2 Samuile 14 - Ngudradreadrekadhane Ka Sisiu 魯凱語聖經

Padulru ku asiwlriane ki Abesalrume ku Yuabe

¹ Ku Yuabe ka lalake ki Ziruia la thingale ki talialalai ka Davidi ala ka mabarengere ki Abesalrume,

² la sikawlu ku umawmase mwa kavai Tikua silape ku tangea ka malrigili ka ababai, la kawriva iniane, “Kusu ala ngikamalremelremeana, la sisakalremeane, madha ngigagarugarucu, ngimia kau maulainga ku takalremeane ka ababai,

³ ala mwa kavai ki talialalai, malra kikai pelaelali kai vaga si kawriva ki talialalai.” Ku Yuabe la pelaela kwini ki ababai ku saiyaiyaini.

⁴ Kwini ababai ka swa Tikua la mwa kidrele ki talialalai, la musakene si guruthungane ikai daedae, iya kai, “Talialalai, ala paralubaili!”

⁵ La kivaga ku talialalai iniane, “Manemane ku murikaisu?” Kwini alisu la kawriva, “Matiakukurwaku ka walibakane, sarawapacai ku taelrelreli.

⁶ Tadrusa ku lalalakeli ku sawvalai, yakai saka minakavalane la ikai angangade makakalisi, la ka kadrwa ku umawmase ku yakai kwini si pawvagai liniane, ku tangea la papacai kwini ki tangea.

⁷ Talialalai, kikai kwidra kai laretesaneli makanaelre la makitu kiecebenga nakwane, kwini lalasu ani putaluvaivai ki lalake amiamia nakwane, ani ngwalai ku tapapacadhane ki betakaneini ku pasalrivane si kipathavungu papacai iniane. Kwini lalasu lu pia kwini, lri kakadrua ku natangeanga ku lalakeli. Kwini lalasu lri amudu ku sakathanenga ku sidramadramali, lai kakadrwanga ku lalake ki tawvaneli ku lri paucungulu ku mwabaibalrithi.”

⁸ La kawriva ku talialalai, “Lu siwlrianga, lri tara pasikaiyaku muswane marasikai kikai.”

⁹ Kwini ababai la kawriivana, “Talialalai, adravane ka pangiatumanesu, kikai pasalrivane papia nakwane si wacekecekeleli, kusu ka talialalai si wacekecekelesu kadrwa ku capilane.”

¹⁰ La tubalre ku talialalai, “Lwiyasi kikai ku wakukuludru muswane, malra iniane iluku mwa kai nakwane, kwini lasu lani kai vangavangenga muswane.”

¹¹ Kwini ababai la kawriva, “Talialalai, ala papia ki Tamatama ka Twaumasesu inulri, amani lwiyasi kwini lri bilri ka umawmase pacungulwana kisanu papacapacai, lai papacai kai ki vaevanga ka lalakeli.” Ku talialalai ka Davidi la tubalre, “Lri papiaku ki palralrawthu panianiake ka Tamatama pukaunu muswane, kwini lalakesu adravane ka vaevanga ka isiuini kai lri mucilri mucakena.”

¹² Kwini ababai la kawriivana, “Talialalai, ala pakawrivanaili ku taingeanenga.” Ku talialalai la tubalre, “Ala kawrivaa.”

¹³ Kwini ababai la kawriva ki talialalai, “Asu kirimu ranau papia ki mapapangale ki Twaumase si pianga kikai kaika pacengecenge ka awngane? Kaisu mwabangalre pakainganai kwini ki kia pakatwase pulatadre ka lalakesu siwlri mubalriu; kudra takawrivanesu kwasane maru ngiatatu pasalrivanengasu.

¹⁴ Kuta lri tara pacaita, mia ki nigugwane ka acilai ikai daedae, ka kai adulrwanenga sawlri. Adravane kai lri pasielanga ki wapacainga ku Twaumase, kusu ka talialalai nai tara duulrusu pasiwlri mubalriu kudra ki tangea ka acaicaicali ka umawmase.

¹⁵ Talialalai, kikai kelali kikai amani sa ikai kudra wakukuludru nakwane, la kamani ku kidremedremeli nau tara matikai kwini iya muswane ka talialalai, lri kitubiaku muswane ka talialalai ku apangimianesu pia kikai kitubitubili muswane.

¹⁶ Lu kidremedremaku lri tara kilalrasu nakwane ka talialalai, si palribulu pakidaili ki lri papacai nakwane si ki lalakeli, si malra naiane patwalai ki patarumara ki Twaumase ki mapapangaleini ka kadaengane kipakatwase ka umawmase.

¹⁷ Lu kidremedremaku, kai vagasu ka talialalai lri tara saasa nakwane, asi lwiyane kusu ka talialalai miasu ki sasiakawlu ki Twaumase dulru thingale ku unu si ini niyane. Ku Tamatama ka Twaumasesu ani tapalrapalra muswane!”

