2 Latalialalai 4 - Ngudradreadrekadhane Ka Sisiu 魯凱語聖經

Ku Ilrisa paralubu ki matiakukuru ka walibakane

¹ Yakai ku tangea ku walibakane, ku taelrelreini mialri ka tangea ka yuginsia; kwini alisu la mwa kidrele ki Ilrisa, la iya kai, “Sinsi, wapacainga ku taelrelreli. Wathingalesu iniane ka mwasakene ukuludru ki Tamatama. Kikai la kela ku tangea ku pikiamane, tamalra iyaiya ki tadrusa ka lalakeli iluku si tuduri, tusasawlriane ku kiame ki nataelrelreli.”

² Ku Ilrisa la kivaga, “Manemane ku adulrwaneli pasikai muswane? Ala pelaelaili, manemane ku yakai numianane?” Kwini walibakane la iya kai, “Kathane ku akuvaeva ki tikiane ki kindralumu ku lawlau ka ulrive, kadrwanga ku namanemanenga.”

³ Ku Ilrisa la pelaela iniane, “Lu mwa ki pasiagiagisisu la kisalru ku la takaiyane, luka makakalra mathaithariri.

⁴ Kusu si kwini tadrusa ka lalakesu la mudaana, la elebe ku lrawlrawdru, la malra kwini lawlau gugu pwa ki takaiyane, lu suetenga la pwa thili.”

⁵ Kwini walibakane si tadrusa ka lalake la mudaane, si elebe ku lrawlrawdru, la malra kwini yakai ki tikiane ka kindralumu ka lawlau ka ulrive gugu pwa kwini ki kisalru ki lalakeini ka takaiyane.

⁶ Kwini lalasu samaka gugunga pasaela patuelre ki latakaiyane, kwini walibakane la kivaga yakaiyana ku takaiyane iya, kwini tangea ka lalake la tubalre, “Kadrwanga.” Ku lawlau ka ulrive la kai mwaludrunga.

⁷ Kwini walibakane la siwlri mwa ki umawmase ki Twaumase ka Ilrisa, ku Ilrisa la iya kai iniane, “Malra kilangai kwini lawlau ka ulrive, la sawlri kwini kiamesu. Ku tedranenga ku paisu lri makakeelretenga ka sacekecekelane numi ka lamatiatina.”

Ilrisa si sapaiswane ka ababai ka swa Suneme

⁸ Yakai saka minakavalane, ku Ilrisa la mwa kavai Suneme. La ikai ku tangea ku ababai ka sapaiswane, kwini alisu la dawlu ki Ilrisa si pakane ku aga. Twalai kwini, ku Ilrisa sana mwa Suneme tara wamwa ki alisu kane ku aga.

⁹ Kwini alisu la iya kai ki taelrelreini, “Lu drelaku kavai tarakelakela mitane kavai umawmase tangea ka umawmase ki Twaumase.

¹⁰ Ala tapikai cavalri tudaane ku swatiiki, la pikai daane ku tapeapecane, cukwi, taetale si tatinakiane. Kwini lasu lu kela mitanane lani ikai kwini.”

¹¹ Yakai saka minakavalane, ku Ilrisa la kela Suneme, la mwa kwini ki tapeapecaneini isadra.

¹² Kwini lasu la padawlu ki sasiakawluini ka Gehazi dawlu kwini ki ababai. La kela kwini ababai,

¹³ Ku Ilrisa amia kai ki Gehazi, “Kivaga ki alisu, manemane ku adulrwaneli pasikai iniane. Ka alisu ngwalai ku amarasikaiyane mitane laka takidredredremane, nau pangibilri iniane. Alau ani mwa ki talialalai ku wamwa ki tamatama ki kwapingi pasikai iniane kawriva ku mathariri ka vaga.” Kwini ababai la iya kai, “Yakaikaiyaku ki sakacekeleli, kadrwa ku akawramane.”

¹⁴ Ku Ilrisa la kivaga ki Gehazi, “Lumia kwini, laka manemane ku adulrwaneli pasikai iniane?” Ku Gehazi la iya kai, “Ka alisu kadrwa ku lalakeini, la pasuludrunga ka taelrelreini.”

