2 Kurintu 7 - Ngudradreadrekadhane Ka Sisiu 魯凱語聖經

¹ La kinilibakane ka laretesane, kudra wamalrangata kikai la pinalraingane, lri ngipapakabulata, si mwalra patuelre ku kudrulru ki kinawmasane si kidremedreme, ikai ki usakenane si ukuludrane ki Twaumase ku tapanianianiakane la maka kitulrepenge kabula.

Sakiaragai ki Pawru

² Arakaiya ku swadravane ki kidremedreme numi si tarumara naiane. Kadrwa ku pia nai ku apakasamadrane nai ki umawmase; kai nai mabebetethe ki aneane, laka kadrwa ku paasipunu nai ki aneane.

³ Lu iyaku kai, kainaku ka maelaelaela numiane. Kawarivanga naku, madalame nai numiane turamuru; mwabangalre nai tupapalra numiane ku apanianiakane ku apacadhane.

⁴ Masalrwaku numiane, walrigwaku numiane turamuru. Ikai ki sapapacai patuelre, kiasasaku turamuru, si suete ku sakiaragai.

⁵ Sa kelanga nai Makidunia, kai nai maka swatelraiyana. Kiapadradresenge nai ki akwalriane papia kidruanga, kiapadradresenge nai ki rivwane, la ukuludru kai kidremedreme nai.

⁶ Ai, kudra amani ku pasapukwane ki masulringa ka umawmase ka Twaumase pangwakai ki Titu kainganai pasapukwane naiane.

⁷ Kai lasu kaika wakela kai sikakathane, peaelaelana naiane ku tapangimianeini kipasapukwane numiane si ku tapangimiane numi sidrama ku akikawrivane numi nakwane, ku tapangimiane numi katelrege ku kidremedreme, si laka patengatengane pusakai nakwane; kikai patuelre arwa kiragadhaku aru kasasa.

⁸ Patharukai saka siaswalane ku baaili numiane kudra tigami, adravane ka pakwalri ki kidremedreme numi, lri kainaku ngitatasiwlriwlri. Alau lri ngwaladhaku ku tathingalaneli kwini tigami ikai numiane ka lri padawdalru numi katelrege ku kidremedreme numi si lri ngitatasiwlriwlriaku.

⁹ Ai, kikainga kiararagadhaku turamuru, kaika ngwalai ku tapakatelreganeli ki kidremedreme numi, ngwalai ku telregane ki kidremedreme numi si pakabalrithi ki kidremedreme numi. Ku Twaumase twathariri arakai ku telregane ki kidremedreme numi, ngwalai kai adulrwane kawriva ku pia nai ala kaika twalisi numiane iya.

¹⁰ Ku tuthariri arakai ki Twaumase ku telregane ki kidremedreme si pakabalrithi ki kidremedreme ki umawmase, maka kiapalribulu ku umawmase; kikai kaika angitatasiwlriwlriane! Ai ku ngwakai kawmasane ku telregane ki kidremedreme papacai ki umawmase.

¹¹ Drela, kai Twaumase paiya kai tuthariri arakai ki telregane ki kidremedreme numi, ala kasakwakwa numi ngipapasikai kidrikisi kawriva, si putaluvaivai ku lisiane ngukai ki dringelresane, la kipapawlringau si kelele, la sidrama, la pakaelre ku kidremedreme, laka tapathavungane ku kai mwalecege ku kakudhane! Ikai ki manemanenga la tusapelaelane ku bulane numi.

¹² Ngwalai kai, adravane ka wapacasenga naku kudra tigami, ai kainaku ka pasiakai ki pasalriu ka umawmase pacase, la kainaku ka pasikai ki kiapasalriu ka umawmase pacase. Ngiabalre kamani, ku pacugane ku tangadrane ku pacaseli kudra tigami yai lri pathingalane ku parakane numi naiane turamuru icucubungu ki Twaumase.

¹³ Ngwalai nai kai si kipasapukwane. Kaika miyaiya kai sikakathane, ku sakiaragai ki Titu arwa drima ku kiragadhane nai; asi lwiyane paralubu numi makanaelre iniane, si pakiragai iniane.

¹⁴ Yacucubungunga naku iniane si lrigu numiane, kai numi pangiasasangate nakwane. Takapatenganane nai lu kawriva nai numiane; laka thadalrane, ku talrigwane nai numiane papia ki Titu la ka sapelaelane ka patengane.

¹⁵ Lakamani, ku Titu sangulringau ku tapangimiane numi pasalaladha, ku tapangimiane numi arakai ku saukukuludru pasudalru iniane, arwa drima ku sakialibake ki kidremedremeini numiane.

¹⁶ Kikai kiaragadhaku turamuru, asi lwiyane lri dulrwaku kasalru numiane!