¹⁸ La tubalre ku talialalai, “Lri kivagaku muswane ku taingeane, kusu la tara tukavagavagana si tubalre nakwane.” Kwini ababai la kawriva, “Talialalai, ala kivagaili.”

¹⁹ Ku talialalai ka Davidi la kivaga, “Amani ku Yuabe ka siakawlu muswane kela kai pakawriva?” Kwini ababai la tubalre, “Lri papiaku ki niakesu ka talialalai kiketekete, kikai takivaganesu kikai kainaku pikakwa kai tubalre muswane. Unu, amanilringa ku mabelenge ki kwapingisu ka Yuabe ka pangimianga kikai, iyanga kikai amia nakwane.

²⁰ Kudra pangimiaini kikai pakai ku amalrane pangisawlri kikai tangimiane. Kusu ka talialalai miasu ki sasiakawlu ki Twaumase kalrigili, maka wadrele singibila sanaka maneemanenga kai kawmasane.”

²¹ Sakabilrilinga, ku talialalai la kawriva ki Yuabe, “Palraingaku kai tapangimianesu kikai. Lu mwa, la malra kwini ki langukathabarane ka Abesalrume iluku siwlri mwa kai!”

²² Ku Yuabe la usaakene guruthungane icucubungu ki talialalai ka Davidi, kawriva, “Talialalai, ku Twaumase swabulrubulru muswane! Kikai wathingalaku ka kiakilibakaku muswane, asi lwiyane kikai pwakawnusu ku kitubili muswane.”

²³ Ku Yuabe la ngidrakale, si katwase mwa kavai Gisure, la malra ki Abesalrume mailuku pasiwlri mu Yerusalrime.

²⁴ Ai ku talialalai la drekase kai palraingi ki Abesalrume ku yakai ki daane ki talialalai. Ku talialalai la kawriva, “Kainaku lri drele iniane” iya. Ku Abesalrume la ikaai ki daaneini, kai wadrele ki talialalai.

Pacepe ki Abesalrume ku Davidi

²⁵ Ikai palraelre ki Iseraylri, kadrwa ku natangeanga ku miyaiya ki Abesalrume ku ngiesadhanane ku tacebeaneini, kipusamalra kikadalame ki umawmase, twalai ki awlru pakela ki galawgau ki drapaleini kadrwa ku natikianenga ku takapwalane.

²⁶ Ku isiuini malegeme, ki caicaili lri tara sangu vaale kikecekece, lu kai pia kwini lri kaelrenge si kakudremelre turamuru. Kwini sangukikecekecane ku isiu, lu singikaiyane ku takelretane ki watalialaladhane si kunkingi, ku telregane lri ikaai kau drusa ku telregane ki kunkingi ki talialalai.

²⁷ Ku Abesalrume yakai ku tatulru ku sawvalai ku lalalake, la tangea ku ababai; ku naganeini kwini ki ababai la si Tamare, ka mathaithaithariri turamuru.

²⁸ Ku Abesalrume la ikai Yerusalrime tara drusa ka caili, kai kidrele ki talialalai,

²⁹ kwini lasu la sikawlu ku wamwa dawlu ki Yuabe, ani mwa ki talialalai kitutubi iya, ai ku Yuabe kai wakela. Ku Abesalrume la pelanga sikawlu ku umawmase mwa dawlu, ku Yuabe la kai mubangalre kela.

³⁰ Ku Abesalrume la kawriva ki sasiakawluini, “Kunumi ani drela, kai angangade ki Yuabe mapapasiagisi nai, la cebecebe ku mugi; kunumi mwa iluku ku apui si lama.” Kwini lalasu la mwa lama kwini ki umawma.

³¹ Ku Yuabe la mwa ki Abesalrume kivaga, “Ani kirimu lama pakudaraisi ku sasiakawlusu kikai ki umawmali?”

³² Ku Abesalrume la tubalre, “Padawlaku ki umawmase muswane, la kaisu kela. Ani mwa ki talialalai nitalingikaiyane nakwane kitutubi iya, kivaga iniane asu pakatwasa nakwane kavai Gisure si pasiwlri mwa kai; naika maesaesadhaku ikaai kavai. Kaiasasane, ala pasikaiyaili kelrete ku amwaneli kikawriva ki talialalai; lwiyasi ikai ku pasalrivaneli, ku talialalai lani pwa papacai nakwane.”

³³ Ku Yuabe la mwa kidrele ki talialalai, la pelaela ki talialalai ku vaga ki Abesalrume, ku talialalai la sikawlu ku umawmase mwa dawlu ki Abesalrume. Ku Abesalrume la kelanga, la guruthungane icucubungu ki talialalai sukubu; ku talialalai la uma iniane.