2 Latalialalai 3 - Ngudradreadrekadhane Ka Sisiu 魯凱語聖經

Makakaruburu ku swa Iseraylri ki swa Nuabe

¹ Saka tara 18 ka caili ku takatalialaladhane ki swa Yuda ki Yehusapate. Ku lalake ki Ahabe ka Yurame atalialalai ki swa Iseraylri. Kwini lasu yakai Samaria rathudu tara 12 ka caili.

² Kwini lasu pasalriu, pasalriu ki Tamatama, ai kaika ngiamia ki tamaini si tinaini ka Yezebile ku ngangane. Kwini lasu mwalra kudra cegecege ki tamaini pasikai ki asukubane ki Baale ka angatu ka ulrudru.

³ Ai, kwini lasu mararaamau ki lalake ki Nibate ka talialalai ka Yerubuame, kai lasu wamalra ki swa Iseraylri pawthene pikai ki apasalrivane, kadrwana ku taidrengerane.

⁴ Ku talialalai ki swa Muabe ka Misa walapulapu ku makaalra ku lakiu; kwini lasu lukacaili wasatedre baai ki talialalai ki swa Iseraylri ku 100,000 ku tatitiki ka lakiu si 100,000 ku ubale ki balase ka nikiubawbalane ka kiu.

⁵ Sa pacainga ku talialalai ki swa Iseraylri ka Ahabe, ku Misa wabalre ki swa Iseraylri.

⁶ Ku talialalai ka Yurame la makakai katwase Samaria, si sarubu sanaka kwapingini,

⁷ la sikawlu ku umawmase mwa ki talialalai ka Yehusapate ka swa Yuda kawriva, “Ku talialalai ki swa Muabe wabalrenga nakwane; palraingisu tupalra nakwane mwa kikaruburu iniane?” Ku talialalai ka Yehusapate la patubalre iya kai, “Palraingaku sana mwasu, lri mwaku. Kai lakwapingili si sakikaruburuburane ka larigi lri dulru makakaai kiarakai.

⁸ Lri ngukakaita kisaininu ka kadalranane mwa kikaruburu?” Ku talialalai ka Yurame la iya kai, “Lri ngukakaita ki adaidaili ka kadalranane, ngukakai calragulragu Idume mwa kikaruburu.”

⁹ Ku talialalai ka Yurame si talialalai ki swa Yuda si talialalai ki swa Idume la karededele mwa katwase. Kwini lalasu la dadavace makapitulu, ku acilai la sakaelemenga, ku lakwapingi si lanilapulapwane la kakadrwanga ku acilai ku aungulane.

¹⁰ Ku talialalai ka Yurame la tawtau iya kai, “Kadrwangata, ku Tamatama wamalra mitane ka tatulru si baai pwa ki alrima ki talialalai ki swa Muabe!”

¹¹ Ku talialalai ka Yehusapate la kivaga, “Yakai kikai ku yuginsia ku lri dulru ngitalikaiyane mitane kivaga ki Tamatama?” Ku tangea ka sasiakawlu ki talialalai ka Yurame la tubalre, “Kawvai lalake ki Sapate ka Ilrisa, kai lasu naamani ku taraparalubu ki Ilria.”

¹² Ku talialalai ka Yehusapate la iya kai, “Ka lasu lri tara ka yakaai ku vaga ki Tamatama!” Kwini tatulru ka talialalai la karedele mwa kidrele ki Ilrisa.

¹³ Ku Ilrisa la iya kai ki talialalai ki swa Iseraylri, “Lri tumanaku paralubu muswane? Lu mwa kivaga ki layuginsia ki tamasu si tinasu!” Ku talialalai ka Yurame la iya kai, “Madha iyaiya kwini kawriva, amani ku Tamatama ka wamalra naiane ka tatulru ka talialalai pwa ki alrima ki talialalai ki swa Muabe.”

