2 Lacaili 9 - Ngudradreadrekadhane Ka Sisiu 魯凱語聖經

Takelane lidrau ki talialalai ki swa Seba

¹ Sa kilalra ku ababai ka talialalai ki swa Seba ku takimatikaiyane ki talialalai ka Sulumungu la kela Yerusalrime, nau arakai ku apakakucingalrane kilrialringau iya ki Sulumungu. Kwini alisu la iluku ku mapangale ku papalraini, la ikai ku taingea ka sakaredele ku lrakeda siamece ku sapasangulrelremane, lasilu, si thathatha ku kingi. Kwini alisu sa drelenga ki Sulumungu, la arakai ku tapakelaneini thingale ku mendai si kivavaga ki Sulumungu.

² Ku Sulumungu la singibila tubalre kudra kivagaini, kadrwa ka navaevanga ku pakakucingalre ki Sulumungu.

³ Ku ababai ka talialalai ki swa Seba sa kilalranga ku lrigilane ku vaga ki Sulumungu, drelenga kudra tudaaneini ku daane ki talialalai,

⁴ la drelenga kwini yacukudhane ku talimememe ku akaneane, ladaane ki kiacapicapilini, tarathudane si sangiragelanane ki tarapalakebe iniane, kudra taramarasikai paungulu ka sasiakawlu si laimai lini, si kwini nipatarumarane ikai ki daane ki Twaumase, la asasamaliane kai maka avavaga.

⁵ Kwini alisu la kawriva ki Sulumungu ka talialalai iya kai, “Kudra takilalraneli sa ikaiyaku ki kunili kudra pangukai muswane ku takaungane si lrigilanesu patengatengane patuelre.

⁶ Ai sa kelangaku kikai si ngikakamani drele kikai patuelrenga masalrwaku ka patengatengane. Ku takilalraneli kaiyana ka pararamauana! Ku lrigilanesu madraadrawana kudra tapelaelane nakwane ki palrapalra.

⁷ Ku lasasiakawlusu ala mwaesai turamuru! Kwini lalasu lri dulru ka taicucubungane muswane si kilalalalra ku lrigilane ku vagasu.

⁸ Ku Tamatama ka Twaumasesu ani kidrengedrengere! Wacegecege muswane paatalialalai, la pangukaisu ku naganeini rathudu, sapelaelane ka mathalrai turamuru muswane. Asi lwiyane mathalrai ki kawkawluini ka swa Iseraylri, lri palralrawthu palakebe liniane, lakamani ku cegecege muswane tutalialalai, la maka arakaisu ku hulrice si aparamaramavane ku dringelresane.”

⁹ Ku ababai ka talialalai ki swa Seba la malra kwini ilukuini ku saceacebe baai ki talialalai ka Sulumungu: Lri ikai kau 4,000 ka kukingi ku kingi, thathatha ku sapasangulrelremane si lasilu. Ku Sulumungu kadrwana ku tatarumaraneini ku paramia ki ababai ka talialalai ki swa Seba ku baaini ku tharirane ku sapasangulrelremane.

¹⁰ Ku lasasiakawlu ki talialalai ka Hirame si talialalai ka Sulumungu la twalai Upire salri ku kingi, la mialri salri ku makalra ku yunipere ka angatu si lasilu.

¹¹ Ku Sulumungu ka talialalai la arakai kikai cedare ka angatu tusataetaetale ki daane ki Twaumase si daane ki talialalai, la mialri pasikai ki la tarapatungutungu tarasenasenai darepe ku patungutungu si sipitulu ka patungutungu. Kai swa Yuda kadrwana ku tadrelane lini ku miyaiya kai ku tathaithariri ka yunipere ka angatu.

¹² Ku Sulumungu ka talialalai la pakaelre ku kidremedremeini bilri baai ku sakiaseasenane ki ababai ka talialalai ki swa Seba ku makaelaela ku lamanemane, sanaka murikai ki ababai ka talialalai ki swa Seba, kwini lasu wabaai ki alisu. Kwini ababai ka talialalai si la tarapalakebe iniane la siwlri mwa kavai Seba.

Tacekecekelane ki Sulumungu ka talialalai

¹³ Ku Sulumungu ka talialalai ki caicaili tarwamara ku 23,000 ka kukingi papubebelenge ku kingi,

¹⁴ la ikaiyana ku drumane ku kazilu ki tarasiwbawbai, ku latalialalai ki swa Arabia, si lasutu ki swa Iseraylri, la mialri baai ku kazilu ku kingi si gingi.

