2 Latalialalai 8 - Ngudradreadrekadhane Ka Sisiu 魯凱語聖經

Ku swa Suneme ka ababai siaulri

¹ Ku Ilrisa napeaelaela kwini ki ababai ka swa Suneme (ku lalakeini nakiapalribulru ki Ilrisa si panianiake), ku Tamatama lri pakipadradresenge ku silravane kai ki swa talikaikai tarapitu ka caili, la tara katwasa kai karedele ki wacekecekelesu, mwa talidrumane ikaikai.

² Kwini ababai la kilalra si pasalaladha ku vaga ki Ilrisa, la karedele ki wacekecekeleini mwa kavai Pelisitine, la ikaikai kwini tarapitu ka caili.

³ Samaka pitulunga ka caili, kwini alisu la siwlri mwa Iseraylri; kwini alisu la mwa kidrele ki talialalai, la kitubi ku asawlriane ku daane si kadaenganeini.

⁴ Kwini alisu la drele ki talialalai sa icengecenge papia ki sasiakawlu ki Ilrisa ka Gehazi kivavavaga ku patharukai ku takaungane ki Ilrisa ku pinangu Twaumasane ka puku.

⁵ Ku Gehazi sa pelaelaela ki talialalai pangiatumane ku Ilrisa si pasiwlri papanianiake ku tangea ku wapacainga ku umawmase yai, kwini ababai wamwa cucubungu ki talialalai kitubi pangukai ki daane si kadaenganeini. Ku Gehazi la iya kai ki talialalai, “Talialalai, amani kai kudra ababai; kikai laka lalakeini, ka amani kudra papanianiake ki Ilrisa ka umawmase.”

⁶ Kwini ababai twabalre ku kivavaga ki talialalai, ala ka tengane ku taiyane ki Gehazi. Ku talialalai la dawlu ku tangea ku mabelengeini, cunu iniane malra kwini talikai ki alisu sanaka maneemane la patuelre sawlri baai iniane, paelre kudra kaika taikaiyaneini ki nitarapitwane ka caili kudra lanikitalekane.

Ilrisa si talialalai ki swa Siria ka Bine Hadade

⁷ Ku Ilrisa sa mwa kavai Damasekuse, ku talialalai ki swa Siria ka Bine Hadade la icengecenge kacaeme. Yakai ku umawmase ku peaelaela ki talialalai, ku umawmase ki Twaumase ka Ilrisa yakai Damasekuse iya.

⁸ Ku talialalai la iya kai ki mabelenge ki kiacapilini ka Hazaele, “Lu iluka ku saceacebe mwa kidrele ki umawmase ki Twaumase, la kitubi iniane ani kivaga ki Tamatama, si drele lulri mudringai kai caemaneli lutumane.”

⁹ Ku Hazaele la arakai ku masupatele ku lrakeda, siamece ku twalai Damasekuse ku tathaithaithariringa ku lataleke mwa kidrele ki Ilrisa. Ku Hazaele sa drele ki Ilrisa, la iya kai, “Ku sasiakawlusu ka talialalai ka Bine Hadade siakawlu pakainganai nakwane kela kai kivaga muswane, ku caemaneini lri maka udringai?”

¹⁰ Ku Ilrisa amia kai, “Lu siwlria si pelaela iniane, kwi lasu lri tara mudringai. Ai, ku Tamatama peaelaela nakwane, kwi lasu lri pacai.”

¹¹ La pacungulu ku Ilrisa la leengethe ki Hazaele, pakela ku kaika takirimwaneini kathaithariri. Ala kiriimu, ku Ilrisa alralrese.

¹² Ku Hazaele la kivaga, “Sinsi, asu tubi?” Ku Ilrisa la iya kai, “Asi lwiyane wathingalaku muswane lri piasu ku matiangeange si kabebetethe ki mapapangale ki swa Iseraylri. Lri arakaisu ku apwi lama ki kepale lini, papacai ki layacengecenge lini, cagecage papacai ki lavavalake lini, la buci ki tawbaliri.”

