2 Samuile 11 - Ngudradreadrekadhane Ka Sisiu 魯凱語聖經

Davidi si Batheseba

¹ Saka taradrusa ka caili ki kalarigarigane, yacengecenge ka kalakikaruburane ki latalialalai, ku Davidi la sikawlu ki Yuabe katwase sangiluku ki kwapingi tupalra ki kwapingi ki swa Iseraylri kikaruburu. Kwini lalasu la pamalebe ki Amune, malra kwini cekele Raba; ai ku Davidi asuru ikai Yerusalrime.

² Yakai saka minakavalane, sa lrika miawaubunga, ku Davidi la ngidrakale ki taapecaneini, la mwa talrugulrugane ki daane ki talialalai dadadavace, kwini lasu la twalai kwini drele ku tangea ku ababai ku siakelrelre; kwini ababai la matidalame ku tacebeaneini.

³ Ku Davidi la sikawlu kivavaga luka aneane kwini alisu, la thingale kwini alisu ka sia Batheseba, ka lalake ki Ilriame, ka taelrelre ki Uria ka swa Hite.

⁴ Ku Davidi la pasikawlu ku umawmase dawlu kwini ki alisu; kwini lalasu la malra iluku ki Batheseba, ku Davidi la mwa tadrusa ki alisu apece. (Kikwini kwidra ku Batheseba tau maka kabulabula ku tasieradhane.) Sangilribatenga, ku Batheseba la mutavanane.

⁵ Lakai tarathainu, ku Batheseba la ngithathingale ka tawbaliri, la sikawlu ki umawmase mwa pelaela ki Davidi, pelaela iniane ka tawbaliringa.

⁶ Ku Davidi la sikawlu ki umawmase mwa pelaela ki Yuabe iya kai, “Pakainganadha ki swa Hite ka Uria kela kai nakwane.” Ku Yuabe la pakatwase ki Uria mwa kidrele ki Davidi.

⁷ La kela ku Uria, ku Davidi la kivavaga iniane ku Yuabe si kwapingi mwadringadringai, ku takikaruburuburane ngiatumatumane? La iya.

⁸ Ala iya kai ki Uria, “Lu mutavanana si isadraana!” Sa katwasenga ku Uria, ku Davidi la sikawlu ku wamwa linianane si baai ku saceacebe.

⁹ Ai ku Uria kai mwatavanane; kwini lasu taelre ki tarakadrekadrenge ki daane ki talialalai apece ikai ki lrawlrawdru ki daane ki talialalai.

¹⁰ Sa kilalra ku Davidi ka kai mwatavanane ku Uria, la kivaga iniane, “Maulainga ku tamulatadranesu, la tawkelasu kaiasasane, asu kai mutavanane?” La iya.

¹¹ Ku Uria la tubalre, “Ku latamagarange ki swa Iseraylri si swa Yuda makitwa ikai takikaruburuburane, si ku Langiane la ikai kavai, ku tamatama ki kwapingi ka Yuabe si lakwapingini makitwa ikai ubulane tutakwapingane, anaku maka dulru mutavanane si kanekane ungungulu, tadrusa ki taelrelreli? Papiaku ki niakesu kiketekete, lutuumane kainaku lri maka pangimia kikai!” La iya.

¹² Ku Davidi la kawriva, “Luiyasi kamani kwini, ani ikaiyana kikai kaikameane, luiya la nau sateatedrenga muswane putavanane.” Kwini ki vai ku Uria la ikaaiyana Yerusalrime.

¹³ Sakakaiyane, ku Davidi la dawlu si kabalrulu iniane kane ungulu, la pakabusuku iniane. Ai kwini sakamaungu, ku Uria laka sakamiya kai mutavanane; kwini lasu wamwa kwidra ki taikaikaiyane ki tarakadrekadrenge ki daane ki talialalai, si apece ikai ki tanaini.

¹⁴ Sakamialrealre, ku Davidi la pacase ku tigami baai ki Yuabe, la cunu ki Uria iluku.

¹⁵ Kwini tigami amia kai, “Malra ki Uria pataluela pwa ki maparawraamurunga ki tamakarururuburane, kunumi la suludra arwalrilrikudru, lani kipapacai ikai ki tamakarururuburane.”

¹⁶ Lakamani kwidra, sa kikaruburuburu ku Yuabe, la pwa pasakai ki Uria mwa sakai ki takaparawramuuranenga ku tamapaececebane ki badha.

¹⁷ Ku badha la kainganai ngibwale ki cekele, lepenge ki kwapingi ki Yuabe. La ikai ku lakwapingi ki Davidi ku la kiapapacai; ku Uria ka swa Hite la mialri kipapacai.

¹⁸ Sangilribatenga kikai, ku Yuabe la pelaela ki Davidi kikai tangimiane makakaruburu;

¹⁹ ku Yuabe la pelaela kwini ki kiasikawlu, “Lu maka pelaelangasu ki talialalai kikai tangimiane makakaruburu,

²⁰ alau lri kaelaela, kivavaga, ‘Anu mua arwadethe turamuru ki alradre ki cekele kikaruburu? Laibekace numi kai thingale, ku badha ka lri twalai ki alradre ki cekele belenge lraili numiane?

²¹ Marimurunga numi kudra tangimiane ki lalake ki Gidiungu ka Abimileke luka ngiatumane pacai? Kwini lasu yakai kavai Thebeze kidrepete kwidra lrudrulu ki ababai ku vaeva ka tapasilribulribwane ka lrenege la pacai. Anungitha adethe ki alradre ki cekele kikaruburu?’ Lwiyasi ku talialalai la kivaga kikai, kusu pelaela iniane, ‘Ku mabelenge ki kwapingi ka Uria mialri kipapacai amia madu.’ ”

²² Ku kiasikawlu la kela ki talialalai ka Davidi, la pangimia ku taiyane ki Yuabe iniane si pelaela ki talialalai,

²³ la iya kai, “Ku kwapingi ki badha maparawramuru ku puku lini naiane; kwini lalasu twalai ki cekele ngibwale, la ikai latadre makakaruburu naiane. La saladha nai pasiwlri ki badha pakela ki lrawlrawdru ki cekele;

²⁴ kwini lalasu sakai belenge ki alradre ki cekele lrailraili naiane. Kudra mabelenge ki kwapingisu ka talialalai la makitu kipakai si pacai; ku swa Hite ka Uria la mialri kipapacai.”

²⁵ Ku Davidi la kawriva kwini ki kiasikawlu, “Lu siwlria si pasapukwane ki Yuabe, madha kipakwalrialri ku kidremedremesu iya, asi lwiyane ikai ki tamakarururuburane kaika athingathingalane lu lrika aneane ku wapacai ku lri panianaiakeana. Pasapukwana iniane, paelrelrea tuvaeva ku puku numi si kikaruburu ki cekele, la malra pakamudu liniane.”

²⁶ Ku Batheseba ka taelrelre ki Uria sa kilalra ku taelrelreini ala ka kiapapacai ikai tamakarururuburane la kirimu tubi turamuru si pasikai iniane kalreme.

²⁷ Sangilribatenga ku takalremeane, ku Davidi la malra ki Batheseba mwa ki daane ki talialalai, ataelrelrenga iniane, la pasikai ki talialalai tulalake ku vaeva ku sawvalai. Ai ku Tamatama kadrwa ku takiragadhane ku tapangimiane kikai ki Davidi.