabe si Itai ka swakai Gathe si kamani ku masasangiluku liniane katwase. Ku talialalai la kawriva ki lakiacapilini, “Adravanaku lri tupalraku numiane kikaruburu.”

³ Kwini lalasu la kawriva, “Lutumane kaisu lri maka tupalra naiane kikaruburu; lwiyasi la amaki nai si siwlri mubere, si kipapacai ku naapararamaunga, ku badha kai lri tumanemane; ai kusu ka tangeangea silrialribatesu naiane ka takudrai ka umawmase, mathaithaariringa lu asurusu ikai cekele, mukalavalava ku apadrekadrekasane kela palribulu naiane.”

⁴ Ku talialalai la kawriva, “Mathariri sanaka taiyane numi, nau pangimia kwini midra.” Kwini lasu la acegecege ikai thili ki lrawlrawdru ki cekele, si paswalralrau ki lakwapingini ka takudrulu, ka taidai makabibibilrili katwatwase.

⁵ Ku talialalai la drekase ki Yuabe, Abisai, si Itai iya kai, “Ngwalai nakwane, kunumi madha pakaduladula kwini ki langukathabarane ka Abesalrume.” Kwini lakwapingi makanaelre la makitu kilalra ku tadrekasane ki Davidi ki lakiacapilini.

⁶ Ku kwapingi ki Davidi la katwase mwa ubulane makakaruburu ki kwapingi ki swa Iseraylri ikai angatungatu Iparaime.

⁷ Ku swa Iseraylri la kipamalebe ki kwapingi ki Davidi, la kaparamuru ku lawapacai ku madadula; ikai kwini ki vaivai tadrusa ka kudrai ku kiapapacai.

⁸ Kwini makarururuburu la salraelrenga kwini ubulane, ku kiapapacai ikai angatungatu takakaalrana ki kiapapacai ikai ki tamakarururuburane.

⁹ Yakai ku tapiya ku kwapingi ki Davidi ku wadrele ki Abesalrume. Ku Abesalrume yacengeecenge ngurigirigi ki ngiririgi, ngukakai tailebe ki maadrau ka tharialupu ka angatu; ku isiuini la mukaraidri ki ricingi ki angatu, kwini ngiririgi la mubere, kwini lasu la kikelrai ikai ki angatu.

¹⁰ La ikai ku tangea ku kwapingi ki Davidi la drele kikai tangimiane, la mwa pelaela ki Yuabe, “Wadrelaku ki Abesalrume ka mwakelradhane ki tharialupu ka angatu” la iya.

¹¹ Ku Yuabe la kawriva, “Sa drelesu iniane! Asu kai pasalikaainga papacai iniane? La nai pakalrevaku muswane ku mangeale ku gingi si vaeva ka lakete!”

¹² Ai kwini lasu la tubalre, “Adravane baaisu nakwane pakakudrulu ku gingi, kainaku lri makathuru pwalrima ki lalake ki talialalai! Kialalra nai sa drekadrekase ku talialalai muswane, ki Abisai si Itai ku vaga, ku amia kai, ‘Ngwaladhaili, si tara palakeba kwini ki langukathabarane ka Abesalrume’ sa iyaiya.

¹³ Lwiyasi la pathaelaku ku drekase ki talialalai, si papacai ki Abesalrume, ku talialalai lri tara thiingale, kadrwa ku awngane ku navaevanga ku lrika amaka baladhane madu iniane! Lu ngimia kwini, lai kaisu lri pusakai nakwane.”

¹⁴ Ku Yuabe la kawriva, “Manemane ku akivilravilraviilraneli si muvaiyane muswane!” Kwini lasu la mailuku ku tulru ku idiri katwase mwa, kisaswarau sa ikaiyana kipakelrai ki tharialupu ka angatu panianianiakeana ku Abesalrume, la malra ku idiri si culrulu palregese ki avava ki Abesalrume.

¹⁵ La ikai ku tamangeale ku papalra ki Yuabe ku wamwa lrabwale pwa papacai ki Abesalrume.

¹⁶ Ku Yuabe ngirapa la iya paidrengere ki makarururuburu; ku lakwapingini la makitu kainganai siwlri, kai saladhanga ki swa Iseraylri.

¹⁷ Kwini lalasu la malra kwini kinawmasane ki Abesalrume cilri pwa ki maadrau ka valrulrange ikai angatungatu, la pibelenge abate ku tadradrau ku lrenege. Ku la swa Iseraylri la makitu mubere papia ki lacekele lini.

¹⁸ Ku Abesalrume sakaiyana pacai nangiapapasikainga ku vaeva ku sadrengedrenge ikai valrwalru ki Talialalai; asi lwiyane kadrwa ku lalakeini ku lri maka mucungulu ki naganeini, la kamani ku ngitatunaganeini kwini ki sadrengedrenge pasi Abesalrume. Pakela kaikameane, kwini sadrengedrenge kiapasi sangulringalringavane ki Abesalrume iya.

