2 Lacaili 3 - Ngudradreadrekadhane Ka Sisiu 魯凱語聖經

¹ Ku tama ki Sulumungu ka talialalai ka Davidi maka padulrunga pasikai ku lrika taikaiyane tudaane ku daane ki Twaumase, amani kavai Yerusalrime kavai lregelrege ka Muria, ku taikaiyane ki Tamatama papia ki Davidi adrelane, yakai ki tavelavelatane ki mugi ki Arauna ka swakai Yebuse.

² Saka tarasupate ka caili ki sakadrusa ka dramare ku takatalialaladhane ki Sulumungu pathagili tudaane ku daane ki Twaumase.

³ Ku talialalai ka Sulumungu kudra tudaaneini ku daane ki Twaumase ku lragiane 27 ka mituru, ku ngulapane 9 ka mituru.

⁴ Kwini samamwa daane ka taililingane ku ngulapane mararaamau ki daane ki Twaumase, 9 ka mituru, ku abelengane 54 ka mituru. Ku taliadringi ki lrawlrawdru arakai ku kakingiane padakipi patuelre.

⁵ Kwini swadradrau ka kadaanane wakedrekedre patilibi ku bali ka cedare ka angatu, ala padakipi ku kakingiane, kwini belenge la papacase ku abare si kicikici.

⁶ Ku talialalai arakai ku malealedra ku tinukucingalrane ka lrenege si nipatwaladhane badhanane Paraviame langai ka kingi pangiraeragelane ki daane ki Twaumase.

⁷ Kwini lasu arakai ku kingi padaidakipi pangiragelane ki balingibingi, bulri, satelengane ki lrawlrawdru si saelelebane ki daane ki Twaumase. Ku daikusange piakai ki balingibingi papacase ku Kirubime.

⁸ Kwini ki Alrivilriviilrivinga ka taikaikaiyane adringi ku lragiane 9 ka mituru, ku ngulapane 9 ka mituru, mararamau ki daane ki Twaumase. Ku sapadaidakipane ku kingi ki balingibingi ki Alrivilriviilrivinga ka taikaikaiyane nipadakipane arakai ku mapusale kuntungu ka kingi.

⁹ Arakai ku 570 kunke ka kingi ka sakedrekedre. Ku balingibingi ki sabebelenge ka daane la mialri ka niarakaiyane ku kingi padaidakipi.

¹⁰ Ku talialalai la dreekasenga ki ladaikusange arakai ku lakingi darepe ku drusa ku Kirubime, la cabu arakai ku kingi, pikai adringi ki Alrivilriviilrivinga ka taikaikaiyane.

^11-13 Kikai drusa ka Kirubime nipalalapirane pacegecege, cucubungu ki samamwa daane; kwini vaeva ka Kirubime drusa ku sapakepake, ku sapakepake laka drusa ka mituru si drusa ka kuncunge ku lragiane, kwini maecebe ku sapakepake sana sege, madradresenge ikai ki kabicelrakane ki daane ki Twaumase, kwini maecebe la tara pungupungu ki balingibingi, daruru nguelre ki ngulapane ki Alrivilriviilrivinga ka taikaikaiyane, ikai kau 9 ka mituru.

¹⁴ Ku sapaidringane ku make ki Alrivilriviilrivinga ka taikaikaiyane arakai ku malubibiri ka lalasare ka kaimadhane si drumane ku zairiu caisi, nieremane ku salesese, thilalatadhane, duduli, laka nipapacasane ku Kirubime pikai belenge.

Drusa ka lriwlu ka ulrudru

¹⁵ Ku talialalai la padarepe ku drusa ku lriwlu ka ulrudru, ku vaeva ku elrengane 15 ka mituru si apararamau ka mituru, pacegecege picucubungu ki daane ki Twaumase; kwini vaeva ku nituawlrwane, ku abelengane drusa ka mituru si drusa ka kuncunge.

¹⁶ Kwini ki awlru belenge laka nipangiraeragelane ku nipapacasane ku kicikici si idai ku nginanavate ka lriwlu.

¹⁷ Kikai drusa ka lriwlu ka ulrudru nipacegecegane ikai ki samamwa daane ki daane ki Twaumase paecebe, kwini salrawlrawdru sia Yakingi amia, kwini sadradradha lasi Buaze.