¹⁵ Ku talialalai ka Sulumungu wadarepe ku 200 ku tadradrau ku alathare; ku vaeva ku telregane ikai kau pitu ka kukingi ka arakai ku kingi darepe.

¹⁶ Kwini lasu la daarepenga ku 300 ku tatitiki ka alathare, kwini vaeva lri ikaai kau tulru ka kukingi ka niarakaiyane ku kingi darepe. Kwini lasu la malra kikai laalathare pikai ki daane ki talialalai kavai angatungatu ka Lebanungu.

¹⁷ Ku Sulumungu ka talialalai la arakaainga ku valisi ki zu darepe ku vaeva ku madradrau ka taetalane, arakai ku kakingiane cabu.

¹⁸ Kwini cucubungu ki taetalane yakai ku sinemele ku tataetaetale, maelre ki tadredredreane, arakai ku kingi cabu. Kwini maecebe ki taetalane yakai ku takirecerecengane, ki maecebe tara vaeva ku raiyungu.

¹⁹ Kwini ki tataetaetale ki tamaecebane la ikai ku raiyungu, paelrelrenga 12. Kadruana ku kuni ku piakai ku miyaiya kai ku taetalane.

²⁰ Ku kupu ki Sulumungu ka talialalai yadrepele ka niarakingiane; kwini sakanekane ku latakaiyane ikai daane ki talialalai kavai angatungatu Lebanungu niarakingiane darepe, kai arakaikai ku gingi; asi lwiyane ikai ki zidai ki Sulumungu, kaika tinukucingalrane kai gingi.

²¹ Ku Sulumungu la ikai ku taramwadaidaili ka varukuru ka sakaredele, maredele ki sakaredele ki Hirame; kwini lu taratulru ka caili ngwasivaale kela, mailuku ku kingi, gingi, valisi ki zu, tadradradrau ka babila kela.

²² Ku Sulumungu ka talialalai maesaesaesainga ki sanaka talialalai ki swainunga ki kuni, laka malrilrigilinga.

²³ Sanaka talialalai kawmasane apia kidrele ki Sulumungu makanaelre, takilalra iya kudra patarumara ki Twaumase ku lrigilane ku vagaini.

²⁴ Kwini lalasu lukacaili tara wailuku ku saceacebe baai iniane, ku kingi ka lawbubulu, gingi ka lawbubulu, laimai, sakikaruburane, sapasangulrelremane, larigi, langiririgi, kikai miyaiya kai la kaulai.

²⁵ Ku Sulumungu laka tai 4,000 ku daane ki palridingi si rigi, la ta 12,000 ku tarangurigi ka kwapingi. Kwini lasu wamalra ku drumane pikai Yerusalrime, ku drumanenga la pikai ki drumane ka lacekele.

²⁶ Ku Sulumungu warathudu twalai kavai Iupatese kadravane kela kavai Pelisitine si pagisane ki swa Izipiti ki latalialalai makanaelre.

²⁷ Ikai ki tarathudaneini, ku gingi Yerusalrime mararamau ki lrenege ku kalrane, ku cedare ka angatu ku kalrane mia ki yalregelrege ka lataliwdru.

²⁸ Ku Sulumungu patwalai ka Muceri si drumane ka kuni langai pukuni ku larigi.

Ningubebelengane pelaela ku tarathudane ki Sulumungu

²⁹ Ku drumane ku takaungane ki Sulumungu, twalai ki pathagili pakela ki twalrepenge, nipacasane pikai ki lrikisi ki Yuginsia ka Nathange ka hungu, ki Niyugingane ki Ahiya ka swa Selu ka hungu, si Maburusi ki Yuginsia ka Idu ka hungu. Ku bibiilrilinga ku hungu wapacase pikai ki takaungane ki talialalai ki swa Iseraylri ka Yerubuame.

³⁰ Ku Sulumungu yakai Yerusalrime atalialalai, taramasupatele ka caili rathudu palraelre Iseraylri.

³¹ Sa pacai kwini lasu kiadralreke pikai ki cekele ki Davidi, ku lalakeini ka Rihubuame la mucungulu iniane atalialalai.