2 Samuile 12 - Ngudradreadrekadhane Ka Sisiu 魯凱語聖經

Bulru ki Nathange si tangitatupelane ki Davidi

¹ Ku Tamatama la sikawlu ki yuginsia ka Nathange pamwa ki Davidi. Ku Nathange la kela kavai ki Davidi, la kawriva iniane, “Yakai ku cekele la ikai ku tadrusa ka umawmase, ku tangea maesaesaesai turamuru, ku tangea la matikukuru turamuru.

² Kwini sapaiswane la kakalra ku lalwange lakiu;

³ kwini matiakukuru laka vaeva ku lrulai ka kiuini, si ka ngilalangaini si lapulapu. Kwini lasu la kakalithi lapulapu kwini ki kiu, la pataelre ki lalakeini pakadradrau. Kwini lasu adravane ka akaneaneini la maalra si pakane paungulu kwini ki kiu, la alra kwini ki kiu ngipapikaikai papece, pangialrau ki lalalakeini.

⁴ La ikai saka minakavalane, kwini sapaiswane la kela ku badhabadhaini; kwini lasu la kai lreme patwalai ki lalapulapuini malra nguvaeva si pasudalru ki badhabadhaini, la kiriimulringa patwalai ki kwini ki matiakukuru ka umawmase malra kwini lrulai ka kiuini si tusapasudalrwane ki badhabadhaini.”

⁵ Sa kilalra ku Davidi, la pakamalisi kwini ki sapaiswane, la iya kai, “Lri papiaku ki palralrawthu panianianiake ka Tamatama kiketekete, ku pangiamia kai ku umawmase lri tara kipapaacai la iya!

⁶ Kwini lasu la lreeme pia kikai matiadingeselre matiangeange ka awngane, lri tara pangibiilri sawlri kudra ribicini padrima ku taisupatane.”

⁷ Ku Nathange la kawriva ki Davidi, “Ala kwini umawmase amanisu! Ku Tamatama ki swa Iseraylri amia kikai, ‘Pacegecegaku muswane tutalialalai ki swa Iseraylri, palribulu muswane kidaili ki alrima ki Saule.

⁸ La malraku ku kuni si lataelrelre ki Saule baainga muswane patuelre, si tutalialalai muswane rathudu ki swa Iseraylri si swa Yuda. Alaiyasi la kaisu makakelreteana, lri dulrwaku padrima baai muswane.

⁹ Asu kiriimu baebalre ki padradrekaseli? Asu kiriimu pia kikai matiakagirimucu ka awngane? La pakipapacaisu ki Uria ikai ki tamakarururuburane, kiasalrusu ku lrabu ki Amune si papacai iniane, ala malrasu ribici ki taelrelreini.

¹⁰ Paiyasu kikai baebalre nakwane, si ribici ku taelrelre ki Uria, ku tacekecekelanesu lrika palralrawthu kai maka mubere ki lrabu ka dramu.

¹¹ Lri papiaku muswane kiketekete, lri pangidrakalaku ki lawacekecekelesu si pakikaruburu lrithavulu muswane. Lri drelesu ku lrika amalraneli ki lataelrelresu baai kwini ki la ngwadadethe muswane ka lasawvalai; kikai laumawmase la lri padredredrele patakamacamaca muswane tadrusa liniane apece.

¹² Pasalriwsu ikai kadradridrimitane, ai lri malralringa naku kilakikai pukalealedrane putaluvaivai, si padrele ki swa Iseraylri makanaelre.’ ”

¹³ Ku Davidi la kawriva ki Nathange, “Kikai pasalriwngaku ki Tamatama.” Ku Nathange la tubalre, “Ku Tamatama pacepe muswane; kaisu lri kipapacai.

¹⁴ Ai, kikai paiyasu kikai si sidrekase ki Tamatama, kwini lalakesu lri tara paacai.”

¹⁵ Samaka kawrivanga, ku Nathange la katwase siwlri mutavanane. Ku Tamatama la pakacaeme ku pakialringau ki lalake ki Davidi si taelrelre ki Uria ka Batheseba.

Wapacai ku lalake ki Davidi

¹⁶ Ku Davidi la kitubi ki Twaumase ku apawdringadhane ki vavalake. Kwini lasu la laisi, lukamaungu la mudaane ki daaneini, taleare apece ikai daedae.