Kialalra ku Davidi ka kiapapacai ku Abesalrume

¹⁹ Ku Ahimaze ka lalake ki Zaduke la kawriva ki Yuabe, “Ala nau mwa pelaela ki talialalai kikai matiakiragai ka vaga. Ku Tamatama palribulunga ki talialalai pakidaili ki badhaini.”

²⁰ Ku Yuabe la kawriva, “Ini, kaikameane asi mua pelaela kikai matiakiragai ka vaga, mwanga lukakaiyaiya. Kai kamani kaikameane, asi lwiyane kaikameane wapacai ku lalake ki talialalai.”

²¹ Ku Yuabe la kawriva kwini ki sasiakawlu ka swakai Kuse, “Kusu lu mwa, si kwidra drelesu ku tangimiamiane la pelaela ki talialalai” la iya. Kwini sasiakawlu la guruthungane si sukubu, la katwase lrabwale mwa.

²² Ku Ahimaze la kakecenge ku wamwa, la iya kai, “Adravane ka ngitwatumane, ala pukaunaili kudra nawamwa iluku kikai vaga.” Ku Yuabe la kawriva, “Lalakeli, asingitha nau mwalringa iya? Lu mwasu pelaela kikai vaga kadrwa ku atarumaranesu ku pakalreva.”

²³ Ku Ahimaze la kawriva, “Adravane ka ngitwatumane, lri tara muaku!” La iya. Ku Yuabe la kawriva, “Ani lu mwa midra” la iya! Ku Ahimaze la siluludu kwini kadalranane valrwalru Yuredange mulrawdru lrabwale, la kai tarathainu la padali kwini ki swa Kuse ka umawmase.

²⁴ Sakamani kwidra, ku Davidi la nene ikai ki kabicelrakane ki samamwa latadre si samamwa daane ki lrawlrawdru ki cekele. Ku tarakadrekadrenge masiasirare la mubelenge ki alradre ki cekele, acegecege ikai belenge ki lrawlrawdru ki cekele masiasiasirare. Kwini lasu la drele ku tangea ku umawmase lrabwabwale kaingananganai,

²⁵ la paswalebe tawtau, pelaela ki talialalai. Ku talialalai la kawriva, “Lwiyasi laka tarwangeangea, lri tara ka wakela pelaela ku matiakiragai ka vaga” la iya. Kwini umawmase la aru kirarimu arwa dedethenga.

²⁶ Kwini tarakadrekadrenge masiasirare ala drelenga ku tangeanga ku walrabwabwale kainganai, la tawtau kwini ki tarakadrekadrenge ki lrawlrawdru, “Drela, yakaainga ka tangea ka walrabwabwale kainganai” la iya! Ku talialalai la kawriva, “Kikai tangea mialri ka wakela pelaela ku matiakiragai ka vaga” la iya.

²⁷ Ku tarakadrekadrenge masiasirare la kawriva, “Lu drelaku ka talrabwalaneini mia ki Ahimaze.” Ku talialalai la kawriva, “Kwini lasu mathariri ka umawmase; kwini lasu lri tara ka mailuku ku matiakiragai ka vaga” la iya.

²⁸ Ku Ahimaze la akwadrau kawriva ki talialalai, “Talialalaili, banzai!” La kirimu guruthungane ikai daedae sukubu, iya kai, “Drengedrengera ki Tamatama ka Twaumasesu, pamalebenga ki wabaebaebalre muswane ka umawmase!”

²⁹ Ku talialalai la kivaga, “Kwini langukathabarane ka Abesalrume mwadringadringai?” Ku Ahimaze la tubalre, “Talialalai, ku kiacapilisu ka Yuabe siakawlu nakwane mulatadre, la drelaku ki laumawmase kalrungulrungu mia kwidra, ai kainaku wathingale luka manemane ku tangimiamiane.”

³⁰ Ku talialalai la kawriva, “Acegecega mwa kwi thili!” Ku Ahimaze la muthili acegecege.

³¹ Sakamani kwidra, kwini swa Kuse ka umawmase la kelanga, la kawriva ki talialalai, “Yakai kai matiakiragai kai apelaelaneli ki talialalai. Kaikameane ku Tamatama paakacinga muswane patuelre kwidra ki wabaebaebalre muswane ka umawmase” la iya!

³² Ku talialalai la kivaga, “Kwidra langukathabarane ka Abesalrume mwadringadringai?” Kwini swa Kuse ka umawmase la tubalre, “Kwini takipangimianeini ani ngimia ikai kwidra ki sanaka baadhasu si kwidra ki lawabaebaebalre muswane ka laumawmase!” La iya.

³³ Sakilalra kwini talialalai, la kirimu adirivane turamuru, si la mubelenge ki alradre ki cekele ki daaneini tubitubi. Kwini lasu takwa dadadavace takutubitubi iyaiya kai, “Au, lalakeli! Lalakeli! Abesalrume ka lalakeli! Asalu kamaniaku ku ngiatalingikaiyane muswane pacai. Lalakeli ka Abesalrume, lalakeli!”