2 Kurintu 9 - Ngudradreadrekadhane Ka Sisiu 魯凱語聖經

Paralubu ki thadalrane ka sinzia

¹ Pangukai ki ngwakai ki apalribulane ki yakai Yerusalrime ka lasinzia, kainaku lri tigami numiane.

² Wathingalaku numiane ka apia paralubu numi, ngwalai kai napapianga naku ki swa Makidunia drengedrengere ku twabakane numi. Amiaku kai, “Ku laretesaneta ka swa Akaia, yakainga ku padulru lini twalai kwicaili.” Ku raberane numi wakandunga ki la takaalra ki laumawmase.

³ Kikai yai siakawlaku pakatwasaku ki tapiya ki laretesane, anatumane la mia numi ki taiyaneli paswalanga padulru ku nirubwane ku paisu, lani kaika ungawngau ka vaga ku talrigwane nai numiane ikai kikai ki awngane.

⁴ Alaiyasi ikai ku swa Makidunia ku twapapalra naiane katwase, la thingale numiane ka kai padulru tupudriadringai, lri kainu nai turamuru, asi lwiyane masalru numiane turamuru. Laikamanianenga numi!

⁵ Lakamani, lu kidremedremaku lri tara paswalana madu kau tapiya ku laretesane mwa numiane kwini, la saruburubua ku sapalribulane nai iya numi ku lapaisu, lu kelanga naku anika nipadulrwanenga; ka adulrwane tusapelaelane ku pakubulu numi palribulu ka nipasingikidremedremane kiraragai, ka kaika nivuthane.

⁶ Pulringava: Ku pakabekele paivai lrika bekelane ku akitalekane; ku pakakalra paivai lrika kaalra ku akitalekane.

⁷ Lakamani, sanaka aneanenga lri singikai ku palraingi ki kidremedremeini pakubulu paralubu, si kai kalrilriki, kai vutha, asi lwiyane ku Twaumase madalame ku kiaragai patarumara ku umawmase.

⁸ Ku Twaumase lri aru drima pakakalra baai numiane, si lai kai numi lri makakelrete sikakathane, lri ikaiyana ku tedrane, lri dulrwana numi ikai ki makaelaela ki mathariri ka awngane kisamula kaungu.

⁹ Mia ki taiyane ki Sisiu: Kwi lasu matwabake palribulu ki matiakukuru ka umawmase; ku kilibakane uleceganeini lri ikai apalralrawthu.

¹⁰ Kwini wabaai ku sapaivai ki tara sabwabulu, la baai ku akaneane pakane ki umawmase ka Twaumase, lai lri tara baai ku urikai numi ku sapaivai numiane, lai lri pakadrau iniane, ku dringelresane ki kakudhane numi lani ngiesadhane ku tapumadrwane.

¹¹ Kwi lasu lai lri mialri pakaesai numiane, taikaiyane ku puku katwabake vutha baai ki matiakukuru, la dulru ku takaalra ku umawmase ngwalai ku tapatwaladhane naiane tarumara ku saceacebe numi si kiaseasene ki Twaumase.

¹² Asi lwiyane ku pakubulu numi paralubu kaika wabaai ku urikai ki sinzia sikakathane, mialri paputaluvaivai ki takaalra ki laumawmase ku kiaseasenane ki Twaumase.

¹³ Kikai kilibakane si pia ku mathariri ku awngane taingeane ka sapelaelane, la dulru thingale ku takaalra ku laumawmase ku pasalaladhane numi ki Kirisitu, papia kudra thingale numi ku hukuingi si pakaelre ku kidremedreme, la dulru katwabake pakubulu palribulu ki palrapalra, kwi lalasu ala lri dulru baai ku lrigu patuelre ki Twaumase.

¹⁴ Kwi lalasu lri mialri ngwalai ku tabadhane ki Twaumase numiane ku kaika langumigegemi, la aru akuli numiane, si karagale pasikai numiane inulri.

¹⁵ Takiaseasene ki Twaumase! Piakai ku kaika amaka aravagane pelaela ku migemi!