¹⁴ Ku Ilrisa la iya kai, “Lri papiaku ki sukusukubuli ka palralrawthu panianiake ka Tamatama ka abebeelengenga ki sanaka kwapingi kiketekete, ana kainaku ka mwasakene ki talragisu ka talialalai ki swa Yuda ka Yehusapate, nai kainaku kithathengete muswane, kai tubalre muswane.

¹⁵ Kaiasasane lu pasikaiyaili silape ku tangea ku tarapatungutungu.” Ku tarapatungutungu sa patungutungutungu, ku puku ki Tamatama la mulebe makakai ki Ilrisa.

¹⁶ Ku Ilrisa amia kai, “Amia kai ku Tamatama, ‘Kunumi ikaiya kai ki valrwalru si lruku ku lasiru iya.

¹⁷ Adravane kai numi maka drele ku udale, lakai maka drele ku valrigi, ai kai valrwalru lri sueteane ku acilai. Kunumi si lalwange numi kiu numi lanilapulapwane lri tara ikai ku amakakelretane numi ungulu ku acilai.’ ”

¹⁸ Ku Ilrisa la pacungulu iya kai, “Kikai yai ikai ki Tamatama tikiane ka awngane; lri mialrini paakaci numiane ki swa Muabe.

¹⁹ Lri mwa numi kikaruburu si malra demedeme kwini ki makecenge ka kepale si latathaithariri ka cekele, thiabe pulebe sanaka ivai lini, elenge sanaka taaciladhane lini, si arakai ku lalrenege kabebetethe demedeme kudra malrange ka laumawma.”

²⁰ Sakakaiyane ki mialrealre, ikai kwini ki tatulrisilrisiane ki mialrealre, ala ngimia ikai ku acilai ku twalai Idume mwalwaludru, salraelrenga ku acilai ki kadaengane.

²¹ Ku swa Muabe sa kilalra ku taitulru ka talialalai maelrelre kela kikaruburu liniane, la sarubu kwidra sanaka wadulru malra ku sakikaruburuburane, twalai ki tarudrawdrange pakela ki langukathathabarane, makitu ukalava kadrenge ikai ki pagiagisane.

²² Sakakaiyane ki mialrealre, sa ngidrakale kwini lalasu, ku vai la lrau makakai ki aciacilai, kwini acilai la mia ki erai lu drelane.

²³ Kwini lalasu la kawkau, “Kavai erai! Lri tara ka amani kavai taitulru ka badha ka kwapingi ka mapapacapacai! Ilata mwa ravase kavai lalawbubulu lini!”

²⁴ Kwini swa Muabe sa daruru ki takwapingane, ku swa Iseraylri la kikaruburu liniane, si pasiwlri liniane. Ku swa Iseraylri la kai isadra katwase saladha ki swa Muabe,

²⁵ si kabebetethe ki cekele lini. Sana ngukakai ki mathariri ka umawma ku swa Iseraylri, la pwa abate ku lalrenege, pakela ku tasuteane ki umawma ku lrenege. Kwini lalasu la mialri elenge ki tacebeane ki acilai, thiabe pulebe ku ivai. Ku bibilrilinga, la kakathanenga kwini tangadrane ka cekele ki swa Kire Hirise, kwini tara vidrividri ku lrenege ka kwapingi la pathagili lringulu kwini ki cekele.

²⁶ Ku talialalai ki swa Muabe sa drele ka kailri maka tumanenga, la mailuku ku ta 700 ku silrawlrabu ka kwapingi, kisanu mwa ciwru lribate kwini ki walringulu, mubere mwa ki talialalai ki swa Siria, ai kai maka watumane.

²⁷ Kwini lasu la malra kwini ki naika lri mucungulu atalialalai ka takatakanga tusapatarumarane tulrisi, la ikai ki belenge ki alradre ki cekele patarumara ki twaumase ki swa Muabe. Ku swa Iseraylri la mukuludru turamuru, la katwase twalai kwini ki cekele, siwlri mwa ki kuni lini.