2 Samuile 17 - Ngudradreadrekadhane Ka Sisiu 魯凱語聖經

Mabebetethe kai Husai ku kai makalecege ka kidredredreme ki Ahitupele

¹ Ku Ahitupele la kawriva ki Abesalrume, “Ala pukaunaili ku wapilri ku ta 12,000 ku umawmase; kai maungu la nau mwa saladha ki Davidi.

² Saicengecenge kidulru si ngupukwanenga la nau mwa kikaruburu iniane; lri tara kasamaali si ngituluku amama, kwini papalraini la lri makitu mubere. Lri nguvaevaku ki talialalai papacai,

³ si malra kwini ki kwapingini iluku papianga muswane, mia ki kiarakerakete ka ababai siwlri mwa ki taelrelreini. Sana nguvaevasu papacai kwini umawmase, kwini drumane ka umawmase lri kasulivalivatenga.”

⁴ Ku Abesalrume si laciwru ki swa Iseraylri la makitu tumathariri kikai takidredremane.

⁵ Ku Abesalrume la kawriva, “Lu mwa dawlu ki swakai Areki ka Husai kela kai, la takilalalra ku takidremedremaneini.”

⁶ Sa kela ku Husai, ku Abesalrume la kawriva iniane, “Yakai ku ngimiyaiya kai ku tapapukidremedremane ki Ahitupele ... la lri pasalaladhata kwini ki vagaini? Lwiyasi la kaisu palraingi, yakai ku ani pangimia kwini iyasu?”

⁷ Ku Husai la tubalre, “Kainaku twamathariri kikai takidremedremane ki Ahitupele kikai la iya.

⁸ Wathingalesu ki tamasu ka Davidi si lakwapingini yadrepele ka makalranga ku takilringavane lini kikaruburu ka laumawmase; kwini lalasu ku garangane lini paramia ki tina ka cumai lu kiravase kwidra lrulai ka lalakeini. Ku tamasu amani kudra makalranga turamuru ku takilringavane ka tarakikaruburu, lukamaungu kai taelrelre ki lakwapingi apece.

⁹ Kikai asasane alau kiabalai ikai barungulane, lukai ikai talidrumane. Kwini lasu sana ngivelevele kikaruburu ki kwapingisu, lu kilalra ku umawmase kiapamalebe ku kwapingisu lri iya.

¹⁰ Lu ngimia kwini, adravane ka mia ki raiyungu ku garangane ka umawmase lri tara ngituluku si retese; asi lwiyane ikai palraelre ki Iseraylri, sanaka aneaneeanenga wathingale ki tamasu ka tamagarangelringa, kwini lakwapingini la mialri idrepele ka garagarange ka talrilrigili kikaruburu ka kwapingi.

¹¹ Lakamani kwidra, lri papukidremedremaku muswane sarubu sanaka swa Iseraylri payelrelre la twalai tali dradha kavai Dange kela kavai salrawlrawdrunga ka Bereseba, ku pangalane mia ki enai babiabila ki laveke, la ngikakamania sangiluku kikaruburu.

¹² Adravane ikainu ku Davidi, lri tara kidringaita iniane. La tapangitutuluku kikaruburu iniane; lu ngimia kikai, lri mia ki lamu asese makakai ki kadaengane, kwini lasu si lakwapingini lalri kakadrwa ku natangeanga ku maka mwabere.

¹³ Lwiyasi la katwase kipasiwlri mwa ki cekele, nai arakainga ku calrisi la malra bilibili kwini ki cekele pwa ki vaalru. Adravane ka vaeva ka arululane kadrwa ku lri asuurunga ikai lregelrege.”

¹⁴ Ku Abesalrume si swa Iseraylri makanaelre la makitu iya kai, “Kai tapapukidremedremane ki Husai mathaithariri ki Ahitupele la iya.” Ku Tamatama la kalritheethe ku kai kiatarumara kwini mathariri ka taiyane ki Ahitupele, pakai kudra apamwane pulebe ku amatikurwane ikai ki Abesalrume.

Sa kilalra ku Davidi matwase mubere

¹⁵ Ku Husai la pelaela ki Zaduke si barakalai ka Abiathare ku tapapukidremedremaneini ki Abesalrume si laciwru ki swa Iseraylri, si la takupelaelanga liniane, kudra tapapukidremedremane ki Ahitupele lukamanemane.

