2 Samuile 15 - Ngudradreadrekadhane Ka Sisiu 魯凱語聖經

Ku Abesalrume kiadremedreme ku kiaecebe ki Davidi

¹ Sakabilrilinga kikai, ku Abesalrume la ngipapasikai padulru ku sakikaruburuburane ka palridingi si ku makaalra ku larigi, la kelrete ku tamalrimale ku aswalala palakebe sivate ku kadalrananeini.

² Kwini lasu sanaka mialrealre acegecege ikai ki lrawlrawdru ki cekele, lu kipadradresenge ku lri mwa ki talialalai kitubi ku aturathudanane ku rivurivwane lini, ku Abesalrume la dawlu iniane bwala iyana, la kivaga iniane luka twalai ki inu ka cekele. Kwini umawmase la pelaela ka swakai ki inu ka zuku,

³ ku Abesalrume la kawriva, “Drela, kusu sakidremedremanesu patenganesu; ai la matiataulra ku kai siakawlu ku talialalai ku umawmase kela si kilalalra ku sasidrurwanesu.”

⁴ Kwini lasu la padriimana ku niaku valane, “Samalra anaka tarasaibaibangaku! Ku palrapalra lu kikarivwane lu ikai ku akitubiane, la nai kela kai nakwane, nai tara aparamaramavaku kivavaga.”

⁵ Lwiyasi ikai ku adeethe ki Abesalrume, nau sukubu iya iniane, ku Abesalrume la ruthuku arake iniane, pasudawdalru iniane.

⁶ Ku Abesalrume la papia ki sanaka kiatubi kela ki talialalai ani turathudane iya ka la swa Iseraylri singiabiila pangimia kai liniane, la kamani kudra kikadalameini ki mapapangale.

⁷ Sa tarasupatenga ka caili, ku Abesalrume la kawriva ki talialalai ka Davidi, “Ama, ala pawbangalraili ku wamwaku kavai Hiburungu si pangisawlri ku tapuvaganeli ki Tamatama!

⁸ Sa ikaikaiyanaku Gisure ka Siria, napwavagaku ki Tamatama, lwiyasi la ilukusu nakwane siwlri mwa Yerusalrime, lri ikaiyaku Hiburungu sukubu muswane” amia ku.

⁹ Ku talialalai la kawriva, “Ani lu kasulivalivata!” Ku Abesalrume la mwa ka Hiburungu.

¹⁰ Ai kiabubuli sikawlu mwa ki lazuku ki swa Iseraylri, iya kai, “Lwiyasi la kilalra numi ku ngiarapa, watawtau madu si, ‘Atalialalainga ku Abesalrume ikai Hiburungu’ ” iya!

¹¹ Ku Abesalrume la dawlu patwalai ka Yerusalrime ku ta 200 ku umawmase, si tupapalra iniane; kwini lalasu la kai thingathingale ku tangimiamianelringa, twadwaduai ku kidremedreme lini katwase tupapalra.

¹² Sa patarumaramara ku Abesalrume ku niculwane ka sapatarumarane, kwini lasu la pakisilange sikawlu dawlu ki Ahitupele ka swakai Gilu kela; kikai lasu tangea ka amani ku takivagavagane ki talialalai ka Davidi. Kudra lri pangibalre ku puku la arudrima arusapukwane, kudra twapapalra ki Abesalrume la aru tapangapaangale.

Ku Davidi mwabere twalai ka Yerusalrime

¹³ La ikai ku sasiakawlu ku peaelaela ki Davidi, “Ku kidremedreme ki la swa Iseraylri makitua papianga ki Abesalrume.”

¹⁴ Ku Davidi la kawriva kwini ki tapalra iniane ikai Yerusalrime ka lakiacapilini, “Ila kikai takatwase kai Yerusalrime, amani lwiyasi, kaita maka kisaswarawnga mubere ki Abesalrume. Takirarimu katwase! Lri padalrunga si kela kai, lri papacai mitane, papacai amudu ki umawmase ki cekele!”

¹⁵ Kwini lalasu la tubalre, “Unu, talialalai. Makapadulrunga nai, singikaiya ku naupia iyasu pangimia!”

¹⁶ Ku talialalai si la wacekecekeleini si lakiacapilini la makitu katwase, la pasusurunga ku ta mangeangealenga ku lalabaibaini ki talialalai kadrenge ki daane ki talialalai.

¹⁷ Ku talialalai si la twapapalra iniane la katwasenga Yerusalrime, la idrengere ikai kwini ki sababiabiabiilanga ki cekele ka daane.

¹⁸ Ku lakiacapili ki talialalai la makitu ngukakai thili iniane lribate, kudra tarapalakelakebe ki daane ki talialalai si ta 600 ka twalai Gathe kela tupapalra ki talialalai ka laumawmase la mialri ngucacucubungu iniane lribate.

