2 Latalialalai 9 - Ngudradreadrekadhane Ka Sisiu 魯凱語聖經

Kiapadelreme pacegecege atalialalai ki swa Iseraylri ku Yehu

¹ Sakamani kwidra, ku yuginsia ka Ilrisa la dawlu ku tangea ku yacengecenge ka yuginsia, cunu iniane, “Kirimwa, la iluku kikai yakindralumane kai lawlau ka ulrive mwa ka Gileade kavai Ramuthe.

² Lu darurungasu kavai, la kipasilapa ki lalake ki Yehusapate, ka agane ki Nimesi ka Yehu. La iluka iniane katwase ki papapalraini, si mwa kwidra ki kadrwa ku umawmase ka tapeapecane,

³ la malra kikai lawlau ka ulrive gugu pwa ki awlruini, si iya kai, ‘Ku Tamatama peaelaela pathingale, padelreme muswane tutalialalai ki swa Iseraylri.’ Ala muleba ku lrawlrawdru, la kisaswarau katwase kwini.”

⁴ Kwini yacengecenge ka yuginsia la mwa kavai Ramuthe.

⁵ Kwini lasu sa kela kwini la drele ikaai ku tapiya ku lakiacapili ki kwapingi yacengecenge madrekadrekadrekase, la iya kai, “Mabelenge, yakai kai akawrivaneli muswane.” Ku Yehu la kivaga, “Lri kawrivasu ki saneaneane?” Kwini lasu la iya kai, “Amanisu.”

⁶ Kwini tadrusa la mwa ki taluvale ki tapeapecane; kwini yacengecenge ka yuginsia la malra kwini lawlau ka ulrive gugu pwa ki awlru ki Yehu, la iya kai iniane, “Ku Tamatama ka Twaumase ki swa Iseraylri amia kai pelaela pathingale, ‘Padelremaku muswane si pacegecege atalialalai ki umawmaseli ka swa Iseraylri.

⁷ Lri papacaisu ki tawkisu, ka amani kwini lalake ki Ahabe, ka talialalai kaiasasane. Lu ngimia kikai, pathavungungaku ku tapasalrivane ki Yezebile ka papacai ki yuginsiali si drumane ka sasiakawlu.

⁸ Ku wacekecekele ki Ahabe si mwabaibalrithi lri makitu pacai makanaelre; lri amudaku sanaka sawvalai ki wacekecekeleini patuelre, adravane ka ngialralraingi ka kai ngialralraingi lri kiamudu makanaelre.

⁹ Ku tapangimianeli ki wacekecekele ki talialalai ki swa Iseraylri ka Yerubuame si talialalai ka Basa lri tungimiyaiyaku ki wacekecekele.

¹⁰ Kadrwa ku wadralreke ki Yezebile; ku kinawmasaneini lri kikane ki latawpungu ki swa Yezerile.’ ” Kwini yacengecenge ka yuginsia sa maka kawriva la katwase kwini ki tapeapecane, katwase mubere.

¹¹ Ku Yehu la siwlri mwa ki papalraini; kwini lalasu la kivaga iniane, “Kadrwa ku tangitumatumanane? Kikavai amamama anitumane amia muswane?” Ku Yehu la tubalre, “Wathingale numi iniane, thingale ka takelaneini.”

¹² Kwini lalasu la iya kai, “Kai nai wathingale, pelaela naiane ku taiyaneini!” Ku Yehu la iya kai, “Kwini lasu peaelaela nakwane, ku Tamatama amia kai pelaela pathingale, ‘Padelremaku muswane cegecege atalialalai ki swa Iseraylri.’ ”

¹³ Kwini lapapalraini ki Yehu la makakaai malra ku sapakabelebelengane lini ku laimai si sapa pikai ki sabebelengenga ki tataetaetale, la pwa paacegecege ki Yehu ibelenge, ala ngirapa, si tawtau, “Atalialalainga ku Yehu!”

Kiapapacai ku talialalai ki swa Iseraylri ka Yurame

^14-15 Ku Yehu la kidremedreme ku wabalre ki talialalai ka Yurame. Kwini kwidra ku talialalai ka Yurame yacengecenge ikai Yezele kisulrasulrau ku dulaini, asi lwiyane sa ikai kavai tamakakaruruburane Ramuthe kiakaruburu ki talialalai ki swa Siria ka Hazaele la kadula. Ku Yehu la kawriva ki la papalraini iya kai, “Lwiyasi ka twapapalra numi nakwane, madha pawbebere ku natangeanga twalai Ramuthe mwa kavai Yezele si pakipapawlringau ki mapapangale ki swa Yezerile.”

¹⁶ Ku Yehu la mubelenge ki palridingini, katwase papia Yezerile. Ku dula ki Yurame kaiyana mwadringai; ku talialalai ki swa Yuda ka Ahazia la mwa kavai lrikape iniane.

¹⁷ Ku tarakadrenge ikai belenge ki palralramathane Yezerile wadrele ki Yehu si lakwapingini kaingananganai, la kawkau, “Wadrelaku ku twaredededele ku laumawmase kaingananganai papiapia kai!” Ku Yurame la iya kai, “Sikawla ku tangea ku tarangurigi mwa drele liniane luka talragi luka badha.”

¹⁸ Kwini tarangurigi la mwa ki Yehu, la iya kai iniane, “Ku talialalai nau thingale luka ngwamathaithariri ku akelane amia muswane.” Ku Yehu la iya kai, “Manemane ku capilanesu? Ngibangula, la tupapalra nakwane.” Kwini tarakadrenge la iya kai, Kudra kiasikawlu ku tarangurigi ka kwapingi wamwanga kavai liniane, ai kai siawlringa.

