2 Latalialalai 1 - Ngudradreadrekadhane Ka Sisiu 魯凱語聖經

Ilria si talialalai ka Ahazia

¹ Sa pacainga ku talialalai ki swa Iseraylri ka Ahabe, ku swa Muabe wabalre ki swa Iseraylri.

² Ku talialalai ki swa Iseraylri ka Ahazia twalai ki sabebelenge ki daane ki ruka ki daane ki talialalai ki swa Samaria mwadreke, la ngicaeme turamuru. Kwini lasu la sikawlu ku umawmase mwa ki swa Pelisitine kivaga ki Baale Zibube ka twaumase ki cekele Ikerungu. Ku athingalane lulri dulru udringai lutumane.

³ Ai ku sasiakawlu ki Tamatama la cunu ki yuginsia ka Ilria ka swa Tisebi mwa kidrele ki sasiakawlu ki Ahazia ka talialalai, kivavaga liniane, “Anu mwa kivavaga ki twaumase ki Ikerungu ka Baale Zibube? Bekace ka kadrwa ku Twaumase ki swa Iseraylri?

⁴ Lu mwa pelaela ki talialalai, ku Tamatama amia kai, ‘Kai lri udringai kwi dulasu; lri tara pacaisu!’ ” Ku Ilria pangiamianga ku drekase ki Tamatama.

⁵ Ku sasiakawlu la siwlri mwa ki talialalai; ku talialalai la kivaga liniane, “Anu siwlri?”

⁶ Kwini lalasu amia kai, “Kiapadradresenge nai ku tangea ku umawmase; kwini lasu la pasiwlri naiane si pelaela ki talialalai, ku Tamatama amia kai muswane, ‘Asu sikawlu ki umawmase kivaga ki Baale Zibube ka twaumase ki Ikerungu? Bekace ka kadrwa ku Twaumase ki swa Iseraylri? Lakamani, kaisu lri maka mulebe twalai ki taapecanesu, kwini dulasu kai lri udringainga; lri tara pacaisu!’ ”

⁷ Ku talialalai la kivaga, “Kwini umawmase yai ngitwatumane?”

⁸ Kwini lalasu la iya kai, “Kwini lasu siaebele ku lrangici ki bulabulai, la silakete ku lrangici.” Ku talialalai la akwadrau iya kai, “Kwini lasu Ilria!”

⁹ Ku talialalai la sikawlu ku tangea ku kiacapili ki kwapingi sangiluku ku tamalrimale ku twapapalra mwa pwalra ki Ilria. Kwini kiacapili ki kwapingi la kidringai ki Ilria, kwini lasu yacengecenge nene ikai ki vaeva ka lrelrelrege, la iya kai iniane, “Umawmase ki Twaumase, ku talialalai wadrekase muswane bwala mulebea iya!”

¹⁰ Ku Ilria amia kai, “Luiyasi laka umawmasaku ki Twaumase, ani mulebe ku apwi twalai belenge lama papacai muswane si twapapapalra muswane!” Ku apwi la makakaai twalai belenge mulebe, si lama papacai kwini ki kiacapili ki kwapingi si twapapapalra iniane.

¹¹ Ku talialalai la sikaulunga ku tangea ku kiacapili ki kwapingi mailuku ku tamalrimale ku twapapalra mwa kikawriva ki Ilria la iya kai, “Umawmase ki Twaumase, ku talialalai wadrekase muswane makakaiya mulebe iya!”

¹² Ku Ilria la kawriva, “Luiyasi laka umawmasaku ki Twaumase, ani twalai belenge ku apwi lama muswane si twapapapalra muswane!” Ku apwi la makakaai twalai belenge mulebe, si lama papacai kwini ki kiacapili ki kwapingi si twapapapalra iniane.

¹³ Ku talialalai la sikaulunga ku tangea ku kiacapili ki kwapingi sangiluku ku tamalrimale ku twapapalra iniane mwa. Kwini kiacapili ki kwapingi la mwa lregelrege, pidruru icucubungu ki Ilria, kitubi iya kai, “Umawmase ki Twaumase, ala kakuruaili si la twapapapalra nakwane; palribulu kai niake nai!

¹⁴ Kwini drumane ka tadrusa ka kiacapili ki kwapingi si la twapapapalra liniane kialama papacai ki twalai subelebelenge ka apwi makanaelre; ai kiatubiaku muswane kakuruaili!”

¹⁵ Ku sasiakawlu ki Tamatama la iya kai ki Ilria, “Lu tupalra iniane mulrawdru, madha mukulukuludru.” Ku Ilria la tupalra kwini ki kiacapili ki kwapingi mwa kavai ki talialalai,

¹⁶ La kawriva ki talialalai, “Ku Tamatama amia kai, ‘Amani sa sikawlusu pamwa kivaga ki Baale Zibube ka twaumase ki Ikerungu, miakau kadrwa ku Twaumase ikai Iseraylri ku adulrwane madu kivaga, lakamani kwini dulasu kai lri maka mudringai; lri tara pacaisu!’ ”

¹⁷ Mararaamau ku tapangukaiyane ki Tamatama ki Ilria si kawriva, ku Ahazia wapacai. Ku Ahazia kadrwa ku lalake, lakamani kwidra agini ka Yurame mwacungulu iniane atalialalai; kwini ki caili amani saka taradrusanga ka caili ku takatalialaladhane ki swa Yuda ki Yehurame ka lalake ki Yehusapate.

¹⁸ Ku talialalai ka Ahazia kudra drumane ku takaunganeini ninguvavaevane pacase pikai ki lrikisi ki Latalialalai ki swa Iseraylri ka hungu.