2 Samuile 10 - Ngudradreadrekadhane Ka Sisiu 魯凱語聖經

Pamalebe ku Davidi ki Amune si Siria

¹ Sangilribatenga ku kaika tinara thainwane, ku talialalai ki Amune ka Nahase la pacainga; ku lalakeini ka Hanungu la mucungulu atalialalai.

² Ku Davidi la kawriva, “Lri makakathariraku ki Hanungu, mia ku tapangimiane ki tamaini ka Nahase makakathariri nakwane.” Lakamani ku Davidi siakawlu ki sasiakawluini mwa mapabebere. Sa darurunga kwini lalasu,

³ ku tara masasangililuku ki swa Amune la kawriva ki Hanungu ka talialalai, “Ku sikawlu ki Davidi kikai laumawmase mwasakene ki natalialalai, si kela adrelane kisapalra muswane amiamiasu? Kai lrika amiamia kwini! Ku sikawluini kikai ki laumawmase kela kai, pakai ku alrilrivane ku tangimiamiane kai ki cekele, ku lrika akelane mucekele mitane!”

⁴ Ku Hanungu la malra pwalra ruthuku kwini ki pasikawluini ki kiacapili ki Davidi, la malra kiriti ku pararamau ku ngisingisi lini, la malra kwini laimai lini patwalai ki mapudukuduku retege, ala pwa pakatwase liniane.

⁵ Kikai laumawmase ku takitusinalrelremeane, la kainu turamuru, kai lreme siwlri. Ku Davidi sa kilalra kikai tangimiane, la pakatwase ku wamwa pelaela liniane ikaiyana Yeriku, lu kaelrengenga ku ngisingisi numi la siwlria.

⁶ Ku swa Amune sa thingale ka mauramirami lini ki Davidi, la patwalai ki Bitherehube si Zuba dawlu ku ta 20,000 ku kwapingi ki swa Siria, la twalai Tube dawlu ku ta 12,000 ku umawmase, la mialri patwalai ki talialalai ka Maka pawlrawlrau ku takudrulu ku umawmase.

⁷ Ku Davidi la tarumara ku sakipelaelane, la drekase ki Yuabe mailuku ki kwapingi mwa kidresenge.

⁸ Ku swa Amune la pakainganai ku kwapingi, la sakai kwini ki salralriwgu ka cekele Raba; kwini drumane ku kwapingi ki Siria si twalai Tube si Maka ku laumawmase la sakai tali latadre katilibinga.

⁹ Ku Yuabe la drele kwini ki badha ka lri singi cucubungu lri singi lrilrikudru si madradresenge, la pilri kwidra tagagarange ku kwapingi ki swa Iseraylri, patilibi liniane mwa kikaruburu ki swa Siria,

¹⁰ ku drumane la baai ki agini ka Abisai sangiluku. Ku Abisai la malra kikai lakwapingi patilibi mwa kikaruburu ki swa Amune.

¹¹ Ku Yuabe la kawriva ki Abisai, “Lwiyasi la drelesu laka sapupupukwane nakwane kai swa Siria, wakela madu palribulu nakwane; lwiyasi ka sapupupukwane muswane ku swa Amune, ku lri keelaku palribulu muswane.

¹² Kagaranga kakecenge, pasikai ki sakacekeleta si cekele ki Twaumase kecengane kikaruburu! Ku Tamatama ani pangimianga ku kidremedremeini!”

¹³ Ku Yuabe si lakwapingi la arwa cucubungu kikaruburu, ku swa Siria la amaki si katwase mubere.

¹⁴ Ku swa Amune sa drele ki swa Siria ka mwabebere, kai lalasu la mialri katwase mubere ki Abisai, si siwlri mucekele. Ku Yuabe la katwase kwini ki tamakaruruburanane ki Amune, siwlri mwa Yerusalrime.

¹⁵ Ku swa Siria sa kipamalebenga ki swa Iseraylri, la tupela tupudriadringai rathudu ki kwapingi.

¹⁶ Ku talialalai ka Hadadizere la sikawlu ku umawmase, mwa malra kwini yakai tali talrawane kadravane Yuparati kwini kwapingi ki swa Siria, kwini lalasu la ikai ki tamasasangilukane ki tamatama ki kwapingi ki Hadadizere ka Subake kela mwa Hilame.

¹⁷ Sa thingale ku Davidi la velevele ki kwapingi ki Iseraylri, si talubalre kadravane Yuredange, mwa ka Hilame, kwini tasakaiyane ki swa Siria kikaruburu ki swa Iseraylri. Sa pathagili makakaruburu,

¹⁸ ku swa Iseraylri; la pamalebe ki swa Siria. Ku Davidi si kwapingini la papacai ku ta 700 ku taramarasikaikai ki palridingi ki kwapingi si ta 40,000 ku tarangurigirigi, la pikaiyana kwini papacai ki tamatama ki kwapingi ki badha lini ka Subake.

¹⁹ Ku la swa talikaikai ki Hadadizere ka latalialalai sa drele ala ka kiapamalebenga ki swa Iseraylri, la kirimu kikadalru kathariri ki swa Iseraylri, si pasalaladha liniane. Ku swa Siria la mukuludru nau paralubwana iya ki swa Amune kikaruburu.