¹⁶ Ku Husai la kawriivana, “Kirarimwa sikawlu ku umawmase mwa pelaela ki Davidi, kai maungu madha sulasulai ikai satatalwabalre kavai calragulragu, kirarimwa lribate kavai kadravane Yuredange; lu pia kai, ku Davidi si lakwapingini la lri kai kipapacai pakamudu.”

¹⁷ Kikwini kwidra, ku lalake ki Ahitupele ka Yunathange si lalake ki Zaduke ka Ahimaze yakai tali latadre Yerusalrime thili ki dralremedreme Inrugele mukalavalava, asi lwiyane kwini lalasu mwakuludru mucekele, mwapakai lu kithingale. La ikai ku sasiakawlu ka ababai ka tara kelakela pelaelaela ku tangimiamianenga lini luka ngitwatumane, kwini lalasu la padarurunga ku vaga ki talialalai ka Davidi.

¹⁸ Ai yakai ku tangea ku langukathathabarane ku wadrele liniane, la mwa pelaela ki Abesalrume. Kwini tadrusa la kisaswarau katwase lrabwale kibalai mwa ki daane ki swakai Bahurime. Kwini kalatadrane la ikai ku taluvale ku dralremedreme, kwini lalasu la mwadringi ki dralremedreme.

¹⁹ Kwini taelrelre ki lasu la arakai ku sacaecaebane pwa kabungu ki ngaanga ki dralremedreme, la malrana ku mugi sabulu pikai belenge, balai ku kaika akithingalane ki umawmase.

²⁰ Ku kiacapili ki Abesalrume la kela kwini ki daane, la kivaga kwini ki ababai, “Yainu ku Ahimaze si Yunathange?” La iya. Kwini alisu la tubalre, “Kwini lalasu matwaseenga talubalre.” Kwini laumawmase la piyanga kwidra silape la kai maka kidringai liniane, la katwase siwlri mwa Yerusalrime.

²¹ Kwini wakela saladha ku umawmase sa katwasenga, ku Ahimaze si Yunathange la twalai ki dralremedreme adringi mubelenge, la kirariimu mwa pelaela ki talialalai ka Davidi kwini takipasilasilapane ki Ahitupele kidredreme ku papacapacai muswane ka talialalai, si iya kai, “Kirimwa talubalre kadravane!”

²² Ku Davidi si la twapapapalra iniane la ngivelevele katwase talubalre kadravane Yuredange. Sakalialiare, kwini lalasu makitwa talubalrenga makanaelre.

²³ Ku Ahitupele sa drele kwini takawrivaneini sa kai kitarumara la katwase ngurigi ki ruba, siwlri mubalriu. Kwini lasu sa maka pangimianga ku la awnganeini la ngithathelrece ngitakilili si pacai. Ku umawmase la malra dralreke iniane pwa ki tadralredralrekane lini ka wacekecekele.

²⁴ Ku Abesalrume si lakwapingini sa talubalrenga kadravane Yuredange, ku Davidi wadaruruunga Mahanaime.

²⁵ (Ku Abesalrume paatamatama ki Amasa ki lakwapingi, mubalrithi ki Yuabe. Ku Amasa lalake ki Ithera ka swa Isemaele. Ku tinaini ka Abigaile laka lalake ki Nahase, mababetake ki Ziruia ka tina ki Yuabe.)

²⁶ Ku Abesalrume si swa Iseraylri la tutakwapingane ikai Gileade.

²⁷ Sakelakela Mahanaime ku Davidi la ikai ku tatulru ku umawmase ku wakela kidredresenge iniane. Kwini lalasu sia Subi ka lalake ki Nahase ka swa tali Amune ka swa Raba, Makire ka lalake ki Amiele ka swa Ludibare, si Barezilai ka swakai Rugilrime kavai Gileade.

^28-29 Kwini lalasu wailuku ku palungu, kisi, cawbu si akaneane kela baai ki Davidi si papalraini. Kwini la akaneane yakai ku tatitiki ka mugi, tadradrau ka mugi, nitubunganenga ka mugi, niakamanenga ku berathe ka mugi, lepelepe, daidapiri ka lepelepe, valu, akederenga ka mireke, lawlau ka mireke si nikiubawbalane ka kiu. Kwini lalasu wathingale ki Davidi si la papalraini ikai calragulragu ka lri tara ka mwabaaisinga si ka kiadulrunga.