¹⁵ Ku Ilrisa amia kai, “Dawla iniane!” Kwini ababai la kela, acegecege ikai ki lrawlrawdru.

¹⁶ Ku Ilrisa amia kai iniane, “Luicaili luka kalamiane kai, lri ibibingasu ku vaeva ku sawvalai ka lalake.” Kwini ababai la kawriva iya kai, “Sinsi, madha lrulrucuku nakwane. Kusu yai umawmasesu ki Twaumase.”

¹⁷ Ai, mararaamau ku taiyane ki Ilrisa, sa ubalrithinga ku caili, kwini ababai la tulalake ku vaeva ku sawvalai.

¹⁸ Sa ngilribatenga ku nitarapiane ku caili, sakavaivai ki mialrealre sa kitaletaleke, kikai vavalake matwase silape ki tamaini, kwini tamaini la icengecenge taelre ki kiataletaleke ikai angangade.

¹⁹ Kwini lalake la pangitutuluku akwadrau kawriva ki tamaini iya kai, “Wangeange kai awlruli, wangeange kai awlruli!” Ku tamaini la iya kai ki tangea ka sasiakawlu, “Malra ibibi ki lalake mwa kavai ki tinaini!”

²⁰ Kwini sasiakawlu la malra ki lalake iluku mwa ki tinaini. Ku tinaini la malra ki lalake ibibi pikai ki vagisini pakela ki mwalringedele, kwini vavalake la pacai.

²¹ Kwini alisu la kebere ki lalake mwa ki tapeapecane ki umawmase ki Twaumase ka Ilrisa, si sarare pikai ki tapeapecane, elebe ku lrawlrawdru, la katwase.

²² Kwini ababai la dawlu ki taelrelreini, la iya kai iniane, “Lu sikawla ku tangea mwa iluku ku vaeva ku ruba kela kikai; lri mwaku ki umawmase ki Twaumase ka Ilrisa. Lri kiraririmwaku si kainganai siwlri.”

²³ Ku taelrelreini la iya kai, “Lri tara mwasu kaikameane? Kaikameane kaika Taisadrasadrane ka vai, la kaika aswalalanga ka vai ki mwabalrithi ka dramare!” Kwini ababai la iya kai, “Kai lri katumane.”

²⁴ Kwini alisu ala papadulru ki umawmase ku ruba, si cunu ki sasiakawlu iya kai, “Pakisamula ki ruba, luka mariaridare mathaithariri, lu isadra lu kainaku iya muswane, kusu madha ngiabalabalai.”

²⁵ Kwini ababai la katwase papia kavai lregelrege Karemele. Ku umawmase ki Twaumase ka Ilrisa la iyadaaili drele kwini ki ababai kaingananganai, la kawriva ki sasiakawluini ka Gehazi, “Drela, kaingananganai ka alisu ka swa Suneme!

²⁶ Lu kirimwa mwa iniane kavai, la kivavaga iniane mwadringadringaisu iya? Ku taelrelreini ku lalakeini mwadringadringai makanaelre iya?” Kwini ababai la pelaela ki Gehazi mwadringadringai makanaelre iya.

²⁷ Ai kwini alisu samwa lregelrege, katwase deethe ki umawmase ki Twaumase ka Ilrisa la mucucubungu la guruthungane icucubungu ki Ilrisa, la kebere ki drapaleini. Ku Gehazi la pasana lrudrulu pakatwase kwini ki ababai, ai ku Ilrisa amia kai, “Singikaiya iniane! Kaisu wadrele ku sakwalrialrini. Ku Tamatama kai peaelaela nakwane luka watumane.”

²⁸ Kwini ababai la iya kai iniane, “Sinsi, kiatubinga naku muswane ku lalake ka sawvalai? Kainaku ka amianga muswane, madha pasidramadrama nakwane iya?”

²⁹ Ku Ilrisa la ngibangulu kawriva ki Gehazi, “Kirarimwa! Malra kwini ukudruli si katwase! Lu kipadradresengesu ku umawmase ikadadalranane, madha kilrikilriu pasudalru iniane. Luiyasi ikai ku paswadalru kawriva muswane, madha tubalrebalre. Lu darurungasu, la malra kwini ukudruli pubelenge ki lringau ki lalake.”

