2 Lacaili 4 - Ngudradreadrekadhane Ka Sisiu 魯凱語聖經

Lawbubulu ki daane ki Twaumase

¹ Ku talialalai ka Sulumungu wadawlu ki umawmase padarepe ku vaeva ku lriwlu ka tapatarumaramarane, ku lragiane bangate ka mituru, ku ngulapane bangate ka mituru, ku abelengane supate ka mituru si apararamau ka mituru.

² Kwini lasu la mialri darepe ku lrimemeteke ka lriwlu ka thalange, ku alrukulane drusa ka mituru si drusa ka kuncunge, ku ngulapane supate ka mituru si supate ka kuncunge, ku ngiathalringulu 13 ka mituru si drusa ka kuncunge.

³ Kikai lriwlu ka thalange kwini ki tali latadrenga laka nipatatilibane ku sipusale ku lriwlu ka nipapacasane, ku sivale yakai belenge, ku sivale la ikai lebe, ka nipapacasane ku sawvalai ka lwange. Kilakikai lriwlu ka lwange si lriwlu ka thalange yai, patwalai ki vaeva ka lriwlu darepe.

⁴ Kwini lriwlu ka thalange la pibelenge ki drelreke ki 12 ka lwange; ku lringau ki lriwlu ka lwange la papulalatadre, ku tulru papia tali talrawane, ku tulru papia tali talriwgane, ku tulru papia tali lrawdru ku tulru papia tali dradha.

⁵ Kwini lriwlu ka thalange ku kudremelrane pitu ka kunhunge si apararamau, kwini babiabila mia ki babiabila ki kupu, nipapacasane tubariangalai. Kwini alrukulane ki lriwlu ka thalange yai, lri mwa ku 60,000 ka kunsenge.

⁶ Kwini lalasu la darepe ku mangeale ku taneneane ki lriwlu ka vintange, ku lrima piakai ki tali lrawdru ki daane ki Twaumase, ku lrimanga piakai ki tali dradha. Kikai lalriwlu ka vintange yai, sarakaikaiyane sinau ki niteketekanenga ka Lama ka lrisi. Ku yakai ki lriwlu ka thalange ku acilai yai, sarakaiyane sikelre ki barakalai.

^7-8 Kwini lalasu singiakai ku tapangimiamiane pia ku mangeale ku kingi ka tatinakiane, mangeale ku cukwi, pikai ki swaadrau ki daane ki Twaumase, maecebe tara piakai ku lrima ku tatinakiane si lrima ku cukwi. Kwini lalasu la pia ku idai ku kingi ka kisi.

⁹ Kwini lalasu la pasikai ki labarakalai tukalatadrane ku sadadaane, mialri tukalatadrane ku salalatadre. Kwini kabicelrakane ki kalatadrane ku lrawlrawdru tara nicabwane arakai ku lriwlu.

¹⁰ Ku lriwlu ka thalange piakai ki tamakakelane ki tali lrawdru ki talrawane ki daane ki Twaumase.

^11-16 Ku Hurame la mialri darepe ku palungu, sakadrakadravane si kisi. Kwini lasu pasiakai ki talialalai ka Sulumungu patulrepengenga kudra kisudralruini ku akaungane ki daane ki Twaumase. Ku daedarepeini ku lalawbubulu amani kikai lebe: Drusa ku ulrudru ka lriwlu, Nipikaiyane ki ulrudru ka lriwlu ka drusa ka mia ki kisi ka awlru, Ki awlru ki ulrudru makakalrivathe ka kicikici ka nipacasane, 400 ku lriwlu ka nginanavate, kwini ki vaeva ki awlru ki ulrudru ka nipapacasane pangithalringulu ki sipusale ka nginanavate. Mangeale ka taneneane ka lriwlu, Mangeale ka vintange ka lriwlu, Lriwlu ka thalange, Sapawlrudrane ki lriwlu ka thalange 12 ka lriwlu ka sawvalai ka lwange, palungu, sakadrakadravane, sacucwikane, Ku daikusange ka Hurame pangiamia ku drekase ki talialalai ka Sulumungu, arakai ku niurathane palikalikathe ku lriwlu, ka arakaiyane ki daane ki Tamatama.

¹⁷ Kikai patuelre singiakai ku tadrekasane ki talialalai, ikai valru Yurudange, Sukuthe si Zarethange ki tadaredarepane darepe.

¹⁸ Ngwalai ki kalrane turamuru ku nidarepane, kadrwa ku umawmase ku makawaasipi luka arakai ku thaininu ku lriwlu.

¹⁹ Ku Sulumungu la padarepe ki umawmase pasikai ki daane ki Twaumase ku makaelaela ku kingi ka lawbubulu: Yakai ku kingi ka tapikaikaiyane patarumara, si tapikaikaiyane ku pange ka cukwi,

²⁰ ku nipacegecegane icucubungu ki Alrivilriviilrivinga ka taikaikaiyane si padalai ka kingi ka tinaki si tatinakiane;

²¹ bengelrai, tinaki, kacipi ki apwi;

²² sakaciacianane ki bengelrai ka rusuku ka kaciane, kisi, usara ka tapikaiyane ku sangwalreme, si tatwapwapudhane ki lrangele ka vintange; kikai lalawbubulu niarakaiyane ku kakingiane darepe patuelre. La ikaiyana ku takirairaisane ki lrawlrawdru ki Alrivilriviilrivinga ka taikaikaiyane, si lrawlrawdru ki daane ki Twaumase, niarakaiyane ku kingi cabu patuelre.