2 Samuile 13 - Ngudradreadrekadhane Ka Sisiu 魯凱語聖經

Amenungu si Tamare

¹ Ku lalake ki Davidi ka Abesalrume yakai ku agini la kathariri turamuru ku tacebeaneini, ku naganeini sia Tamare. Ku tangea ku lalake ki Davidi la kadalame kwini ki alisu.

² Ku Amenungu la kacaeme ngwalai ki dalamane; asi lwiyane kwini Tamare tawvaileketeana, lu kidremedreme lai kai pikakwa ngudadethe iniane.

³ Ku Amenungu la ikai ku talragini ka sia Yunadabe, ka lalake ki taka ki Davidi ka Simia. Kikai lasu malrigili lrilrigili ki umawmase;

⁴ kwini lasu la kawriva ki Amenungu, “Kusu amanisu ku lalake ki talialalai, lukakaiyaiya asu mia kai aru ka mangililisiane? Lri dulrusu pelaela nakwane?” Ku Amenungu la kawriva, “Madalamaku ki Tamare ka agi ki betakaneli ngukai ki tama ka makaela ku tina nai ka sia Abesalrume.”

⁵ Ku Yunadabe la kawriva iniane, “Asalu ngikacaecaemanesu, si apece itapeapecane. Lu kela ku tamasu drele muswane, la kitubia iniane, ‘Ala pakainganadha ki agili ka Tamare kela sirapale nakwane; lani ikai nakwane, ikai kudra ki adredrelane nakwane pasikai akame kau piya ka pange, si baai nakwane pakane’ iya.”

⁶ Ku Amenungu la ngikacaecaemane, apece itapeapecane. Ku talialalai ka Davidi la mwa drele iniane; ku Amenungu la kitubi ki tamaini, “Ala pakainganadha ki agili ka Tamare mwa kai, lani ikai nakwane, ikai kudra ki adredrelane nakwane pasikai akame kau piya ka pange, si baai nakwane pakane” la iya.

⁷ Ku Davidi la sikawlu ki umawmase mwa ki daane ki talialalai pelaela ki Tamare, “Lu mwa ki tapeapecane ki taka ka Amenungu, la drele ku lamanemane si pakane iniane.”

⁸ Ku Tamare la mwa; ku Amenungu la apece itapeapecane. Ku Tamare la malra ku nilrevegane, ikai ki adredrelane ki Amenungu tupange, si la akame.

⁹ Ku Tamare la malra ku pange patwalai ki taakamane gugu ku pange, la baai ki Amenungu, ai ku Amenungu la kai kane. Kwini lasu la kawriva, “Pakatwasa ki laumawmase!” Kwini laumawmase la makitu katwase.

¹⁰ Ku Amenungu la kawriva ki Tamare, “Malra kwini pange pwakai ki tapeapecaneli, la pakane nakwane.” Ku Tamare la malra ku pange iluku baai ki takaini.

¹¹ Sa pakapakane ku Tamare iniane, kwini lasu la ruthuku ki Tamare, la kawriva, “Agili, tatadrusa apece!”

¹² “Ini!” La iya ku Tamare si iya kai, “Kaka, madha vuthavutha nakwane si pia kikai akiarubwanane. Ikai ki swa Iseraylri kaika pinalraingane ku paiya ku ngimiyaiya kai!

¹³ Lri maka tangeraraneana naku icucubungu ki laumawmase? La mialrisu, ikai ki swa Iseraylri lri ngulringavanesu. Ala kitubia ki talialalai, lri tara malra nakwane si baai muswane.”

¹⁴ Ai ku Amenungu kai kialalra, si kwini lasu laka sapupukwane ki Tamare, la malra vutha si tusinalreme kudrulrunga iniane.

¹⁵ Sangilribatenga kikai, ku Amenungu la kalrase turamuru ki Tamare, kudra lrasaneini makadrwadrwa ki nadalamaneini iniane. Kwini lasu la kawriva ki Tamare, “Lu katwasa la iya!”

¹⁶ “Ini!” La iya ku Tamare si iya kai, “Lu pakatwasesu nakwane, kudra tapasalrivanesu lrika madraadrawana ki tapasalrivanesu nakwane paswala la iya!” Ai ku Amenungu la kai kilalra;

¹⁷ kwini lasu la dawlu kwini ki taramarasikaikai iniane ka sasiakawlu mudaana iya, la kawriva iniane, “Kainaku apiadrele kai ki ababai, malra iniane pakatwase, la drukuru ku lrawlrawdru!”

¹⁸ Kwini sasiakawlu la malra ki Tamare pulatadre, la drukuru ku lrawlrawdru. Ku Tamare la silaimai ku laimai ki kaina marudrange ka lalake ki talialalai ka maelrenge ka palimemelre.

¹⁹ Kwini alisu la ngisasabulu ku abu pwa ki awlruini, la thuriace ku laimai, si paidringi ki lringau ku alrimaini, katwatwase takutubitubi.

