2 Lacaili 1 - Ngudradreadrekadhane Ka Sisiu 魯凱語聖經

Kiatubi ku lrigilane ku Sulumungu

¹ Ku lalake ki talialalai ka Davidi ka Sulumungu pakapapedrengenga ku tarathudaneini ki swa Iseraylri. Ku Tamatama ka Twaumaseini swabulrubulru iniane, la ngiradhekane kagarange.

² Ku Sulumungu wadrekase pakanaelre ki kiacapili tarasangililuku ki takudrulu si taidai ka kwapingi, tabebelenge ki kunkwane, latamatama ki ladadaanane si mapapangale makanaelre,

³ makitu tupalra iniane mwa ka Gibiungu ki Alrivilrivi ka balrawbau, asi lwiyane kudra tamakakaiyane ki Tamatama ka Alrivilrivi ka balrawbau; kikai Alrivilrivi ka balrawbau amani ku cegecege ki sasiakawlu ki Tamatama ka Musi ikai calragulragu.

⁴ (Ku Langiane yakai Yerusalrime; ku talialalai ka Davidi sa patwalai Kiriathe Yerime malra yai, pasiakai iniane tudaane ku taluvale ku tapikaiyane ki Alrivilrivi ka balrawbau.)

⁵ Ku agane ki Hure lalake ki Uri ka Bizale ku darepeini ku lriwlu ka tapatarumaramarane mialri ikai Gibiungu, ikai cucubungu ki Alrivilrivi ka balrawbau ki Tamatama. Ku talialalai ka Sulumungu si mapapangale makanaelre yakai kwini sukusukubu ki Tamatama.

⁶ Ku talialalai yakai cucubungu ki Alrivilrivi ka balrawbau sukubu ki Tamatama, piakai ki lriwlu ka tapatarumaramarane patarumara ku kudrulu ku nilapulapwane tu Lama ka lrisi.

⁷ Kwini sakamaungu, ku Twaumase papia ki Sulumungu adrelane, kivaga iniane, “Ani baai nakwane ku manemane amiasu nakwane?”

⁸ Ku Sulumungu la tubalre, “Taarakaiyanesu ku maadrau ku thalradhane kilibake ki ama ka Davidi, kikai asasane la paucungulungasu iniane paatalialalai nakwane.

⁹ Tamatama ka Twaumase, kiatubiaku muswane pangimia kudra kiketeketesu ki ama. Wacegecegesu nakwane atalialalai, si rathudu ki vaeva ka kaika amaka asipane ku pangalane ka laumawmase,

¹⁰ kiatubiaku muswane baadhaili ku lrigilane si thingalane, la nau maka dulru rathudu liniane. Lu kaika ngimiyaiya kwini, lri maka tumanaku rathudu ku tatha kai ku pangalane kai ki kawkawlusu?”

¹¹ Ku Twaumase la tubalre ki Sulumungu, “Pacengecenge kai tapilrianesu. Kaisu kiatubi ku angiesadhane ku tacekecekelane, ku nagane, la kaisu kitubi ku amudane ki labadha, ku ngipapasikaisu kitubi ku akalragiane ku niakesu, kiatubilringasu ku lrigilane si thingalane, ku adulrwanesu rathudu ki kawkawluli, ka amani kwidra cegecegeli muswane tutalialalai si rathudu ki mapapangale.

¹² Lakamani, lri baadhaku muswane ku lrigilane si thingalane. La kaika kathane kikai, lri drimaku ku tacekecekelanesu, ku angiesadhanane, ku nagane, lriibate kudra siaswalane sanaka talialalai, lukabibilrili lri mialri kakadrwa ku natangeanga ku talialalai ku lri maka kiramau muswane.”

Puku ki kwapingi si tacekecekelane ki talialalai ka Sulumungu

¹³ Ku Sulumungu matwase ki Alrivilrivi ka balrawbau kavai Gibiungu, twalai ki Alrivilrivi ka balrawbau ki Tamatama cucubungu siwlri mwa Yerusalrime, ikai kavai rathudu ki Iseraylri.

¹⁴ Ku Sulumungu wacegecege ku ta 1,400 ku palridingi ki rigi, si ta 12,000 ka tarangurigi ka kwapingi. Kwini lasu la malra kivala si pikai Yerusalrime, ku drumane la apavalavala pikai talidrumane ki cekele.

¹⁵ Ikai ki tarathudaneini, ku kingi, gingi Yerusalrime mararaamau ki lrenege ku kalrane, ku cedare ka angatu mialri ku kalrane mia ki languangawngatu ka taliwdru.

¹⁶ Ku tarathathakai ki talialalai warathungu ki twalai Muceri si Cilikia ku larigi,

¹⁷ si twalai Izipiti ka lapalridingi ki rigi. Kwini lalasu wamalra kwini larigi si palridingi kilangainga ki latalialalai ki swa Hite si swa Siria, ku vaeva ku palridingi 600 ka gingi, ku vaeva ku rigi 150 ka gingi.