2 Latalialalai 5 - Ngudradreadrekadhane Ka Sisiu 魯凱語聖經

Kiapawdringai ku Naimange

¹ Ku abebeelengenga ki kwapingi ki swa Siria ka Naimange kiapakaunai ki talialalai, asi lwiyane ku Tamatama napangwakai iniane si akaci ku swa Siria. Kwini lasu amani kudra magarange kikaruburu ka kwapingi, ai maulrase la kipucaemane karaibiu.

² Yakai saka kiningivalane, ku swa Siria sa mwa kibubuli kikaruburu ki swa Iseraylri, la malra ravase ku tangea ku vavalake ka ababai ka swa Iseraylri; sakabilrilinga kwini vavalake ka ababai ala asasiakawlu ki taelrelre ki Naimange.

³ Yakai saka minakavalane, kwini alisu la kawriva ki tawkini ka ababai, iya kai, “Anatumane ka tawkili la dulru mwa kidrele kwini ki yuginsia ka yakaikai kavai Samaria! Kwini lasu lri tara pawdringai ki raibiuini.”

⁴ Ku Naimange la thingale, la mwa kikawriva ki talialalai, malra kwini vaga ki vavalake ka ababai pelaela ki talialalai.

⁵ Ku talialalai ki swa Arame amia kai, “Lu mwa kidrele ki talialalai ki swa Iseraylri, la malra kikai tigami si baai iniane.” Ku Naimange la katwasenga, mailuku ku 30,000 ku gingi, 6,000 ku kingi, si taimangealane ka tathaaithariri ka lalaimai.

⁶ Kwini ililukuini ku tigami amia kai, “Kikai tigami sasiwkadhane ki mabelenge ki kiacapilili ka Naimange. Ani sulrau pawdringai ki raibiuini amiaku.”

⁷ Ku talialalai ki swa Iseraylri sa silrigu kikai tigami, la mukuludru amaama si papurici ku laimai, si akwadrau iya kai, “Ku talialalai ki swa Siria tumane sidrama murikai ku wasulravaku pawdringai kai ki umawmase? Kwini lasu Twaumase ka taramarasikai ki niake amia nakwane? Kikai pathingalane ka wasiasiasilape ku apakiarubwanane nakwane!”

⁸ Ku umawmase ki Twaumase ka Ilrisa sa kilalra ku talialalai ki swa Iseraylri ku tathuriacane ku laimai, la sikawlu ki umawmase iya kai ki talialalai, “Asu ngitha mia kikai kipakwalri? Ala pakainganadha kwini ki umawmase mwakai nakwane kai, lri pathingalaku iniane ikai ki swa Iseraylri ala ka yakai ku tangea ku yuginsia!”

⁹ Ku Naimange la iluku ku rigi si sakikaruburuburane ka palridingi kela ki lrawlrawdru ki daane ki Ilrisa.

¹⁰ Ku Ilrisa la sikawlu ku tangea ku sasiakawlu mwa pelaela ki Naimange, si pamwa iniane kavai kadravane Yuredange sikelre kingipitulu, lumia kwini, ku lrangicini lri mudringai, si kabulanga.

¹¹ Ku Naimange la kalisi si katwase. Kwini lasu amia kai, “Alau lri kirimu mulatadre kidrele nakwane amiaku, si papia ki Tamatama ka Twaumaseini inulri, la pikai ki takipucaemananeli vidrividri ku alrimaini, si pawdringai ki raibiwli.

¹² Si adravane, kavai kadravane Abana si kadravane Parepare ikai Damasekuse kaika mathaithaririana ki sanaka kadravane ki swa Iseraylri? Kainaku lri maka ikai kwini sikelre la kabula?” Kwini lasu la kagiriimucu katwase.

¹³ Ku sasiakawlu ki Naimange la arwacucubungu iya kai iniane, “Tawki, luiyasi ku yuginsia la ani pia kudra makucingalre ku awngane iya muswane, lri tara pangimiasu pia ku taiyaneini; asu kai singikai ku vagaini katwase sikelre si kabula?”

¹⁴ Ku Naimange la katwase mwa kavai kadravane Yuredange, singikai ku pia kwini taiyane ki Ilrisa ikai kadravane sikelre ngusipitulu, kwini lasu la siwlriane udringai. Ku kinawmasaneini la udringai si kabulanga, mianga ki vavalake.

