2 Pitiru 3 - Ngudradreadrekadhane Ka Sisiu 魯凱語聖經

Ku Tamatama pwakawnu ku akelane ngusela

¹ Kinilibakane ka laretesaneli, kikai pacaseli si baai numiane yai mwasaka drusanga ka tigami. Ikai adringi kai ki drusa ka tigami, pakiapapawlringavaku numiane kilakikai pasapukwane ku akabulane ku kidremedreme numi.

² Pulringava ku taiyane ki yuginsia kunadruma, si Tamatamata ka Takipalribulribulane ku pangukaini ki nisikawlane si padaruru pelaela numiane ku drekase.

³ Ku makuciaciingalrenga yai, lri tara thiingale numi, ikai ki bilrilanenga ka vai, yakai ku laumawmase ku kiaarakenga ki ngipapakaesadhane ki kidremedreme, lri kainganai ulralrakai numiane,

⁴ si iya kai, “Kudra lasu kaika palrainginga ku akelaneini ngusela? La inunga? Kai wapacainga kai lacucungulaneta, patuelre kaika thadaalrane sakapathagilane sa tawbekace kai kawmasane?”

⁵ Kai lalasu waranau kai wathengete ki Twaumase ku taikaiyane sa taupathagili arakai ku vagaini bekace belenge si kawmasane. Kai kadaengane yai twalai ki acilai si ngukai ki acilai ngidarepe.

⁶ Kudra supilri ka kawmasane laka twalai ki acilai, amani kwidra kia pakaamudu ki acilai.

⁷ Kikainga kai subelebelenge si kai lebe laka thadaalrane ka arakai ku vaga ki Twaumase pikai paasuru, lri ukalava ki kai masalru ka umawmase ku akisaibangane, lulri kipakamudunga kudra vai, lri ara apwi lama.

⁸ Ai, kinilibakane ka laretesane, yakai ku taingeane ku kaika akarimurane numi: Lu drele ku Tamatama, ku tinarakudrulane ka caili mia ki minaka vavaalane, ku minaka vavaalane mia ki tinarakudrulane ka caili.

⁹ Kai Tamatama kai ngiamia ki langumawmawmase ku takidremedremane, ngiabalabalai kai pangimia ku palraingingaini. Ngiabalre kamani, paacepe numiane, asi lwiyane kai palraingi lu ikai ku natangeanga ku mwa renere, ani kidaili ki pasalrivane makanaelre amia.

¹⁰ Ai, ku lrika akelane ngusela ki Tamatama lri mia ki tarakupawpa pangitutuluku kela. Kudra vai kwini. Kai swa subelebelenge lri ikai kwidra ki maadrau ka lingau kawlrau, kai la ngwababelenge lri kulama ikai ki apwi, kai kadaengane si sanaka maneemane la kaamudu patuelre.

¹¹ Ki kikai lri ngimia kai kaamudu patuelre, kunumi lri ngimia numi ki ngitwatumane ka umawmase? Kunumi ngukaiya ki mabula, musakene ki Twaumase ku sikace,

¹² Ukalava ku vai ki Twaumase, kisamula pakirarimu ku lrika akelane. Ikai kwini ki vai kai subelebelenge lri kilama, kai vai, dramare, latariau lai lri ikai ki apwi ngiderenau.

¹³ Ai, kuta mwakalavalavata ku palrainginga ki Twaumase ku bavane ka belenge bavane ka kadaengane, ikai kwini ku dringelresane lrika apalralrawthunga ikai.

¹⁴ Lakamani, kinilibakane ka laretesane, kudra mukalavalava numi kwidra ki vai, la ikaiya cucubungu ki Twaumase kisamula kisilape ku akabulane, ikai ki sikace ka kadrwa ku akikaelaelane, si makakadalru iniane.

¹⁵ Sakaiya ku pacepane ki Tamatamata kamani ku tangukaiyane numi kipalribulu, mia ki retesaneta ka Pawru arakai ku baai ki Twaumase ku lrigilane si tigami pasapukwane numiane.

¹⁶ Ikai ki tigamini patuelre matiakai ki kikai. Ki latigamini yakai kwidra la makucingalre thingale, la kicapange ki swacenge kwidra ki kadrwa ku thingale ka umawmase, mia lu paamama swacenge ki talidrumane ki Sisiu, la ngukai kwini si ngipapakaamudu.

¹⁷ Ai, kinilibakane ka laretesane, wathingalenga numi kilakikai, la telenga, amani lu kiaravaga numi kitavuvulrucu ki lamanganga ki umawmase si iluku numiane mwa ki maelane ka kadalranane, pakidaili numiane kwidra ki tasakaiyane numi ki mapapedrenge.

¹⁸ Ikaiya ki migemi ki Tamatamata si Takipalribulribulane ka Yesu Kirisitu, si ikai ki athingalaneta iniane, pacungucungulu adili. Ku lrigu ani papia iniane, twalai kaiasasane pakela palralrawthu! Amingi.