2 Lacaili 13 - Ngudradreadrekadhane Ka Sisiu 魯凱語聖經

Tamakakaruburane ki Abiya si Yerubuame

¹ Ku talialalai ki swa Iseraylri ka Yerubuame saka tara 18 ka caili ku takatalialaladhane, ku Abiya atalialalai ki swa Yuda.

² La taratulru ka caili rathudu ikai Yerusalrime. Ku tinaini sia Mikaia, ka lalake ki Uriele ka swakai cekele Gibia. La makakaruburu ku Abiya si Yerubuame,

³ ku Abiya la sangiluku ku ta 400,000 ku kwapingi mwa makakaruburu ki ta 800,000 ku kwapingi ki Yerubuame.

⁴ La ikai ka Iparaime madradresenge kikai taidrusa ka kwapingi. Ku talialalai ka Abiya la mubelenge ki lregelrege Zemaraime papia ki Yerubuame si swa Iseraylri tawtau; kwini lasu amia kai, “Kunumi kilalra!

⁵ Laibekace kai numi thingale ki Tamatama ka Twaumase ki swa Iseraylri kana makaketekete ki Davidi kudra kaika apakamudane? Ku Tamatama wabaai kikai atalialaladhane ki swa Iseraylri ki Davidi si mwabaibalrithi.

⁶ Ku lalake ki Nibate ka Yerubuame wabaebalre ki talialalaini ka lalake ki Davidi ka Sulumungu,

⁷ Sakabilrilinga, la dawlu sarubu ki lagurucuki, kakeecenge kiecebe ki lalake ki Sulumungu ka Rihubuame; kikwini ku Rihubuame vavalakeana, kadrwa ku takilringavaneini, kai maka waruthuku liniane.

⁸ Kikai kwidra kunumi la kikake numi ku amwane kikaruburu ki patarumara ki Tamatama ki takatalialaladhane ki mwabaibalrithi ki Davidi; maparamuru ku kwapingi numi, la ikai kwini darepe ki Yerubuame ku kingi ka lwange ku twaumase numi.

⁹ La malra numi pakatwase ki barakalai ki Tamatama ka lamwabaibalrithi ki Arungu, la mialri pakatwase ki la swa Lrivi; la singikai numi ku kakwakudhane ki drumane ka kuni sikawlu ku barakalai ngitalingikaiyane liniane. Sanaka aneane ku wailuku nguvaeva ku sawvalai ka lwange ku pitu ku nikiubawbalane ka kiu, la pacegecege numi liniane ka barakalainga ki twaumase numi.

¹⁰ “Ai, kunai thadaalraneana nai marasikaikai ki Tamatama ka Twaumase nai, kai cilri iniane. Ku lamwabaibalrithi ki Arungu marasiakaikai ku awngane lini; ku swa Lrivi la paraluralubu liniane.

¹¹ Kwini lalasu lukamialrealre lukamiauawbu papia iniane padalai ku sangwalreme, patarumara ku Lama ka lrisi, la pikai belenge ki mabula ka cukwi patarumara ku sapatarumarane ka pange. Lukamaungu la padalai ku apwi ki kingi ka tatinakiane. Pasusu nai kudra padradrekase ki Tamatama ka Twaumase nai, kunumi la kidaili numi cilri numi iniane.

¹² Ku Twaumase, amani ku tarasangililuku naiane; ku barakalaini yakai kai, wamalra ku sangirapane ku lawngu, wasarubu naiane si kikaruburu numiane. Kunumi ka swa Iseraylri, madha makakaruburuburu ki Tamatama ka Twaumase ki cucungulane numi! Kai numi lri maka pamalebe!”

¹³ Kikai kwidra, ku Yerubuame la velevele ku drumane ku kwapingi ikai lrilrikudru ki swa Yuda lepenge, ku drumane la singi cucubungu kikaruburu.

¹⁴ Ku swa Yuda la masiasirare drele, la drele ka kialringulunga, la kitubi ki Tamatama ku apalribulane; ku labarakalai la ngirapa.

¹⁵ Ku swa Yuda la makakaraleale, ku Abiya la sangiluku liniane kikaruburu. Ku Twaumase la pamalebe ki Yerubuame si kwapingi ki swa Iseraylri.

¹⁶ Ku swa Iseraylri la mubere ki swa Yuda; ku Twaumase la paakaci ki swa Yuda.

¹⁷ Ku Abiya si lakwapingini la pamalebe ki swa Iseraylri, la amudu ku ta 500,000 ku garagarange ka kwapingi ki swa Iseraylri.

¹⁸ Ku swa Yuda akaci, asi lwiyane kwini lalasu satalu ki Tamatama ka Twaumase ki cucungulane lini.

¹⁹ Ku Abiya la saladha ki kwapingi ki Yerubuame, la malra ku taipiane ku cekeleini, amani ka Bithele, Yesana si Iperungu si kwini ngwadadethe kai ki cekele.

²⁰ Saka talialalai ku Abiya, ku Yerubuame kai maka ngiaradhekane. Sakabilrilinga ku Tamatama la lrumai iniane, la pacai kwini lasu.

²¹ Ku Abiya la aru ngiradheradhekane sapukwane; kwini lasu ta 14 ku lataelrelreini, ta 22 ku lalalakeini ka sawvalai, ta 16 ku lalalakeini ku labaibai.

²² Ku drumane ku takaungane ki Abiya si lavagaini la nipacasane pikai ki aswalala ka lrikisi ki Yuginsia ka Idu ka hungu.