¹⁹ Ku talialalai la sikaawlunga ku druma ku tarangurigi mwa. Kikai tarangurigi la kathadaalrane ku vaga kivaga ki Yehu. Ku Yehu la mialri tubalre, “Manemane ku capilanesu? Ngibangula, la tupapalra nakwane ilrilrikudru.”

²⁰ Kwini tarakadrenge la pelanga pelaela iya kai, kudra kiasikawlu ku tarangurigi wamwanga kavai, ai kai siawlringa. Kwini lasu la padrimana ku niakuvalane, “Kavai wasangililuku ki twaredededele mia ki maupupupungu pakirarimurimu ki palridingi, ngiamia turamuru ki Yehu.”

²¹ Ku Yurame ka talialalai la drekase iya kai, “Padulrwa ku palridingili!” Sa maka padulrunga, kwini lasu la karedele ki Ahazia ka talialalai tara ngukai ki palridingi mulatadre kidrele ki Yehu. Kwini lalasu yakai ki umawma ki Nabuthe kidrele iniane.

²² Ku Yurame la kivaga iniane, “Mailukusu ku sulivatane?” Ku Yehu la tubalre, “Bekace ikai ku sulivatane? Ikai ki kunita yakaiyana ku tapiane ki tinasu ka Yezebile ku twalrisilrisi si lasamiamiange, lri ikai ku sulivatane?”

²³ Ku Yurame la bangulu ki palridingini, takumubebere si karalealeale, “Ahazia, wabalrenga!”

²⁴ Ku Yehu la bilakace ku bu, pakaelre ku puku, la aru vavaale pakai ki drelreke ki Yurame, lregese ki avavaini; ku Yurame la tubakebake pacai ibelenge ki palridingi.

²⁵ Ku Yehu la iya kai ki taraparalubu iniane ka Bidekare, “Malra kwini kinawmasaneini cilri pwa ki umawma ki Nabuthe! Ngulringava ku natakarededelaneta kabibibilrili ngukai ki palridingi ki tama ki talialalai ka Yurame ka Ahabe; ku Tamatama naamia kai ki Ahabe,

²⁶ ‘Wadrelaku kwiya ku Nabuthe si lalalakeini kiapapacai; lri tara pikaiyaku kai ki thadalrane ka umawma pathavungu muswane!’ Lakamani kwidra, kusu malra kwini kinawmasane ki Yurame cilri pwa ki umawma ki Nabuthe, lani ngimia ku tayugingane ki Tamatama.”

Kiapapacai ku talialalai ki swa Yuda ka Ahazia

²⁷ Ku talialalai ka Ahazia sa drele kwini tangimiamiane la ngupalridingi papia cekele Bithe Hagange mubere. Ku Yehu la kabibilrili saladha; kwini lasu wadrekase ki kiacapilini, “Mialri pwa papacai iniane!” Kwini kiacapili ki Yehu la papacai ki Ahazia pikai sakatwatwase papia ka Gure kwini ki kadadalranane, ka adeethe cekele Ibelame, lraili pakadula iniane. Ai ku Ahazia la pacungulu katwase tuvesevesevese, pakela kavai cekele Migidu ala pacai ikai kwini.

²⁸ Ku mabelengeini la arakai ku palridingi iluku kwini kinawmasaneini mwa Yerusalrime, la dralreke pikai ki cekele ki Davidi ka tadralredralrekane ki latalialalai.

²⁹ Ku Ahazia sa atalialalai ki swa Yuda yai saka tara 11 ka caili ku taatalialaladhane ki lalake ki Ahazia ka Yurame ki swa Iseraylri.

Kiapapacai ku Yezebile ka labaibai ki talialalai

³⁰ Ku Yehu sa kelanga Yezerile. Ku Yezebile sa kilalra kudra la tangimianenga, langigagarucu ngikakimi padedelreme ki maca, la pangukai ki vaeva ki lribange ki daane ki talialalai drele papia kadadalranane cekele.

³¹ Sa twalalai ki taelelebane ki cekele mudadaane ku Yehu, kwini alisu wakaraleale, “Kusu ka Zimeri, ka papacai ki umawmase! Lri dulrusu mailuku ku sulivatane?”

³² Ku Yehu la paswabelenge drele, la iya kai, “Aneane ku lri tupapalra nakwane? Aneane?” La ikai ku tapiya ku kiacapicapili ki daane ki talialalai ku pangwakai ki lribange drele iniane.

³³ Ku Yehu la iya kai, “Malra iniane verevere pulebe!” Kwini lalasu la malra ki Yezebele verevere pulebe; ku eraini la tiputhare mwa ki balingibingi si rigi. Ku Yehu la palradreadre ki palridingi ki kinawmasaneini.

³⁴ La mudaane ki daane ki talialalai, la kane ku aga, ala iya kai ku Yehu, “Malra kwini ki lri kipusu ka ababai dralreke; kwini alisu mialri ka lalake ki talialalai.”

³⁵ Ai, kwini wamwa dralreke iniane kathanenga ku culrale ki awlruini si culrale ki alrima si drapale ku kidringai lini.

³⁶ Kwini lalasu sa pelaela ki Yehu, kwini lasu la iya kai, “Kikai ala amani ku pangukai ki sasiakawluini ka Ilria ki Tamatama kawriva kudra lrika angimiane. Amia kai, ‘Ku tawpungu lri ikai cekele Yezerile kane ku kinawmasane ki Yezebile;

³⁷ ku drumanenga ku kinawmasane lri mia ki yakai umawma ka malisi, kadrwa ku umawmase ku lri maka thingalenga.’ ”