2 Kurintu 8 - Ngudradreadrekadhane Ka Sisiu 魯凱語聖經

Pakubulu ki la Kirisite

¹ Laretesane, anatumane la thingale amia nai numiane luka pangiatumane ku Twaumase pakaesai ki lakiwkai ki swa Makidunia.

² Kwi lalasu twalai ki tangilribatane lini ki sapapacai si tarumara ku pakialringau ku takituthiathingalane; ai kwi lalasu swaete ku sakiaragai, adravane ka yakai ki matikurwane turamuru wadulrwana katwabake si pakubulu paralubu.

³ Wathurwaku pelaela, kudra pakubulu lini paralubu yai pakaelrenga ku tadulrwane lini, palriibatelringa kamani ki puku lini. Si ngikakamaani,

⁴ kwi lalasu kiatubi naiane, pangukai kikai mathariri ka awngane ku akipaelreane lini palribulu ki yakai Yerusalrime ka lasinzia.

⁵ Kikai tengane ka walribate turamuru ki sasiadradrama nai. Ku aswalalanga, kwi lalasu ngiapapatarumara baai ki Tamatama, ala singikai ku takidremedremane ki Twaumase paralubu naiane.

⁶ Ngwalai kai, pasapukwane nai ki Titu ku apacungulane paralubu numiane, si patulrepenge kudra tapathagilaneini kikai mathariri ka taingeane ka awngane.

⁷ Adravane ka salrwane, lrigilane avavaga, thingalane, parakane paralubu ki palrapalra, si kilibakane naiane, swaete ikai numiane, anatumane la katwabake ikai kikai ki mathariri ka awngane amiaku numiane.

⁸ Kainaku ka lri kelrete ku manemane ku asingikaiyane ku kakudhane, sana thingale numi ki palrapalra ku tapangimiane kisamula paralubu ki umawmase, si arakai kikai kilrialringau ku sakialibake numi.

⁹ Wathingalenga numi ku migemi ki Tamatamata ka Yesu Kirisitu: Namani kudra maesaesaesai, ai ngwalai numiane si amatiakuru, kudra pacugane ani ngwalai ku tamatikurwaneini si ani kaesai amia numiane.

¹⁰ Pangukai kikai, lu kidremedremaku: Mathaithariringa lu tulrepenge numi kudra pathagili numi kwicaili ababange. Kai numi ka aswalalanga pia kikai awngane sikakathane, mialri numi ka aswalalanga mapadawdaruru kikai ki awngane!

¹¹ La kecengana padrumulru, si patulrepenge kikai awngane! Arakaiya kudra raberane satawpathagili numi kikake si tulrepenge kikai awngane, si la singikaiya kudra ngipapikai numi patuelre kaungu.

¹² Alaiyasi ka patengane numi baai paralubu, ku Twaumase lri tara kiragai tarumara; ani patarumara ku paka ikai lini amia numiane, kaika amani kudra ki pakakadrwa numi.

^13-14 Kainaku ka nau padrima ku telregane ki amece lini, si pakaliapai ku amece ki palrapalra amia. Ai kai maesaesai numi kaiasasane, nai paralubu numi kudra ki la matiakukuru. Ala kudra lu kaesaesainga la ikai ku urikai numi, kikai lalasu lri mialri paralubu numiane. Laka miyaiya kikai sana kela ku amapaparalubane lri mapaparalubu numi.

¹⁵ Mararamau ku taiyane ki Sisiu: Ku ngwakalra rubu, kadrwa ku tedrane; ku ngwabekele rubu, kadrwa ku takauramane.

Titu si papapalraini kaungu

¹⁶ Maelanenga ki Twaumase, pakiasamula ki Titu mia naiane parake turamuru paralubu numiane.

¹⁷ Kaika ngwalai ku tapasapukwanane nai iniane sikakathane, mialri ka ngiakakamani, siadrama turamuru ku amwane numiane kwini.

¹⁸ Pakatwase nai ki retesaneta ku tangea patupapalra iniane katwase; kikai retesaneta ikai ki awngane ki apelaelane ki hukuingi kiausakene ki lakiwkai.

¹⁹ Kaika miyaiya kai sikakathane, ikai kudra alrigwane ki Tamatama si padrumudrumulru kikai ki mathariri ka awngane, kai lasu kiapilri ki la swa kiwkai, si kamani ku redelane nai ki kadalranane, laka sapelaelane ka kiragai nai makanaelre paralubu.

²⁰ Kai pikai nai kai ki nikiragadhane rubu ka paisu, kiararaakete nai, amani lu kikaelaela nai ki laumawmase;

²¹ Asi lwiyane atarapiane nai ka mathariri ka awngane, paiya nai kai icucubungu ki Tamatama, laka miyaiya nai icucubungu ki umawmase.

²² La pakatwase nai ku tangea ku retesane nai pakarededele liniane. Kikai retesane nai kingikalrale nai kilrialringau iniane, wathingale nai kai lasu ikai ki laawngane parake turamuru paralubu ki palrapalra. Kaiasasane, kai lasu masalru numiane, si la aru sidrama ku amwane paralubu numiane.

²³ Pangukai ki Titu, amani ku papapalra nai, papalrali ku aparalubane numiane ku awngane. Kudra papalraini ka tadrusa ka lamalala yai kiasikawlu ki lakiwkai, ka lrigu ki Kirisitu.

²⁴ Lakamani, ikaiya ki lakiwkai cucubungu pathingalane ku sakialibake numi liniane, si la pathingale ki lakiwkai, ku lrigu nai numiane yai kai pasalriu.