2 Lacaili 8 - Ngudradreadrekadhane Ka Sisiu 魯凱語聖經

Takaungane ki Sulumungu

¹ Ku Sulumungu taramapusale ka caili ku tatudaanane ku daane ki Twaumase si daane ki talialalai.

² Kwini lasu la mialri tupudriadringai kudra kibaaini ki talialalai ka Hirame ku cekele, la malra pikaikai kwini ki mapapangale ki swa Iseraylri.

³ Kwini lasu la drikisinga malra ku talikai Hamathe Zuba,

⁴ la tucekele kwini yakai calragulragu ka cekele ka Palamira, la mialri tupela patuelre kwini latasekeseketane ki lamanemane ka lacekele ikai Hamathe.

⁵ Ku Sulumungu la mialri tupela kikai lebe kikai lacekele: Sadradradha ka Bithe Hurungu si salrawlrawdru ka Bithe Hurunu (yakai ku taelelebane ki cekele, lri dulru pwa ku sadrukudrukurane palakebe),

⁶ cekele Baala, sanaka tasekeseketane ka lacekele, si sanaka tapikaikaiyane ki lapalridingi ka cekele. Kwini lasu twalrepengenga kwini kikakeini ku awngane ikai Yerusalrime, Lebanungu, si kwidra laawngane ikai ki kuni palraelre,

^7-8 Ku Sulumungu la vwavutha dawlu kwini ki mwabaibalrithi ki swa Kanange tutarakauawngu, kwini lalasu amani kwidra kai kiapapacai sa drikidrikisi kai kadaengane kai ku swa Iseraylri, paelre ki: Hite, Amuri, Perizi, Hivi si Yebuse ka laumawmase. Kwini mwabaibalrithi liniane pakela kikai thadaalraneana kituduri.

⁹ Ku Sulumungu kai twatarakauawngu ki swa Iseraylri, twakwapingi, tukiacapili ki kwapingi, kiacapili ki palridingi ki rigi ka kwapingi.

¹⁰ Kwini lalasu ta 250 ka tarakadrekadrenge ki awngane, wakadrenge ki tarakawaungu pia ku makaelaela ku la atudaanane.

¹¹ Ku Sulumungu la malra kwini ki labaibaini ka lalake ki talialalai ki swa Izipiti, patwalai ki cekele ki Davidi pataluela mwa kwini ki pasikaini iniane ka bavane ka daane ki talialalai. Kwini lasu amia kai, “Kikai alisu kai lri maka ikai ki daane ki talialalai ki swa Iseraylri ka Davidi, asi lwiyane sanaka tamwanenga ki Langiane ki Tamatama alrivilrivinga patuelre.”

¹² Ku Sulumungu la ikai kwini ki yacucubungu ki daane ki Twaumase ka tapatarumaramarane patarumara ku Lama ka lrisi.

¹³ Kwini lasu singiakai ku hulrice ki Musi ku takelretane, pasikai sanaka saniange ka vai patarumara ku Lama ka lrisi, kikai la saniange ka vai amani kai: Taisadrasadrane ka vai, ki aswalalanga ka vai ki dramare, si taitulrwane ka tatulrisisisiane ki caili, Tamwalrane ku sapawsemakane ka lrisi, Takitaletalekane ka lrisi, Talakangane ka lrisi.

¹⁴ Kwini lasu singiakai ku takelretane ki tamaini ka Davidi sikawlu ki barakalai si swa Lrivi ku awngane lini ki vaivai, ku swa Lrivi paraluralubu ki barakalai karedele senai si kipuawngane ku drumane. Kwini lasu la mialri singiakai ku takelretane ki umawmase ki Twaumase ka Davidi malra tutaipiaane ku tarakadrenge ki daane ki Twaumase, ku lrika aikaiyane lini ki lalrawlrawdru ki cekele kipuawngane ki vaivai.

¹⁵ Ku tapelaelane ki Davidi ki barakalai si swa Lrivi ku ngwakai ki tasekeseketane si drumane ku awngane, kwini lalasu makitwa pangimianga singibila.

¹⁶ Kikai kwidra, ku takikakane ki Sulumungu patuelre makitwa patulrepengenga, twalai ku tacegecegane ku karwalai ki daane ki Twaumase pakela ki twalrepenge, masasuliivate sanaka laawngane.

¹⁷ Sakabilrilinga, ku Sulumungu la mwa ka Iziungebere si Iluthe, kikai amani ku tawbilabilane ki lavarukuru ki swakai talikai Idume ka ngwababiabila ki laveke.

¹⁸ Ku talialalai ka Hirame wabaai ki Sulumungu ku lavarukuru, kwini varukuru laka kiacapili ki Hirame ku wasangililuku, si kamani kwidra wathingalenga huntingi ki varukuru ka wahuntingi. Kwini lalasu maredele ki lakiacapili ki Sulumungu nguvarukuru mwa kavai Upire, patwalai kwini mailuku ku 15,000 ka kukingi ku kingi baai ki Sulumungu.