¹⁷ Kwini yadaane ka tarudrawdrangenga ka sasiakawluini la drakakale iniane, kwini lasu la kai mubangalre, lakai mubangalre nakibaalrulunga liniane.

¹⁸ Sangilribatenga ku ningusivalane ki tasukusukubane, la pacai kwini vavalake. Ku lasasiakawlu ki Davidi lakai lreme pelaela ki Davidi; kwini lalasu amia kai, “Sapanianianiakeana kai vavalake, lu kawrivata iniane kai mwabangalre tubalre, ata maka lreeme mwa pelaela wapacainga iya ki vavalake? Kwini lasu lau lri kiriimu ngikakabebetethe la iya!”

¹⁹ Ku Davidi la patarathingale sa matetetenge kwini lakiacapili iniane, la thingale ka wapacainga kwini vavalake, la kivaga liniane, “Wapacainga ku vavalake?” Kwini lalasu la tubalre, “Unu, wapacainga,” la iya.

²⁰ Ku Davidi la ngidrakale twalai daedae, la sikelre, si ngigagarucu, la kipabalrithi ku laimai, ala mwa ki daane ki Tamatama sukubu. Sa siwlri mwa ki daaneini ka talialalai, la papadulru ku akaneane; sa makaputalekenga, la kane.

²¹ Kwini kiacapilini la kivaga iniane, “Anai kai maka pulringalringau, sapanianianiakeana kwini vavalake, pasiakaisu iniane si laisi tubitubi; sa pacai kwini vavalake, la kirimulringasu ngidrakale si kane si ungulu!”

²² Ku Davidi la kawriva, “Unu, sapanianianiakeana ku vavalake, walaisaku tubitubi; asi lwiyane lu kidremedremaku ku Tamatama alau lri tukurwanaini nakwane, si kai papacai ki vavalake amiaku.

²³ Kikai la pacainga kwini vavalake, manemaneana ku alaisaneli? Lri maka dulrwanaku pasiela papanianiake ki vavalake? Yakai ku minakavalane ku lrika amaka mwaneli kavai iniane, ai lrika palralrawthunga kai maka siwlringa mwa kai nakwane!”

Kiatulalake ku Sulumungu

²⁴ Ku Davidi la sasa ki taelrelreini ka Batheseba, la tadrusa iniane. Kwini alisu ala tulalake ku vaeva ku sawvalai; ku Davidi la sunagane iniane pasi Sulumungu. Ku Tamatama la kadaalame kai ki vavalake,

²⁵ la cunu ki yuginsia ka Nathange baai ku nagane kai ki vavalake pasi Yedidia, asi lwiyane madalame ku Tamatama iniane.

Pamalebe ki swa Raba ka cekele ku Davidi

²⁶ Ku Yuabe la pacungulu kikaruburu ki kacekelane ki swa Amune kavai Raba, sa lri padaalrunga si lalri maka malra.

²⁷ Kwini lasu la sikawlu ku umawmase pamwa ki Davidi pelaela, “Kiakaruburaku ki swa Raba, si malranga ki taciladhane,

²⁸ kusu ka talialalai kaiasasane dawla sarubu ki drumane ka kwapingi, la ngikakamani sangiluku mwa kikaruburu! Kainaku palraingi ngikakamani mwa kikaruburu si malra ngitatulrigu kwini cekele.”

²⁹ Ku Davidi la sarubu ki lakwapingi. La papia kavai Raba, la malra kwini ki cekele.

³⁰ Kwini samiamiange ki swa Amune ka Muleke la ikai ku kingi ka pagamucu, ku telregane lri ikaai kau 35 ka kunkingi, ka niparaisane ku kasilwane. Ku Davidi la malra kwini kasilwane, si pwa ki pagamucuini. Kwini lasu la malrana ravase ku thathatha ku niravasane twalai ki cekele,

³¹ la drekase kwini ki mapapangale ki cekele arakaiya ku ridraidri, kakara, kumugu si kaungu, la vutha liniane ikai ki tagagane ki lringiga pakisikawkawlu. Ku Davidi la mialri tuthadaalrane marasikai kudra ki drumane ka cekele ki Amune ka laumawmase. Kwini lasu ala karedele ki lakwapingi siwlri mwa Yerusalrime.