¹⁹ Ku talialalai la kivaga kwini ki kiacapili ki swa Gathe ka Itai, “Asu kela tupapalra naiane katwase? Lu siwlria si mwa kavai ki bavane ka talialalai! Swa sakamaelananesu ka kuni ka umawmase, ka kiadaili ki kuni numi si kela kikai kipalakebe.

²⁰ Ku taikaiyanesu kikai laka edrekaneana, anaku duulru patupapalra muswane nakwane katwase acaicali? Adravane kunaku kainaku wathingale lu lri papiaku inu. Lu siwlria, mailuku ki sakacekelesu katwase! Ku Tamatama ani arakai ku thalradhaneini kapatengatengane sirapale muswane!”

²¹ Ku Itai la kawriva, “Talialalai, lri papiaku ki nagane ki palralrawthu panianiake ka Tamatama kiketekete muswane, adravane mwinusu kidruanga, lri tara tupapalraku muswane, anika apanianiakane anika apacadhane, malralremeaku.”

²² Ku Davidi la kawriva, “Mathariri, ani tapacungulu katwase arwacucubungu midra!” Ku Itai, si kwapingini, si lawacekecekeleini la makitu tupapalra mukadalranane.

²³ Ku Davidi si latwapapapalra iniane sa katwatwasenga, ku swakai kwini la makitu akwadrau tubi. Ku talialalai la lribatenga drakerale Kiderunge, kudra la papalraini la mialri lribatenga; kwini lalasu la karededele katwase papia calragulragu.

²⁴ Kikwini, ku barakalai ka Zaduke la mialri kelanga; kudra wabulribulri ku Langiane ka swa Lrivi la mialri ikai kwini tapalra iniane. Kwini lalasu la sarare kwini Langiane, sa makitu katwasenga ki cekele makanaelre ku mapapangale ala alrugu bulri. Ku barakalai ka Abiathare la mialri ikai kwini.

²⁵ Ku talialalai la kawriva ki Zaduke, “Malra sawlri pasiwlri kwini Langiane pwa ka Yerusalrime! Lwiyasi la kadalame nakwane ku Tamatama, itara ikaai ku minakavalane ku apasiwlriane nakwane, si dreleana pela ki Langiane si ku tapikaiyane sarare.

²⁶ Lwiyasi la kai kadalame nakwane, ani ngisasingikainga ku apangimianeini nakwane!”

²⁷ Ku talialalai la pacungulu ku vagaini ki Zaduke, “Kaisu ka amani kudra tarasakalai? Kusu si Abiathare iluka ki lalakesu ka Ahimaze si lalake ki Abiathare ka Yunathange kasulivalivata siwlri mwa ka cekele.

²⁸ Lri ikaiyaku kavai ki satatalwabalre calragulragu mukalavalava ku lavaga numi.”

²⁹ Ku Zaduke si Abiathare la bulri kwini Langiane siwlri mu Yerusalrime, si asuru ikai kwini.

³⁰ Ku Davidi la tubi si katwase mudradha mwa ka lregelrege Ulrive; la kai sikece, si adiridirivane kabungu ki awlruini. Kwini lapapalraini makanaelre la makitu ngikakabungu ki awlru lini, katwatwase takutubitubi.

³¹ La ikai ku peaelaela ki Davidi, ku Ahitupele kiapaelrenga ki kiaecebe baebalre ka Abesalrume iya. Ku Davidi la inulri iya kai, “Tamatama, kiatubiaku muswane malra kwini kidremedremedreme ki Ahitupele pavutha si lani kai ngimia!”

³² Ku Davidi la mwa ka lregelrege kwini ki tasukusukubane ki Twaumase, kudra twakucingalre iniane ka talragini ka Husai ka swakai Areki la thuriace ku laimai, si ngicacabungu ku abu pwa ki awlruini, la ngibwale kidredresenge iniane.

³³ Ku Davidi la kawriva iniane, “Lu tupapalrasu nakwane, kadrwa ku apakaesadhane nakwane.

³⁴ Lwiyasi la siwlrisu mwa cekele, pelaela ki Abesalrume, palraingaku tukucingalre marasikai muswane, pangimia kudra sa tukucingalraku marasikai ki tamasu iya, si la pakaelrea ku pukusu telenge kwini kidredredreme ki Ahitupele, lu piasu kwini paralubungasu nakwane.

³⁵ Kwini tadrusa ka barakalai ka Zaduke si Abiathare la tara ikai kwini; lri dulrusu pelaela kudra la kilalrasu ikai ki daane ki talialalai singibila pelaela liniane.

³⁶ Kudra lalake lini ka Ahimaze si Yunathange la taelre liniane, la malra kwidra la sarubu lini ku la tangimiamiane iluku baai nakwane.”

³⁷ Ku talragi ki Davidi ka Husai la siwlri mwa Yerusalrime; la icengecenge ku Abesalrume mialri ikai kwini kelakela.