2 Pitiru 1 - Ngudradreadrekadhane Ka Sisiu 魯凱語聖經

¹ Kwaku ka Simune Pitiru yai sasiakawlaku ki Yesu Kirisitu si nisikawlane. Wapacasaku tigami baai kwidra la ngwakai ki dringelresane ki Twaumase si Takipalribulribulane ka Yesu Kirisitu, si kudra mia naiane kisupisupilri kwidra thadaalrane ka tinukucingalrane ka salrwane ka laumawmase.

² Anu ngukai ku tathingalane numi ki Twaumase si Tamatamata ka Yesu Kirisitu tarumara ku makaalra ku migemi si sulivatane.

Tadawlane si tapilriane ki Twaumase

³ Ku Twaumase arakainga ku pukuini, baai mitane patuelre ku lrika arakaiyaneta cekecekele ikai ki amusakenane ki Twaumase, kikai vinuthane baai ngwakai ki tathingalane kwidra ki amani ku wadawlu mitane pakisupilri kudra lrigu si thariraneini ka Twaumase.

⁴ Miyaiya kai, wamalra kudra palraingingaini kudra madraadrawnga si tinukuciacingalranenga ka migemi baai mitane; ngukai kilakikai migemi, la dulru numi mubere ki nau pakaamudu kawmasane amia kwidra takidremedremane, si kisupisupilri ki Twaumase.

⁵ Ngwalai kikai, kunumi kisamula lanu ikai ki salrwane drima ku tharirane ku kakwakudhane; ikai ki tharirane ki kakwakudhane drima ku thingalane;

⁶ ikai ki thingalane drima ku angikakelretane; ikai ki angikakelretane drima ku sakiadiadili; ikai ki sakiadiadili drima ku usakenane;

⁷ ikai ki usakenane drima ku akilibakane ki retesane; ikai ki akilibakane ki retesane drima ku kilibakane patuelre.

⁸ Kilakikai amani ku lrika apadilane numi ki tharirane ki kakwakudhane, alaiyasi pikainga numi patuelre, lri dulru numi aru thingale ki Tamatama ka Yesu Kirisitu.

⁹ Ai, ku pakakadrwa kilakikai tharirane ka kakwakudhane edreekane ku tadrelane, ka mamukici, marimuru ku supilri ka pasalrivane lini ala ka kiasinawnga pakabula.

¹⁰ Lakamani, laretesaneli, aru kisamula, ku tadawlane si pilri ki Twaumase anika palralrawthunga ka takilringavanenga numi, lu ikainga kikai takilringavanenga, lri kainu turamurunga si kisaalrunga.

¹¹ Lakamiyaiya kai, lri malra numi ku kingidri si maka mudaane ku palralrawthu ka kuni ki Tamatamata si Takipalribulribulane ka Yesu Kirisitu.

¹² Lakamani, adravane thingalenga numi kilakikai, si ikai kwidra ki nitarumaranenga ka patengane ka sabulrwane acegecege kapapedrengenga, lri kainaku palikaiyana ku apakipapawlringavaneli numiane.

¹³ Lu kidremedrema ku, ku tapanianiakaneli ki minaka vaalane, lrika taparalubanaku numiane ku lrika apulringavane numi kilakikai.

¹⁴ Wathingalaku, kainaku lri tarathaynunga si kidaili kikai lri kalisi ka kinawmasane, kikai yai amani ku Tamatamata ka Yesu Kirisitu ka peaelaela nakwane.

¹⁵ Lri tara kidremedremaku ku lrika apulringavane numi kikai adravane pacainga naku.

Peaelaela ku lrigu ki Kirisitu

¹⁶ Kudra pelaela nai numiane ku pangukai ki puku si akelane ngusela ki Tamatamata ka Yesu Kirisitu, kaika nipatwaladhane kwidra ki nitubeabekacane ka la kaika patengane kwidra nipatululane ka vaga, patakamacamaaca nai drele ku takasanianganeini.

¹⁷ Sa twalai ki Tama ka Twaumase tarumara ku takasaniangane, si lrigu yai, yakai nai makanaelre. Sa kamani kwidra, ku abebeelengenga ka lrigu ka Twaumase amia kai iniane, “Kikai amani ku kathalraili ka Lalake, madalamaku iniane.”

¹⁸ Kiaredelane nai iniane si taelre ikai ki saniange ka lregelrege, si kilalra nai kikai twalai belenge kainganai ka lingau.

¹⁹ Lakamiyaiya kai, arwa kasalru nai ku tapelaelane ki layuginsia. Kunumi pudriadringadha kirarakete kikai matiakiragai ka vaga, asi lwiyane mia ki tinaki ka paledra ki kadradridrimitane, pakela ku takaliarane, kela kudra taledrane ki sapakataleare ka tariau ikai ki kidremedreme numi kwidra ki vai.

²⁰ Ku makuciacingalrenga, ka apulringavane numi: Madha ngisasingikai ku takidremedremane numi swacenge kai yadringi ki Sisiu ka yugingi.

²¹ Asi lwiyane, kadrwana ku yugingi ku twalai ki kidremedreme ki umawmase, amani ku yuginsia ku pakanaswala ki kandu ki Siri si ala alra putaluvaivai ku vaga ki Twaumase.