¹³ Ku Hazaele amia kai, “Manemanaku, mararaamauaku ki vaeva ka tawpungu, anaku maka dulru pia ku paramia kwini ku awngane?” Ku Ilrisa la iya kai, “Ku Tamatama peaelaela nakwane, lri atalialalaisu ki swa Siria.”

¹⁴ Ku Hazaele la siwlri mwa kavai ki Bine Hadade, ku Bine Hadade la kivaga iniane, “Tumana amia ku Ilrisa?” Ku Hazaele la iya kai, “Kwini lasu lri tara mudringai amia muswane.”

¹⁵ Sakakaiyane ki mialrealre, ku Hazaele wamalra ku vaeva ku nilebelebanenga ki acilai ku tana la pwa metemete papacai ki talialalai. Ku Hazaele la mubalrithi ki Bine Hadade atalialalai ki swa Siria.

Talialalai ki swa Yuda ka Yehurame

¹⁶ Ku Yurame ka lalake ki talialalai ki swa Iseraylri ka Ahabe, saka taralrima ka caili ku taatalialaladhaneini, ku Yehurame ka lalake ki Yehusapate atalialalai ki swa Yuda.

¹⁷ Sakamani kwidra kwini lasu tara 32 ku cailini. Kwini lasu taravalru ka caili rathudu Yerusalrime.

¹⁸ Kwini lasu wamwa ki lalake ki Ahabe. Lakamani kwini lasu mararaamau ki wacekecekele ki Ahabe, paiya ku pia ki latalialalai ki swa Iseraylri, ku ngialisiane lu drele ku Tamatama.

¹⁹ Ai ku Tamatama kai mwabangalre amudu ki swa Yuda; asi lwiyane napwakawnunga ki sasiakawluini ka Davidi, ku mwabaibalrithi ki Davidi lrika palralrawthu ikai ku atalialalai.

²⁰ Saka talialalai ku Yehurame, ku swa Idume wabalre ki swa Yuda, avaevanga ka kuni.

²¹ Ku Yehurame la sangiluku nguelre ki sakikaruburuburane ka palridingi mwa kavai Zaire, ku swa Idume la ikai kwini lringulu liniane. Sakamaungu, ku Yehurame si tarasangililuku ki lapalridingi la mwa ciwru lribate si mubere; kwini lakwapingini la mialri mawvagavagai katwase mutavanane.

²² Twalainga kwini ku swa Idume acegecege ka vaeva ka kuni, katwasenga ki swa Yuda. Ku masiasilange swa Libena mialri balre liniane.

²³ Ku takaungane ki Yehurame ninguvavaevane pacase ikai ki lrikisi ki Latalialalai ki swa Yuda ka hungu.

²⁴ Kwini lasu sa pacainga la kidralreke ikai ki tadralredralrekane ki latalialalai ka cekele ki Davidi; ku lalakeini ka Ahazia la mucungulu iniane atalialalai.

Talialalai ki swa Yuda ka Ahazia

²⁵ Ku Yurame ka lalake ki talialalai ki swa Iseraylri ka Ahabe saka tara 12 ka caili ku taatalialaladhaneini, ku Yehurame ka lalake ki Ahazia atalialalai ki swa Yuda.

²⁶ Ku Ahazia satara 22 ku cailini atalialalai, yakai Yerusalrime rathudu taracaili. Ku tinaini sia Atalia, lalake ki talialalai ka Ahabe, agane ki talialalai ki swa Iseraylri ka Umeri.

²⁷ Ku Ahazia ngwalai ki tamathaetharevane, la maretetesenga ki talialalai ka Ahabe; kwini lasu mararaamau ki wacekecekele ki Ahabe pia ku ngialisiane lu drele ku Tamatama.

²⁸ Ku talialalai ka Ahazia la maelre ki talialalai ki swa Iseraylri ka Yurame, la mwa kikaruburu ki talialalai ki swa Siria ka Hazaele. Kwini taidrusa ka kwapingi la ikai Gileade ka Ramuthe makakaruburu. La kadula ku Yurame,

²⁹ la siwlri mwa Yezerile kisulrau; ku Ahazia la mwa kavai lrikape iniane.