2 Latalialalai 7 - Ngudradreadrekadhane Ka Sisiu 魯凱語聖經

¹ Ku Ilrisa amia kai, “Kilalra ku taiyane ki Tamatama patuelre, lwiya lumiamia kai, lu arakai numi ku vaeva ka gingi adulrwane ikai Samaria langai ku tulru ka kukingi ku mathaithariri ku tatititiki ka mugi, ku eneme ka kukingi ku tadradrau ka mugi.”

² Ku taratupapalra ki talialalai amia kai ki Ilrisa, “Kai lri maka ngimia kwini lutuumane. Adravane ku Tamatama muelebe ku athau subelebelenge si pulebe ku lataleke kai lri maka ngimia!” Ku Ilrisa la iya kai, “Lri tara drelesu lu ngimia kikai awngane, ai kaisu lri kane ku natikianenga.”

Matwase ku kwapingi ki swa Siria

³ Ikai latadre ki cekele Samaria, yakai ku tasupate ku maraibiu kipakilringau; kwini lalasu la makawrivariva iya kai, “Atangithanga ikai kai ukalavalava ki apacadhane?

⁴ Lu mucekeleta kadrwa ku paluludane, kulri tara pacaita kiara silravane ikai kavai; lu ikaita kai lai lri mialrita pacai. Maesaesai lu mwata si amalebe ki swa Siria. Alau lri papacai mitane, ai alau lri kirimwaini papanianiake mitane.”

⁵ Sa lri kadradrimitinga kwini lalasu la katwase mwa ki takwapingane ki swa Siria, sa darurunga kavai la kai drele ku natangeanga ku umawmase.

⁶ Ala ku Tamatama pakialalra ki swa Siria ku tadadavacane bengebengethe ki tapaangale ku kwapingi rigi si palridingi, talika pawalrawlrau ku talialalai ki swa Iseraylri ki latalialalai ki swa Hite si latalialalai ki swa Izipiti si lakwapingi kela kikaruburu liniane la iya.

⁷ Lakamani kwidra, kwini sakamaungu, ku swa Siria la makitu mawbebere, cilringa ku labalrawbau lini, larigi, ruba; kasakamiana ku takwapingane asuru ikai kwini.

⁸ Kudra tasupate ka maraibiu la kela ki takwapingane, si mudaane ki balrawbau, ikai kwini kanekane ungungulu; kwini lalasu la drele ku kingi, gingi, si laimai la malra sekete, ala katwase kwini ki balrawbau, la mudaane ki drumane ki balrawbau, la pianga ku tapangimiane lini.

⁹ Sakabilrilinga, kwini lalasu la maiyaiya kai, “Nai kaita maka pia kai, yakai kai mathariri kai apelaelaneta, malisi kai pelaela ki umawmase. Lwiyasi la mukalavata pakela lwiya ala pelaela, lri tara kipathavunguta. Kikai asasane ila tamwa pelaela ki kiacapicapili!”

¹⁰ Kwini lalasu la katwase ki takwapingane ki swa Siria, siwlri mwa Samaria, la papia kwini ki wadrangalrungalru ki lrawlrawdru ki cekele ka kwapingi akwadrau iya kai, “Wamwanga nai ki takwapingane ki swa Siria, la kakadrwa ku umawmase ku drele nai, la kai nai kilalra ku lingau ki umawmase. Ku rigi si ruba nipakerenganeana ikai kavai, ku balrawbau laka mialri ka sakamiana asuru ikai kavai.”

¹¹ Kwini taradrangalrungalru la pelaela kikai vaga, si malra kikai vaga pakela ki daane ki talialalai.

¹² Kikwini laka maunguana, ai ku talialalai ngiadrakale si iya kai ki lakiacapilini, “Nau pelaela numiane kwini salrilrigilane ki swa Siria. Kwini lalasu wathingale ka masilrasilrau kai talikaita, lakamani kwini ranau katwase ki takwapingane, si lepelepenge ikai ubulane. Kwini lalasu lu kidremedreme lri mulatadre ki cekele muriakaneane amia mitane, lu mia kwini lri malra pwalra mitane, la ravase kai ki cekele.”

¹³ Ku tangea ku kiacapili ki talialalai la iya kai, “Kikai lri tara kamudu kai umawmase kai ki cekele, mararaamau kwidra ki lawapacainga ka umawmase, kudra lri tara paacai. Lakamani kwidra, matumane sikawlu ku tapiya ku umawmase, ngukai kai ki kathanenga ku yakaiyana ka lrima ka rigi, mwa drele luka ngitwatumane ku tangimiamiane.”

¹⁴ Kwini lalasu la pilri ku tapiapia ku umawmase. Ku talialalai la sikawlu kai ki laumawmase ngukai ki drusa ka palridingi ka rigi, pelaela liniane mwa lrilriu ku tangimiamiane ki kwapingi ki swa Siria iya.

¹⁵ Kikai laumawmase la katwase daruru kadravane Yuredange, la drele tarakadalranane ngisarade ku nicilriane ku lalaimai si lalawbubulu sa ubebere ku swa Siria, la katwase siwlri mwa pelaela ki talialalai.

¹⁶ Kwini laumawmase ki swa Samaria la maswaraarau mulatadre ki cekele, ravase kwini takwapingane ki swa Siria. Kikwini yai, mararaamau kudra taiyane ki Tamatama: Ku tulru ka kukingi ku mathaithariringa ka mugi si eneme ka kukingi ku tadradradrau ku mugi kiatu vaeva ka gingi lu kilangadhane.

¹⁷ Ku talialalai ki swa Iseraylri la sikawlu ki tara palakebe iniane mwa ki taelelebane ki cekele kicapili, ai kiadrailrisilringa ki laumawmase ikai kwini, mararaamau ku takawrivane yugingi ki Ilrisa sa mwa kidrele ki talialalai.

¹⁸ Ku Ilrisa nakawariva ki talialalai, lwiya lumiamia kikai, ikai Samaria, ku vaeva ka gingi lri dulru langai ku tulru ka kukingi ku mathaithariringa ku tatititiki ka mugi ku eneme kukingi ku tadradradrau ku mugi.

¹⁹ Ku tarapalakebe ki talialalai amia kai, “Kai lri maka ngimia kwini lutuumane, adravane ku Tamatama lu muelebe ku athau subelebelenge si pulebe ku lataleke kai lri maka ngimia!” Ku Ilrisa la tubalre iniane iya kai, “Lri tara drelesu lu ngimia kikai, ai kaisu lri kane ku natikianenga.”

²⁰ Kikai vaga ala ka tengane ngimia. Kwini lasu wapacai, kiadredre si pacai ki yakai ki lrawlrawdru ki cekele masasawlriwlri ka laumawmase.