¹⁵ Kwini lasu la ililuku kwini ki twapapalra iniane makanaelre siwlri mwa ki Ilrisa, la iya kai, “Kikai wathingalaku, kathane ku Twaumase ki swa Iseraylri, kadrwa ku drumane ku Twaumase. Ala tarumara kai acebeli.”

¹⁶ Ku Ilrisa amia kai, “Lri papiaku ki sukusukubuli ka palralrawthu panianiake ka Tamatama kiketekete, kadrwa ku namanemanenga ku atarumaraneli.” Ku Naimange la kakeecenge tara malra iya iniane, kwini lasu la kai mubangalre.

¹⁷ Ku Naimange la iya kai, “Luiyasi kaisu tarumara kai acebeli, lumia kwini, ala nau suragele ku dae ku adulrwane siamece ki drusa ka ngiririgi iluku mubalriu; asi lwiyane twalainga kai, kathanenga ku Tamatama, kainaku lri papianga ki sanaka twaumase patarumara ku Lama ka lrisi si sapatarumarane ka waudriwdripi.

¹⁸ Luiyasi la tupalraku ki tamatamali mwa ki Rimungu ka biu ki twaumase ki swa Siria sukubu, ku Tamatama ani pacepe nakwane. Masalrwaku ku Tamatama lri tara pacepe nakwane!”

¹⁹ Ku Ilrisa amia kai, “Lu kasulivalivaata katwase!” Ku Naimange la katwase. La kaina ukuthainwane ku takatwasane ki Naimange,

²⁰ Ku sasiakawlu ki Ilrisa ka Gehazi la kidredreme, “Kai tawkili kai tarwamara ku namanemanenga ku acebe ki Naimange la pakatwasenga iniane! Nai pacengecenge ana tarumara ka acebe ki swa Siria. Lri papiaku ki palralrawthu panianiake ka Tamatama kiketekete, lri mwaku saladha iniane, si ta iya ku bebekelane.”

²¹ Lakamani kwidra, kwini lasu la mwa saladha ki Naimange. Ku Naimange la drele ikai ku umawmase ku mabibilrili saladha, la mulebe ki palridingi ki rigi si kidrele iniane, la iya kai, “Matumane?”

²² Ku Gihazi la iya kai, “Kadrwa, ai ku tawkili siakawlu nakwane kela pelaela muswane, wakelakela kaiasasane ku tadrusa ku yuginsia ka twalai Iparaime lregelrege, kwini lasu la murikai ku wabaaisu liniane ku 3,000 ku gingi si taidrusane ku mathariri ku laimai.”

²³ Ku Naimange la iya kai, “Ala malra kai 6,000 kai gingi.” Kwini lasu la kakecenge, ala malra kwini gingi si tenge pwa ki drusa ka lumase, paelre kudra taidrusane ka mathariri ka laimai, si baai ki sasiakawluini, la pabulri liniane kaswalalala ki Gihazi.

²⁴ Sa kela kwini lalasu kwini ki lrelrege ka taikaikaiyane ki Ilrisa, ku Gihazi la malra kwini akudrusa ki lumase ku lawbubulu salri pudaane, ala pakatwase ki sasiakawlu ki Naimange.

²⁵ Ku Gehazi la mudaane, ku Ilrisa la kivaga iniane, “Gehazi, mwainusu?” Kwini lasu la tubalre, “Kainaku mwainu.”

²⁶ Ai ku Ilrisa amia kai, “Kudra umawmase sa mulebe ki palridingi kidrele muswane yai, kai kidremedremeli kaika yakai kwini? Kikai kwidra kaika atarumarane madu ku gingi, laimai, maulriwlrivane, babudwane, lakiu, lalwange, si sasiakawlu kavai!

²⁷ Kaiasasane, ku raibiu ki Naimange lri cebe ikai ki kinawmasanesu; kusu si mwabaibalrithi muswane lri kapalralrawthu kipucaemane kikai caemane.” Sa katwasenga ku Gihazi, la kacaeme ku raibiu, ku lrangici mia ki pasabu ku lrapungane.