2 Samuile 1 - Ngudradreadrekadhane Ka Sisiu 魯凱語聖經

Kiapelaela ku Davidi ala ka wapacai ku Saule

¹ Sapacainga ku Saule, ku Davidi pamalebe ki swa Amaleke si kainganainga siwlri, la ikai ka Zikelage makapusale.

² Saka samakatulrulu, la ikai ku tangea ka langukathabarane ka twalai ki takwapingane ki Saule kela, pakai ku apathingalane ala ka watubitubi, kwini lasu la thuriace ku laimai, si ngicacabungu ku abu pwa ki awlruini. La kela mucucubungu ki Davidi, si guruthungane sukubu ikai daedae ki sawsaesakene.

³ Ku Davidi la kivaga iniane, “Twalaisu inu kela?” La iya. Kwini lasu la iya kai, “Twaladhaku ki takwapingane ki Iseraylri kainganai mubere” La iya.

⁴ La kivaga ku Davidi, “Pelaelaili, ngiatumatumane ku talikai kavai?” Kwini langukathabarane la kawriva, “Ku kwapingita twalai ki takikaruburuburane amaki si mubere, la takalra ku kiapapacai. Ku Saule si lalakeini ka Yunathange la mialri kipapacai!”

⁵ La kivaga ku Davidi, “Asu thingale ala ka wapacai ku Saule si Yunathange?”

⁶ Kwini langukathabarane la tubalre, “Yacengecengaku ikai lregelrege ka Gilebua, la drelaku ki Saule, la gurapangane ngicaculrulu ikai ki idirini, ku ngwapalridilridingi si ngwarigirigi ka kwapingi ki badha la kisanu padalidalinga iniane.

⁷ Ku Saule la ngibangulu drele nakwane, si dawlu nakwane. La tubalreaku, ‘Kawvadhaku iya!’

⁸ La kivaga nakwane aneanesu iya; la pelaelaku swa Amalekeaku iya.

⁹ Kwini lasu, ‘Bwala acegecega ithili nakwane, la pwa culrulu panguniakane nakwane! Kai ngiacaemaku turamuru kai takipakadulaneli, lai lri pacaingaku, lai kainaku saranguniakane’ la iya.

¹⁰ La mwaku si papacai iniane, asi lwiyane wathingalaku ka kai lri maka panianiakenga. La malraku ku pagamucu si kalatheini, iluku baai muswane.”

¹¹ Ku Davidi la tubi turamuru si thuriace ku laimaini; kwini lakwapingini la mialri makitu thuriace ku laimai lini.

¹² Kwini lalasu la adirivane tubi, pasikai ki Saule, Yunathange si mapapangale ki Tamatama ka swa Iseraylri, si laisi pakela ki maungu, asi lwiyane takalra turamuru ku umawmase ku kiapapacai ikai ki tamakarururuburane.

¹³ Ku Davidi la kivaga kwini ki mailuku pelaela ka langukathabarane, “Laka swainusu ka umawmase?” Kwini lasu la tubalre, “Kunaku swa Amalekeaku, ka yakaikai numiane ka badhabadha.”

¹⁴ Ku Davidi la kawariva, “Asu maka lreme papacai kwini pilri tutalialalai ki Tamatama?”

¹⁵ Ku Davidi la kawriva ki tangea ki sasiakawluini, “Pwa papacai iniane iya!” Kwini sasiakawlu la pwa culrulu kwini ki swa Amaleke.

¹⁶ Ku Davidi la kawriva kwini ki lasu ka swa Amaleke iya kai, “Ngiacacugusu kwini pasalrivanesu! Ngiapapelaelasu kamani ku tapapacadhanesu kudra pilri ki Tamatama tutalialalai, taingeane ka ngitatupasalrivanengasu.”

Twasenai ku sasilringavane ki Saule si Yunathange ku Davidi

¹⁷ Ku Davidi la tusenai ku vaeva ku sasilringavane ki Saule si Yunathange,

¹⁸ la drekase malra kikai bu ka senai si bulru ki mapapangale ki swa Yuda iya. Kikai senai nipacasane pikai ki senate ki Yasare ka Hungu.

¹⁹ Ikai ki lregelrege ki swa Iseraylri, wapacainga ku tamatama nai! Mwakadrulunga kudra lagaragarange ku kwapingi nai!

²⁰ Madha pelaelaela ikaikai Gathe; madha pasarasarau ikaikai Asekelungu kadalranane ki cekele. Madha pakirararagai ki lalabaibai ki swa Pelisitine; madha pakapeapeaperau ki lalabaibai ki sakamaelanane ka umawmase.

²¹ Ku lalregelrege Gilebua anika palralrawthunga kai kipawdalenga; ku angangadeini anika palralrawthunga ka takawbulane. Asi lwiyane ku alathare ki tamagarange wadilanganenga; ku alathare ki Saule kai lri kipaelelethenga.

²² Ku bu si lraili ki Yunathange, sapukwane ka sapapacai turamuru, ku dramu ki Saule kadrwa ku pakaulapeini, palregese ki tamagarange, pakabulrutu ki badha.

²³ Ku Saule si Yunathange matiakiusakene, matiakadadalame; taelre sapanianianiake, la lri kai mauvagai adravane sapacai; kwini tadrusa mapapipidiki ki takanga, mararakace ki raiyungu.

²⁴ Lalabaibai ki swa Iseraylri, silringava ki Saule! Amanini ka pangiaragelane numiane ku madirele ku laimai, la pangiragelane numiane ku kingi, gingi si silu.

²⁵ Kikai latamagarange la makitu mwakadrulunga, pacai ikai ki takikaruburuburane. Ku Yunathange la mukadrulu pacai ikai lregelrege.

²⁶ Kaka ka Yunathange, watubitubiaku muswane; kialibakesu turamuru nakwane! Ku dalamanesu nakwane mathaithaithariri turamuru, silrialribateana ki dalamane ki labaibai.

²⁷ Mwakadrulunga kai latamagarange; ku sakikaruburuburane lini kiacilringa.