³⁰ Kwini ababai la iya kai ki Ilrisa, “Lri papiaku ki palralrawthu panianiake ka Tamatama si kusu kiketekete, kainaku lri kidaili muswane lutumane!” Kwini tadrusa la mukadalranane katwase tarudradrusa.

³¹ Ku Gehazi la aswalaala, la malra ku ukudru ki Ilrisa pubelenge ki lringau ki lalake, ai kadrwa ku tangivelevelane ku natikianenga. Lakamani kwini lasu matwase siwlri mwa kidrele ki Ilrisa, si iya kai, “Kwini lalake kai alrigilrigi.”

³² Sa kela ku Ilrisa, tarwangeangea mudaane ki tapeapecane, la drele ka wapacainga kwini lalake, tharutakanga ikai tapeapecane.

³³ Kwini lasu la elebe ku lrawlrawdru, kathaneini si lalake ka yakai daane; kwini lasu la papia ki Tamatama inulri.

³⁴ Ala mwa belenge ki kinawmasane ki lalake gurapangane, pacacengecenge ku ngudui si maca, ku alrima ki alrima; asi lwiyane kwini lasu gwarapangane ikai belenge ki kinawmasane ki lalake, kwini kinawmasane ki lalake la pathagili kaculu.

³⁵ Ku Ilrisa la acegecege, ikai daane masasawlriwlriwlri, ala mwanga kwini ki lalake, si gurapangane mwa ki kinawmasane ki lalake. Kwini lalake la edeede akupitulu basenge, la manumaca.

³⁶ Ku Ilrisa la dawlu ki Gehazi iya kai, “Lu dawla ki ababai ka swa Suneme!” Kwini ababai la kela, ku Ilrisa la iya kai iniane, “Malra ibibi ki lalakesu.”

³⁷ Kwini ababai la pidruru ikai cucubungu ki drapale ki Ilrisa, pakeela daedae ku lringawini, ala malra ibibi ki lalake si katwase.

Drusa ka pinangu Twaumasane ka puku

³⁸ Yakai saka nikingivalane, twakalasilrasilravane palraelre ki kuni, ku Ilrisa la siwlri mwa Gilegale. Sa icengecenge bulrubulru ki tapaangale ka yuginsia, kwini lasu la cunu ki sasiakawlu malra ku maadrau ku palungu pubelenge ki apwi, la tusawngulane si baai paungulu liniane.

³⁹ Yakai ku umawmase ku wamwa ki angangade kilacenge, la drele ikai ku wadawdau ku pwamadrumadru, la malra ngukaalra kwini madru iluku mubalriu. Kwini lasu la lralrathipi si pwa ki palungu aga, kai wathingale ka manemane kwini madru.

⁴⁰ Sakadunga kwini sawngulane, la malra vau si kane makanaelre. Ai kwini lalasu sa pungudwi kwini sawngulane la karaleale, si iya kai ki Ilrisa, “Kwini yai yakai ku padavake!” La kai apikanenga makanaelre.

⁴¹ Ku Ilrisa ta la iya ku bekelane ku milrikinku, si cilri pwa ki palungu, la iya kai, “Gugwa la pakane ki mapapangale!” Ku yapalungu ku sawngulane la kakadruanga ku padavake.

⁴² Ku kiningivalanenga, yakai ku tangea ku umawmase twalai Baale Salrisa kela, la iluku ku mapusale ku pange baai ki Ilrisa, niarakaiyane ku kameanane ka aswalalanga kitaleke ka madradrau ka mugi. Kwini lasu la mialri iluku ku la nitawmalramalrane ka mugi. Ku Ilrisa la cunu ki sasiakawlu malra kwini lataleke padrudrulru ki layuginsia pakane.

⁴³ Ai ku sasiakawlu kiavaga, “Kikai lri pawkelrete pakane ki taidai ku umawmase?” Ku Ilrisa la tubalre, “Palrainga baadha pakane liniane, asi lwiyane ku Tamatama amia kai, kwini lalasu lri kabucuku si lai lri ikaaiyana ku tedrane.”

⁴⁴ Ku sasiakawlu la malra kwini akaneane apavalavala liniane pakane. Mararaamau ku taiyane ki Tamatama, mabucukunga makanaelre, la ikaaiyana ku tedrane.