2 Lacaili 12 - Ngudradreadrekadhane Ka Sisiu 魯凱語聖經

Mwacekele Yuda ku swa Izipiti

¹ Ku Rihubuame sa pakapapedrengenga ku taatalialaladhaneini, kwini lasu si mapapangale la kidailinga ki hulrice ki Tamatama.

^2-3 Saka taralrima ka caili ku takatalialaladhane ki Rihubuame, ku Tamatama la ngwalai ki tabaebalreane lini ki Tamatama la pathavungu liniane. Ku talialalai ki swa Izipiti ka Sisake wasangiluku ku ta 1,200 ku sakikaruburuburane ka palridingi, 60,000 ku tarangurigi ka kwapingi, si kaika asiasipane ku kwapingi, paelre ki lakwapingi ki swa Lribia, swa Suki si swa Kuse, kela kikaruburu ki swa Yerusalrime.

⁴ Kwini lasu la malra kwini ki taikaiyane telenge ki kwapingi ka cekele ki Yuda, si deethenga Yerusalrime.

⁵ Ku yuginsia ka Simaia la mwa kidrele ki talialalai ka Rihubuame si latarasangililuku ki Yuda, kikai la tarasangililuku la ngwalai ku amuberane ki Sisake la makitu mwa Yerusalrime. Ku Simia la iya kai liniane, “Yakai ku vaga ki Tamatama numiane, ‘Wacilri numi nakwane, lakamani ku cilrili numiane kikai, si malra numiane baai ki Sisake.’ ”

⁶ Ku talialalai si latarasangililuku la makitu ngipapelaela ku pasalrivane Lini; kwini lalasu la iya kai, “Ku Tamatama pacengecenge.”

⁷ Ku Tamatama la drele liniane sa ngiatatwalebenga, la kawriivanga ki Simaia, “Ngwalai kikai tangitatwalebeanenga lini si ngithathingale ku pasalrivane lini, kainaku lri amudunga liniane. Ai lu kela ku Sisake kikaruburu, kwini lalasu lri palakebe ku niake lini sikathane. Ku swa Yerusalrime lai kai kimwa ku lisianeli.

⁸ Ai ku Sisake lri pamalebe liniane, kikwini kwi lalasu lai lri thingale ku tamakakaelane ku marasikai nakwane si marasikai ki warathudu kawmasane.”

⁹ Ku talialalai ka Sisake kiakaruburu ki swa Yerusalrime, la malra kwini la tinukucingalrane ku lamanemane ikai ki daane ki Twaumase si daane ki talialalai, paelre kudra darepe ki talialalai ka Sulumungu ku kingi ka alathare.

¹⁰ Ku Rihubuame pakai ku apawbalrithane kikai kingi ka alathare la darepe ku lriwlu ka alathare, la malra kikwini si baai ki tamatama ki tarakadrenge ki lrawlrawdru ki daane ki talialalai.

¹¹ Ku talialalai lu mwa ki daane ki Twaumase, ku tarakadrenge la malra kikai alathare, lu katwasenga ku talialalai ala sawlri pwa ki takadrekadrengane.

¹² Ngwalai ku tapasalaladhane ki Rihubuame ki Tamatama, ku lisiane ki Tamatama la kawlrawnga, kai pakisalru amudu iniane, ku tangimiamiane ki swa Yuda la kapapeedrengenga.

Ningubebelengane pelaela ku tarathudane ki Rihubuame

¹³ Ku Rihubuame atalialalai ikai Yerusalrime, pakapapedrenge ku pukuini. Saka talialalai kwini lasu tara 41 ku cailini, tara 17 ka caili rathudu Yerusalrime. Ku Yerusalrime amani ku pilri ki Tamatama patwalai ki lakuni ki swa Iseraylri tutasukusukubane iniane. Ku tina ki Rihubuame swa Amune ka Nama.

¹⁴ Ku Rihubuame paiya ku ngialisiane, asi lwiyane kwini lasu kai mwarikai ku takidremedremane ki Tamatama.

¹⁵ Ku takaungane ki Rihubuame si tamacucungulane lini ninguvavaevane pacase pikai ki lrikisi ki Yuginsia ka Simaia ka hungu si aswalala ki lrikisi ki Yuginsia ka Idu ka hungu. Ku Rihubuame si Yerubuame tamakakaruburuburane.

¹⁶ Sa pacainga ku Rihubuame la kidralreke ikai ki tadralredralrekane ki talialalai ki cekele ki Davidi. Ku lalakeini ka Abiya mwacungulu iniane atalialalai.