2 Pitiru 2 - Ngudradreadrekadhane Ka Sisiu 魯凱語聖經

Kai ka patengane ka yuginsia

¹ Kunadruma yakai ku kaika patengane ka yuginsia ikai ki cekele ki swa Iseraylri, laka miyaiya ikai ku kaika patengane ka tarabulrubulru lri utaluvaivai ikai numiane. Lri apalrilrigili pasaela ku lrika amani ku waamudu ka maelane ka sabulrwane, ka kai kiatuvaga ki palribulu liniane ka Twaumase, ngimamalra ku akamudane lini.

² Adravane ka miyaiya kai, takaalrana ku umawmase ku lri tupapalra kudra ngilisianane ki kakwakudhane lini, ngwalai liniane ku patengane ka sabulrwane la kikabebetethe.

³ Kikai kaika patengane ka yuginsia paakai ku angulwadhanane ku ravane lini, arakai ku nibekacane ku abulru si lrilrigili malra ku lawbubulu numi. Twalai kunadruma, ku sasaibangane ki Twaumase tamukalavane ki miyaiya kai ki umawmase, kai lalasu kailri maka ubere ki akamudane!

⁴ Ku Twaumase kai paacepe kwidra ki pasalriu ka sasiakawlu belenge, waverevere liniane puswadriadringi, emenge liniane pikai kadradridrimitane, ukalavalava ku akisaibangane.

⁵ Ku Twaumase kai paacepe sakanadruma ki zidai, arakai ku telebe amudu kwidra la kadrwa ku Twaumase ki kidremedreme ka laumawmase, la palribulu ki amani ku peaelaelaela ku dringelresane ka Nua si drumane ka tapitu ka umawmase.

⁶ Ku Twaumase pathavungu ki swa Sudume si swa Gumura ka drusa ka cekele, pulebe ku apwi si lama, arakai tusabulrwane ki kai masalru ka laumawmase.

⁷ Palribulu ki mathariri ka Lute, ku ngwakai ki ngilisianane ki kakwakudhane ki manganga ki laumawmase si kwalri turamuru ku kidremedreme.

⁸ Kudra mathariri ka umawmase yakai ki manganga ka umawmase, drele lukakaiyaiyaiya, kilalra lukakaiyaiyaiya kudra ngwakai ki malisi ka kakudhane, la kwalri turamuru kudra kidremedreme.

^9-10 Ku Tamatama wathingale ku apangimiane palribulu kudra ki mwasakene ki Tamatama pakidaili ku akituthiathingalane, la thingale ku apangimiane suru ki manganga ka umawmase pikai ki akipathavungane, ukalavalava ku akisaibangane ku vai. Kilakikai kaika patengatengane ka tarabulrubulru la aru ngikamiane ngisasingikai, kai mwasakene ki matiausakene ka yabelenge sikakathane ngiabaalrelringa sidreadrekase liniane.

¹¹ Adravane kudra walribate ku puku kai ki kaika patengane ka tarabulrubulru ka sasiakawlu belenge, mialri kai arakai ku tusinalremeane ku vaga; icucubungu ki Tamatama kukusu liniane.

¹² Ai, kikai laumawmase mia ki waudriwdripi, kudra takitulalakaneini lri kisaladhaladha kipwalra si kipapacai, kai lalasu singiakai ku takaumawmasaneini ngivelevele, tulilisi ku kaika thingaleini ku kakudhane. Kai lalasu lri kipangimia ki waudriwdripi ki pakaamudu.

¹³ Kai lalasu wadarepe ku akwalriane, lai tara ngikakane ku madruini. Papia liniane, kudra akiraragadhane amani kwidra yatailebeane ki ledra ki vai pangilralraingi ki urikaiyane ki beateini. Kwi lalasu makudrulru si ngilisiane turamuru; lu kilringulu numiane kane ikai ki cukui, amani ku akiarubwanane numi si akitusinalremeane numi, asi lwiyane kai lalasu taarakaiyane ku salrilrigilane tuperavane!

¹⁴ Kudra maca lini kiararakete drele ki pairairange ka ababai, ku apasalrivane ku kidremedreme kai maka ngwalwalwadhane. Walrilrigili ki twaramuru ki umawmase, kudra kidremedreme lini twalrawnga ki ravane, kai lalasu kiapusunga ki Twaumase!

¹⁵ Kai lalasu kiadailinga ki pacengecenge ki kadalranane. Katwasenga mwa ki makawli ki kadalranane, thadalranenga ki kadalranane ki lalake ki Biure ka Balame. Ku Balame maraau ku kai madringelrese ka paisu.

¹⁶ Ngwakai ku tapasalrivaneini si kikaelaela. Kwidra kai wathingale kawriva ka ruba la karariau ku vaga ki umawmase, si telenge ki yuginsia pia ku kaika pinacengecengane ku kakudhane.

¹⁷ Kikai laumawmase mia ki mameale ka taberadhane, mia ki kiaipi ki valrigi ki umuku ka ememe, ku Twaumase padulrunga ku dradrimitane ku lrika taikaiyane lini.

¹⁸ Kai lalasu kawariva ku ngikalrilrigwane ka ngiakulrungu ka vaga, arakai ku urikai ki kinawmasane lrilrigili kudra la tau katwatwase ubere ki ngialisiane ka sikace ka laumawmase.

¹⁹ Kai lalasu palraingi baai ki umawmase ku angilralraingane, ai aduri ki ngilisianane, asi lwiyane kai umawmase lu kiruthuku ki manemane aduri ki manemane.

²⁰ Kai umawmase alaiyasi ngukai ku tathingalane ki Tamatamata ka Takipalribulribulane ka Yesu Kirisitu, twalai kai ki puku ki ngilisianane ki kawmasane kainganai mubeere, lukabilrilane la ki pwalranga, si kiruthuku, kudra miyaiya kai ku umawmase ku angimianeini lrika malilisi ki siaswalane.

²¹ Wathingale ka yakai ku pacengecenge ku kadalranane, ai matwase kudra tarumaranga lini ka saniange ka drekase, ku miyaiya kai ku umawmase maesaesai ana kai thingale ka yakai ku pacengecenge ku kadalranane.

²² Kudra nimapelaelaelane ngwakawmasane ka vaga ku taiyane pacengecenge, kai lalasu ku tangimiane lini mararaamau kudra, “Ku tawpungu siaulriwlri kane ku putangaini ku lamanemane”, si kwidra, “Ku beke mwabanau si kabula, la siwlriwlringa mwa ki dulrailraki ngibalrwalrwalrutai.”