²⁰ Ku takaini ka Abesalrume la drele, la kivaga iniane, “Twasinalrelreme muswane ku Amenungu? Agili, madha kipakwalrialri. Ku Amenungu mialri ka taka ngukai ki tama ka makaela ku tina numi, madha matikaikai kikai ki sanaka aneaneanenga.” Ku Tamare la kipakwalri ku kidremedremeini kaseepele ikai kai ki daane ki takaini ka Abesalrume.

²¹ Ku talialalai ka Davidi la kilalra kikai, la kalisi turamuru.

²² Ku Abesalrume la ngwalai ki Amenungu ku tatusinalremeane kudrulru ki agini ka Tamare, la kagirimucu turamuru ki Amenungu, la kai kikawrivarivanga iniane.

Wabilri pasikai ki agini ku Abesalrume

²³ Sa tara drusanga ka caili, ku Abesalrume la ikai kwini ki adeethe talikai Iparaime kwidra ki Baale Hazure dawlu ku lri mulrawlrau kaciaciane ki kiu tulrisisi; kwini lasu la dawlu patuelre ki lalake ki talialalai kela kwini.

²⁴ Ku Abesalrume la mwa drele ki Davidi ka talialalai, la iya kai, “Ama, wadawlungaku ki tarakaciaciane ki kiu, la makitu kelanga si la dawla ki lakiacapicapilisu karedele kela.”

²⁵ La tubalre ku talialalai, “Ini, lalakeli, luiyasi la makitu kela nai makanaelre, alau lri pakwalri nai muswane.” Ku Abesalrume la apapelaela kitubi ki talialalai, la kai pukaunu ku talialalai, ai swabulrubulru iniane.

²⁶ Ku Abesalrume la kawriva, “Sana ngimia kwini, ani tara patupalra ki kaka ka Amenungu karedele nakwane midra.” Ku talialalai la kawriva, “Asingithanga ani tara tupaalra iya iniane?”

²⁷ Ai ku Abesalrume la apapelaelana kitubi, ku Davidi la pukawnunga ki Amenungu si drumane ka lalakeini ka talialalai patupalra ki Abesalrume. Ku Abesalrume la padulru ku thathatha ku angiakaneanane,

²⁸ la cunu ki papalraini, “Kunumi dredrela, lu kabusukunga ka Amenungu, la nau drekase numiane, lanu pwa papacai iniane. Madha mukulukuludru, ku bilrilanenga ku angimiane anika capilanengali. Kunumi kagaranga sikathane pwalrima, madha kalrikilrikilriki!”

²⁹ Kwini tarapalakelakebe iniane la singikai ku taiyane liniane ki Abesalrume papacai ki Amenungu. Ku drumane ku lalalake ki talialalai ka Davidi la makitu ngurigi ki ngiririgi mubere.

³⁰ Kwini lalasu sa ikaaiyana kadadalranane, la ikai ku wakela pelaela ki Davidi, “Ku Abesalrume papacai nguelre ku lalalake ki talialalai, kadrwa ku pasuruini ku natangeanga!”

³¹ Ku talialalai la ngidrakale, tubi si thuriace ku laimaini, si apece ikai daedae; kwini la papalraini ki talialalai ka lakiacapicapili la mialri makitu thuriace ku laimai lini.

³² Ai ku Yunadabe ka lalake ki Simia ka taka ki Davidi la kawriva, “Talialalai, ku lalakesu kai kiapapacai makanaelre, kathane ku Amenungu ka kiapapacai. Twalai ku tatusinalremeane ki Amenungu ki Tamare ka agi ki Abesalrume, ku Abesalrume kiadredremenga ku nau tara papaacai iniane iya, lri thingalesu patwalai drele ki lringau ki Abesalrume.

³³ La kusu ka talialalai madha kipawtengatenga kwini kaika tangimiamiane ka vaga, kudra wapacainga ku lalalakesu makanaelre amia ka vaga; ku patengatengane, kathane ku Amenungu ka kiapapacai.”

³⁴ Ki kwidra yai, ku Abesalrume matwaseenga mubere. Sakamani kwini, ku taralepelepenge kadrekadrenge ki cekele ka kwapingi la drele ku twalai Hurunaime kudra ki sisiane mulrawlrawdru ki kadadalranane, la pelaela ki talialalai kwini dreleini.

³⁵ Ku Yunadabe la kawriva ki talialalai ka Davidi, “Drela, kavai lalalake ki talialalai ka wakelakela, mia ku taiyaneli kwasane.”

³⁶ Kwini lasu twalrepelrepenge ku vagaini, ku lalalake ki Davidi la makitwakelanga mudaane. Kwini lalasu la karaleale tubi; ku Davidi si lakiacapicapilini la mialri makitu tubi adirivane.

^37-38 Ku Abesalrume mwabere mwa ki Talamai ka lalake ki Amihude ka talialalai ki swa Gisure, ikai kwini taratulru ka caili. Ku Davidi la ngwalai ki lalakeini ka Amenungu adirivane kawlai;

³⁹ ai sa ngilribatenga ku takwalrianeini adirivane, la kirimunga kabarengere ki Abesalrume.