2 Latalialalai 11 - Ngudradreadrekadhane Ka Sisiu 魯凱語聖經

Atalia ka taelrelre ki talialalai ki swa Yuda

¹ Ku Atalia ka tina ki talialalai ka Ahazia sa kilalra ku lalakeini ka kiapapacai, la drekase pwa papacai ki wacekecekele ki talialalai ki swa Yuda, si laretesane makanaelre.

² La kakathane ku lalake ki Ahazia ka Yuase ka mwabere. Kwini lasu thadaalrane ka naika miyaiya ki drumane kipapacai, ai ku betakane ki tamaini ka Yuhuseba palribulu iniane; ku Yehuseba lalake ki talialalai ka Yehurame, ka mangangwatama ki Ahazia. Kwini alisu wamalra ki Yuase si siraparapale iniane sekete pudaane ki taluvale ki tapeapecane ikai ki daane ki Twaumase, kilepenge ki Atalia, la kai kipapacai ku Yuase.

³ Ku Atalia sarathurathudwana sakai ku takataelrelreaneini ki talialalai, ku Yuhuseba siarapale kai ki vavalake taraeneme ka caili, laka tasekeetane iniane pikai ki daane ki Twaumase.

⁴ Sa tarapitunga ka caili, ku barakalai ka Yehuiada la ikai ki daane ki Twaumase dawlu kikawriva kwini ki tarakadrenge ki daane ki talialalai si lakiacapili ki tarapalakebe ki daane ki talialalai, la pakiketekete liniane ku apalraingane lini ku anipia kwini iyaiyaini. Kwini lasu wailuku ki lalake ki talialalai ka Yuase pucucubungu liniane,

⁵ si drekase liniane iya kai, “Luka Taisadrasadrane ka vai, lu kamani numi ka wadrangalru, ku taingeane ki tulru ku umawmase ani kadrenge ki daane ki talialalai,

⁶ ku taingeane ki tulru ku umawmase lri kadrenge ki Sure ka lrawlrawdru, ku taingeane ki tulru ku umawmase si drumanenga lri kadrenge ki taelelebane ki cekele.

⁷ Ikai ki Taisadrasadrane ka vai ku kai wadrangalru ku taidrusane ku umawmase lri kadrenge ki daane ki Twaumase, palakebe ki talialalai.

⁸ Kunumi malra ku lrabu la palakebe ki talialalai ka Yuase; lu mwinu kwini lasu tupapalra mwinu; sana ikai ku ngwadadethe iniane pwa papacai.”

⁹ Ku lakiacapili ki kwapingi la singikai ku taiyane ki barakalai ka Yehuiada malra kwini ki kwapingi lini, adravane ikai ki Taisadrasadrane ka vai drangalru ka kai wadrangalru, mailuku kainganai.

¹⁰ Ku Yehuiada la malra kudra napudringai ki talialalai ka Davidi pikai ki daane ki Twaumase ku idiri si alathare baai ki lakiacapili ki kwapingi,

¹¹ la sikawlu ku palakebe ka kwapingi malra ku lrabu si kadrenge icucubungu ki daane ki Twaumase, palakebe ki talialalai.

¹² Kwini lasu la iluku ki Yuase mulatadre, la malra ku pagamucu ki talialalai pasipagamucu iniane, la malra ku hungu ka hulrice ki talialalai baai iniane, ku Yuase ala kipulawlau cegecege atalialalai. Ku mapapangale la macacareecare putariri, “Banzai talialalai!”

¹³ Ku tina ki talialalai ka Atalia sa kilalra sa putaritariri ku wakadrekadrenge si mapapangale, la kirariimu mwa ki taisarubwane ki laumawmase ikai ki daane ki Twaumase.

¹⁴ Kwini alisu la drele ki bavane ka talialalai sa singikai kudra ki tapiapiane ka kakudhane acegecege ithili ki ulrudru ki samamwadaane ki daane ki Twaumase, ku lakiacapili si tarangirapa ngiathalringulu iniane, ku mapapangale la putaritariri, ngirapapa. Ku Atalia la tubi turamuru si thuriace ku laimai, karaleale iya kai, “Wabalrenga! Wabalrenga!”

¹⁵ Ku barakalai ka Yehuiada ani kai kipapacai ku Atalia pikai ki daane ki Twaumase, la cunu ki lakiacapicapili ki kwapingi iya kai, “Malra iniane patwalai ki tarakadrenge iluku pulatadre, sana kaneane ku nau palribulu amia pwa papacai iniane.”

¹⁶ Kwini lalasu la ruthuku ki Atalia, malra iniane iluku mwa ki daane ki talialalai, ikai kwini ki Rigi ka lrawlrawdru si papacai iniane.

Tatupelane ki Yehuiada

¹⁷ Ku barakalai ka Yehuiada pacegecege ku samakaketeketane ki talialalai ka Yuase si mapapangale si Tamatama, ka lrika akawkawlane lini ki Tamatama. Kwini lasu la apakaketekete ki talialalai si mapapangale.

¹⁸ Ku mapapangale ki kuni la mwa ki biu ki Baale, baburuku kwini ki biu, pangulru paperake ki tapatarumaramarane si samiamiange, la ikai cucubungu ki tapatarumaramarane papacai ki barakalai ki Baale ka Matange. Ku Yehuiada la sikawlu ku wakadrenge ki daane ki Twaumase,

¹⁹ ala kwini lasu si tabebelenge, tarasikadrai ki talialalai, tarakadrenge ki daane ki talialalai, la sateatedre ki talialalai twalai ki daane ki Twaumase mwa ki daane ki talialalai; ku mapapangale la kabibibilrili. Ku Yuase la twalai ki takadrekadrengane ka lrawlrawdru mudaane, nene ikai ki taetalane.

²⁰ Ku mapapangale ki kuni la kiragai makanaelre, ku cekele la mialri kababiitinginga, asi lwiyane kikwini kwidra ku Atalia kiapapacainga ikai ki daane ki talialalai.

²¹ Ku Yuase sa atalialalai ki swa Yuda tarapipituana ku caili.