2 Latalialalai 2 - Ngudradreadrekadhane Ka Sisiu 魯凱語聖經

Takimalrane ki Ilria pubelenge

¹ Wadarurunga ku akelane ki Tamatama malramalra ki Ilria arakai ku alrilrawgu. Ku Ilria si Ilrisa singikai Gilegale katwase;

² Sa ikai kadalranane, ku Ilria amia kai ki Ilrisa, “Asusura ikai kikai, ku Tamatama wacunu nakwane mwa ka Bithele iya.” Ku Ilrisa la tubalre, “Lri papiaku ki palralrawthu panianiake ka Tamatama si kusu kiketekete, lutuumane kainaku lri kidaili muswane.” Kwini lalasu la karedele mwa Bithelrihime.

³ Yakai ku mapaangale ku yuginsia ka yakaikai Bithele la mwa drele ki Ilrisa, kivaga iniane, “Wathingalesu kaikameane ku Tamatama ka lri malra iluku ki sinsisu?” Ku Ilrisa la iya kai, “Wathingalaku; takai matikai kikai.”

⁴ Ku Ilria amia kai ki Ilrisa, “Asusura ikai kikai; ku Tamatama wacunu nakwane mwa ka Yeriku iya.” Ku Ilrisa la tubalre, “Lri papiaku ki palralrawthu panianiake ka Tamatama si kusu kiketekete, lutuumane kainaku lri kidaili muswane.” La karededele mwa ka Yeriku.

⁵ Yakai ku mapaangale ku layuginsia ka yakaikai Yeriku la mwa drele ki Ilrisa, la kivaga iniane, “Wathingalesu kaikameane ku Tamatama lri malra iluku ki sinsisu?” Ku Ilrisa la iya kai, “Wathingalaku; ai takai matikai kikai.”

⁶ Ku Ilria la iya kai ki Ilrisa, “Asusura ikai kikai; ku Tamatama wacunu nakwane mwa kavai kadravane Yuredange iya.” Ku Ilrisa la tubalre, “Lri papiaku ki palralrawthu panianiake ka Tamatama si kusu kiketekete, lutuumane kainaku lri kidaili muswane.” Kwini lalasu la karededele katwase.

⁷ Yakai ku tamalrimale ku yuginsia la tupapalra liniane mwa ka kadravane Yuredange. Ku Ilria si Ilrisa la idrengere ibabiabila ki kadravane; kwini tamalrimale ka yuginsia acegecege ikai thili liniane.

⁸ Ku Ilria la mwalra ku sapakabelenganeini, la palrici, arakai sititi ki acilai, kwini acilai la mauvagai. Kwini lasu si Ilrisa la dadavace ngukakai ki kameamealanane, mwa kavai balrealreanane.

⁹ Sa talubalrenga, ku Ilria la kivaga ki Ilrisa, “Sa kainaku kimalrana si katwase, manemane ku ani pasikai nakwane iyasu?” Ku Ilrisa la iya kai, “Ala malra kwini pukusu padrima baai nakwane, la nau kamani ku mwacungulu muswane.”

¹⁰ Ku Ilria amia kai, “Kwini yai makucingalre tubalre ka nikitubiane. Ai, alaiyasi drelesu lu kimalraku katwase, lri dulrusu malra, lu kai mia kwini, kaisu lri maka tarumara.”

¹¹ Kwini lalasu la katwatwase takumakawrivarivariva. La pangitutuluku, ikai ku apwi ka larigi bilibilibili ki apwi ka palridingi kela mukabicelrakane kwini ki tadrusa, ku Ilria la kimalra iluku pubelenge ki alrilrawgu.

¹² Ku Ilrisa sa drele la karaleale, “Ama, ama! Sapukwane ka tarapalakebe ki swa Iseraylri!” Ku Ilrisa la twalainga kwini kai drelenga ki Ilria. Ku Ilrisa la tubi si malra kwini laimaini thuriace paudrusa,

¹³ la malra siludu kudra twalai ki Ilria ka mwacilri ka sapakabelebelengane, ala katwase siwlri acegecege ikai babiabila kadravane Yuredange.

¹⁴ Kwini lasu la arakai kwini sapakabelebelengane ki Ilria sititi ki acilai, si iya kai, “Yainu ku Tamatama ka Twaumase ki Ilria?” Ala peelanga sititi ki acilai, la mauvagai kwini acilai, kwini lasu la dadavace mwa balrealreanane.

¹⁵ Kudra twalai Yeriku ka tamalrimale ka layuginsia sa drele, la iya kai, “Ku puku ki Ilria yakainga ki Ilrisa!” Kwini lalasu la mwa kidredresenge iniane, guruthungane icucubungu iniane,

¹⁶ si iya kai, “Kawvai nai ka tamalrimale, idrepele ka sapukwane; ala nai mwa silape ki tawkisu, alau wamalra ku Ri ki Tamatama si iluku iniane, si pikai iniane kavai lregelrege valrwalru.” Ku Ilrisa la tubalre, “Ini, kunumi madha mwamwa!”

¹⁷ Ai, kwini lalasu makeecenge ku wamwa, ku Ilrisa la pamwa liniane. Kwini tamalrimale ka umawmase la mwa kidruanga silape ki Ilria, la silape makatulrulu la kai maka kidringai.

¹⁸ Kwini lalasu la siwlri mwa ki Ilrisa. Ku Ilrisa yakai kavai Yeriku mukalavalava liniane; kwini lasu la iya kai liniane, “Madha mwamwa kainaku ka amianga numiane?”

Ku Ilrisa paiya ku pinangu Twaumasane ka puku

¹⁹ Yakai ku umawmase ku twalai Yeriku kela kidrele ki Ilrisa, la iya kai, “Sinsi, wathingalesu ka mathariri ka cekele kikai; ai kai acilai kai, kai mathariri, makuciingalre pawtaleke.”

²⁰ Ku Ilrisa amia kai, “Lu malra ku vaeva ku bavane ka kisi, la pikaiya ki kisi ku timu.” Kwini lalasu la malra si baai iniane.

²¹ Ku Ilrisa la mwa babiabila ki tacebeane ki acilai, la malra ku timu gugu pwa ki acilai, la iya kai, “Ku Tamatama amia kai, ‘Lri pakabulaku kai ki acilai, lai kai papacapacainga, kai kadaengane lai kai kamealenga si arabaraba.’ ”

²² Twalainga kwini, ku acilai mabulanga, mararaamau kudra taiyane ki Ilrisa.

²³ Ku Ilrisa la twalai Yeriku mwa ka Bithele; ikai kadadalranane, kwini lasu la kipadradresenge ki lalangukathathabarane twalai ki cekele kainganai. Kwini lalasu la pulrivalrivale iniane, akwadrau tawtau, “Pulupuluku, katwasa!”

²⁴ Ku Ilrisa la ngibangulu, lengethe liniane, la pangukai ki nagane ki Tamatama pusu liniane. La ngibwale ku drusa ku tina ka cumai twalai ki angatungatu, si thuriace ikai liniane ki ta 42 ka langukathathabarane.

²⁵ Ku Ilrisa la katwase mwa lregelrege Karemele, ala siwlri mwa Samaria.