2 Lacaili 2 - Ngudradreadrekadhane Ka Sisiu 魯凱語聖經

Padulru ku atudaanane ku daane ki Twaumase

¹ Ku Sulumungu malrithethenga ku twadaane ku daane ki Twaumase, ku lrika aikaiyane kwini sukubu ki Tamatama. Kwini lasu mialri kalritheethe ku angitatudaanane ku daane ki talialalai.

² Kwini lasu arakai ku ta 70,000 ku umawmase ku tarasalrisalri, ta 80,000 ku taratulrenege, ta 3,600 ku tarakadrenge ki awngane ki tatudadanane.

³ Ku Sulumungu siakawlu ki umawmase mwa ki talialalai ki swa Tayre ka Hirame iya kai, “Nakialangaisu ku cedare ka angatu baai ki ama ka talialalai ka Davidi tudaane ku daane ki talialalai, ala tuthadalrana pangimia nakwane.

⁴ Yacengecengaku tudadaane ku daane ki Twaumase, lrigulrigu ki Tamatama ka Twaumaseli. Kikai daane ki Twaumase lrika amani ku saniange ka taikaikaiyane, kunaku si mapapangaleli lanai dulru ikai kwini padalai ku sangwalreme si sukubu ki Tamatama, kai reteretege ku apatarumarane ku pange ikai kwini, lukamialrealre si miauawbu, luka Taisadrasadrane ka vai, luka aswalalanga ka vai ki dramare si drumane ka saniange ka vai patarumara ku Lama ka lrisi, musakene ki Tamatama ka Twaumase nai. Nawadrekase ki swa Iseraylri ku lrika apalralrawthane pangimia kikai.

⁵ Lri tudaanaku ku matiasalru ka daane ki Twaumase, asi lwiyane ku Twaumase nai sanianiangenga ki sanaka twaumase.

⁶ Kadrwa ku umawmase ku lrika patengatengane pasikai ki Twaumase tudaane, asi lwiyane adravane ka kadrwa ku taalikaiyane ka belenge kai lri maka mwana iniane. Lri tumanaku si maka dulru pasikai iniane tudaane ku taluvale ku amakakekelretane ka talamalamane ku sangwalreme ka daane?

⁷ Kaiasasane, ala sikawla ku mwakalrivili ku lrigilane ka sialrima kela kai, wathingale papacase ki angatu, wathingale arakai ku kingi, gingi, lriwlu, adreme, darepe ku lamanemane, wathingale tinunu ku salesese, thilalatadhane, duduli ka makalrilau. Kikai umawmase lri maelre ki daikusange ki swa Yuda si swa Iseraylri, kwini pilri ki ama ka Davidi ka ladaikusange, taelre kipuawngane.

⁸ Wathingalaku talrilrigili turamuru ku tarathurathurade numiane, lakamani mwarikaiyaku ku apatwaladhanesu Lebanungu salri ku cedare ka angatu, alrenge ka angatu, si yunipere ka angatu baai nakwane, lri pakatwasaku ku umawmase kulri paralubu ki tarakawaungu muswane,

⁹ padulru pakakalra ku la thinuradane, asi lwiyane ku atudaananeli vaeva ka maadrau ka matiasalru ka daane ki Twaumase.

¹⁰ Lri patarumaraku ki tarathurathurade ku 2,000 ka kuntungu ku tatititiki ka mugi, 2,000 ka kuntungu ku tadradradrau ka mugi, 400,000 ka kunsenge ku bava, si 400,000 ka kunsenge ku lawlau ki ulrive.”

¹¹ Ku talialalai ka Hirame la satedre baai ki Sulumungu ku satubalreane ku tigami, iya kai, “Kialibake ku Tamatama ki mapapangaleini, cegecege muswane tutalialalai liniane.

¹² Drengedrengera ki Tamatama ki Twaumase ki swa Iseraylri, ka wabekace belenge si kai kawmasane! La patarumara ki talialalai ka Davidi ku miakai kalrigili saawlrwane ka lalake; kikai lalake la kikaikake ku apasikaiyane ki Tamatama tudaane ku daane ki Twaumase, mialri ngitatudaane ku daane ki talialalai.

¹³ Kaiasasane lri sikawlaku ku tangea ku malrilrigili si ka kiatwalrawnga, saalrimane paramuru ka taradaedarepe baai muswane; kwini lasu sia Hurame,

¹⁴ ku tinaini laka swa Dange ka zuku, ku tamaini swa Tayre. Malrigili arakai ku kingi, gingi, lriwlu, adreme, lrenege si angatu darepe tulamaneemane, la mialri kalrigili tinunu ku salesese, thilalatadhane, duduli ka makalrilau si tinunu ku lalasare ka kaimadhane. Malrigili arakai ku makaelaela ku sarakaikaiyane paceke pacase, mialri thingale patwalrau ki makaelaela ku zimingi. Lri dulrusu taelre ki daikusangesu si daikusange ki tamasu ka Davidi maelre ku awngane lini.

¹⁵ Kaiasasane, kwini palraingisu nakwane ku tatititiki ka mugi, tadradradrau ka mugi, bava si lawlau ka ulrive salria baai naiane!

¹⁶ Lri ikai nai Lebanungu lregelrege thurade ku arakaiyanesu ku thinuradane, la sapiti erece, si pelai pangukakai ki laveke salri pwa kavai Yupa, lasu patwalainga kwini salri pwa kavai Yerusalrime.”

Patagase tudaane ki daane ki Twaumase

¹⁷ Ku talialalai ka Sulumungu waasipi ki yakaikai Iseraylri ka sakamaelanane ka zuku patuelre, mararaamau ku natapangimiane ki tamaini ka Davidi asipi pakipacase sanaka umawmase, paelrelrenga ta 153,600.

¹⁸ La sikawlu liniane ku ta 70,000 ku tarasalrisalri ki lasarakaikaiyane, ta 80,000 ku yakai lregelrege tulrenelrenege, la mialri sikawlu ku ta 3,600 ku tarakadrenge kwini ki la kiapuawawngane.